ទីក្រុងប្រ៊ុចសែល៖ នៅសល់តែប៉ុន្មានថ្ងៃទៀតប៉ុណ្ណោះ អាមេរិកនឹងបិទបញ្ចប់ការព្យួរទុកផែនការដំឡើងពន្ធ។ មានន័យថានឹងចាប់ផ្ដើមអនុវត្តការដំឡើងពន្ធនៅថ្ងៃទី១ ខែសីហាខាងមុខនេះហើយ។ ដូច្នេះមិននៅបង្អង់យូរ ឆ្លៀតឱកាសដែលលោកត្រាំកំពុងបំពេញទស្សនកិច្ចក្រៅផ្លូវការនៅស្កុតលែន និងសម្ពោធទីលានវាយកូនគោលនៅទីនោះ អឺរ៉ុបចង់ជជែកអំពីបញ្ហានេះតែម្ដង។ ប្រធានគណៈកម្មការអឺរ៉ុប លោកស្រីឡីយឹន បានចាកចេញដំណើរតាំងពីយប់មិញដើម្បីស្កាត់ជួបលោកត្រាំ។
មន្ត្រីជាន់ខ្ពស់អាមេរិក និងអឺរ៉ុបអះអាងថាភាគីទាំង២បន្តចរចាជិតត្រូវរ៉ូវគ្នាហើយ។ លោកត្រាំថ្លែងប្រាប់អ្នកសារព័ត៌មានថាលោកទន្ទឹងរង់ចាំជួបលោកស្រីឡីយឹនជានិច្ចដែលលោកចាត់ទុកថាលោកស្រីជាមេដឹកនាំដ៏គួរឱ្យគោរពដ៏ខ្ពង់ខ្ពស់។ ប៉ុន្តែជាថ្មីម្ដងទៀត លោកនៅតែមិនទាន់ហ៊ានធានាអះអាងថាការចរចាគ្នាអាចនឹងជោគជ័យ១០០%នោះទេ។ លោកថាលទ្ធផលចរចាគ្នាអាចនឹង៥០-៥០។ លោកអះអាងថាសហភាពអឺរ៉ុបចង់បានកិច្ចព្រមព្រៀងនេះយ៉ាងខ្លាំង។
លោកត្រាំយល់ថាបើរឿងនេះធ្វើបានសម្រេច វានឹងក្លាយជាកិច្ចព្រមព្រៀងពាណិជ្ជកម្មដ៏ធំបំផុតនៅក្នុងអាណត្តិដែលលោកដឹកនាំ។ ពោលគឺច្រើនលើសពី៥៥០ពាន់លានដុល្លារដែលអាមេរិក និងជប៉ុនទើបតែចុះកិច្ចព្រមព្រៀងនៅសប្ដាហ៍នេះទៅទៀត។ មន្ត្រីជាន់ខ្ពស់អាមេរិកដែលទទួលភារកិច្ចខាងវិស័យពាណិជ្ជកម្មក៏បានធ្វើដំណើរទៅស្កុតលែនផងដែរដើម្បីចូលរួមការចរចាកម្រិតខ្ពស់ជាមួយអឺរ៉ុប។
ប្រភពដែលស្នើសុំមិនបញ្ចេញឈ្មោះបានប្រាប់អ្នកសារព័ត៌មានថាយើង (អាមេរិក) មានសុទិដ្ឋិនិយមដោយប្រយ័ត្នប្រយែងថាអាចនឹងមានកិច្ចព្រមព្រៀងអាមេរិក-អឺរ៉ុប។ ប៉ុន្តែអ្វីៗមិនទាន់ដឹងច្បាស់ទេលុះត្រាតែរង់ចាំលទ្ធផលជាក់ស្ដែងតែម្ដង។ គណៈកម្មការអឺរ៉ុបថ្លែងថាការចរចាជាមួយអាមេរិកអាចនឹងរកឃើញដំណោះស្រាយ។ គ្រាន់តែថារដ្ឋជាសមាជិកអឺរ៉ុបខ្លះចង់ប្រើយុទ្ធសាស្ត្រមុខ២ ឬការទុកផ្លូវក្រោយដើរសម្រាប់ខ្លួនឯង។ មានន័យថាបើមានកិច្ចព្រមព្រៀងជាមួយគ្នាជាការល្អប្រសើរ។ ប៉ុន្តែបើគ្មានកិច្ចព្រមព្រៀងទេ ហើយអាមេរិកនៅតែដំឡើងពន្ធ អឺរ៉ុបត្រូវតែចាត់វិធានការវាយបកដើម្បីយកពន្ធ៩៣ពាន់អឺរ៉ូ (១០៩ពាន់លានដុល្លារ) ពីអាមេរិកត្រឡប់មកវិញ៕
ចែករំលែកព័តមាននេះ