ទីក្រុងម៉ូស្គូ៖ ក្រសួងការពារជាតិរុស្ស៊ីប្រកាសថាយោធារបស់ខ្លួនទើបតែវាយយកបានភូមិចំនួន២ទៀតរបស់អ៊ុយក្រែននៅភាគខាងកើត។ ក្នុងនោះ ភូមិមួយស្ថិតនៅតំបន់ឌីនីប្រូប៉េត្រូស។ រុស្ស៊ីថាកងទ័ពរបស់ខ្លួនកំពុងវាយសម្រុកទៅមុខនៅតំបន់នេះ។ កងទ័ពអ៊ុយក្រែនមិនបានឆ្លើយតបទៅនឹងការអះអាងនេះទេ។ ប៉ុន្តែអ៊ុយក្រែនទទួលស្គាល់ថាពិតជាមានការប្រយុទ្ធគ្នាខ្លាំងក្លា។
លោកហ្សេឡិនស្គីថ្លែងថាទីក្រុងផូករ៉ូសដែលជាទីតាំងសំខាន់សម្រាប់ចែកចាយភស្តុភារទៅកាន់សមរភូមិមុខនោះឥឡូវនេះក្លាយជាចំណុចក្ដៅនៃសង្គ្រាម។ លោកអះអាងថាកងទ័ពអ៊ុយក្រែនមានជោគជ័យនៅតំបន់ស៊ូមី (Sumy) ដែលស្ថិតនៅភាគខាងជើងជាប់នឹងព្រំដែនរុស្ស៊ី។ នៅទីនេះកាលពីប៉ុន្មានអាទិត្យមុន កងទ័ពរុស្ស៊ីហាក់ដូចជាមានប្រៀប និងធ្វើព្យុះធ្វើភ្លៀងយ៉ាងខ្លាំង។
ការប៉ះទង្គិចគ្នានៅសមរភូមិក្ដៅជាច្រើនកន្លែងនេះកើតឡើងបីថ្ងៃបន្ទាប់ពីភាគីទាំង២ជួបគ្នាជាលើកទីបីនៅប្រទេសតួកគីដើម្បីដោះស្រាយបញ្ហា។ លទ្ធផលនៃការចរចាគ្នាទាំងប៉ុន្មានដងនោះគ្មានអ្វីក្រៅពីការឯកភាពដូរឈ្លើយសឹក ឬប្រគល់សាកសពឈ្លើយសឹកតែប៉ុណ្ណោះ។ ប៉ុន្តែបញ្ហាសំខាន់នាំទៅរកសន្តិភាពមិនទាន់អាចនិយាយត្រូវរ៉ូវគ្នាទេ រួមទាំងសំណើឱ្យមានបទឈប់បាញ់ផងដែរ។
ក្រសួងការពារជាតិរុស្ស៊ីប្រកាសថាយោធារបស់ខ្លួនវាយដណ្ដើមបានភូមិហ្សេឡិនយី ហាយ (Zelenyi Hai) នៅតំបន់ដូញែត និងភូមិម៉ាលីអ៊ីវកា (Maliivka) នៅតំបន់ឌីនីប្រូប៉េត្រូស (Dnipropetrovsk)។ ក្រសួងចាត់ទុកភូមិឡេឡិនយី ហាយជាទីតាំងឈរជើងដ៏រឹងមាំរបស់អ៊ុយក្រែន។ ឌីនីប្រូប៉េត្រូសមិនស្ថិតនៅក្នុងតំបន់ទាំងប្រាំដែលរុស្ស៊ីដាក់បញ្ចូលជាទឹកដីរបស់ខ្លួននោះទេ៕
ចែករំលែកព័តមាននេះ