ប្រទេស​ចិន ៖ លោក Zhong Shanshan ស្ថាបនិក និង​ជា​ប្រធាន​ក្រុមហ៊ុន​ផលិត​ដប​ទឹក និង​ភេសជ្ជៈ​ដ៏​ធំ​បំផុត​របស់​ប្រទេស​ចិន Nongfu Spring ដែល​ត្រូវ​បាន​គេ​ស្គាល់​ថា មហាសេដ្ឋី​ទឹក​សុទ្ធ​ចិន ឡើងឈរ​ជា​បុគ្គល​មានទ្រព្យ​ច្រើន​ជាងគេ​បំផុត​របស់​ចិន ដោយ​ទ្រព្យ​លោក​កើន​លើស​ទ្រព្យ​សហ​ស្ថាបនិក​ក្រុមហ៊ុន​បច្ចេកវិទ្យា​អ៊ីនធឺណិត​ខ្នាត​យ​ក្យ​ចិន ByteDance លោក Zhang Yiming​។

ទ្រព្យសម្បត្តិ​របស់​លោក Zhong Shanshan ដែល​បច្ចុប្បន្ន​ឈាន​ដល់​វ័យ​៧០​ឆ្នាំ កើនឡើង​ដល់ ៦៧,៥​ពាន់​លាន​ដុល្លារ​អា​មេ​រិ​ក ប្រាក់​ចំណូល​ជា​ចម្បង​ចេញពី​ភាគហ៊ុន​របស់​លោក​នៅ​ក្នុង​ក្រុមហ៊ុន Nongfu Spring​។ នេះ​បើ​តាម​ទិន្នន័យ​ចុង​ក្រោយ​ពី​ទស្សនាវដ្តី​ពាណិជ្ជកម្ម​អា​មេ​រិ​ក Forbes គិត​ត្រឹម​រសៀល​ថ្ងៃ​ទី​២៧ ខែកក្កដា ឆ្នាំ​២០២៥​។

ការ​វិល​ត្រឡប់​មក​កាន់កាប់​តំណែង​បុគ្គល​មាន​ជាងគេ​បំផុត​ក្នុង​ប្រទេស​ចិន​របស់​លោក Zhong ត្រូវ​បាន​ជំរុញ​ដោយ​ការ​កើនឡើង ៣៥% នៅ​ក្នុង​ភាគហ៊ុន​ដែល​បាន​ចុះបញ្ជី​នៅ​ទីក្រុង​ហុងកុង​របស់​ក្រុមហ៊ុន Nongfu Spring ដែល​មក​ពី​ភាព​ប្រសើរ​ឡើង​នៃ​អាជីវកម្ម​ផលិត​ដប​ទឹក​ដែល​ជា​អាជីវកម្ម​ស្នូល​របស់​ក្រុមហ៊ុន​ផ្ទាល់ ដែល​បាន​ប្រឈម​មុខ​នឹង​បញ្ហា​កាលពី​ឆ្នាំ​មុន ដោយសារ​តែ​ការ​បញ្ចុះតម្លៃ​យ៉ាង​ខ្លាំង ដើម្បី​ទាក់ទាញ​អ្នក​ប្រើប្រាស់​។

នៅ​ឆ្នាំ​នេះ សម្ពាធ​តម្លៃ​ប្រកួតប្រជែង​ត្រូវ​បាន​រំពឹង​ថា​នឹង​ថយ​ចុះ នៅ​ពេល​រដ្ឋាភិបាល​ចិន ស្វែងរក​ការ​ទប់ស្កាត់​សង្គ្រាម​តម្លៃ​នៅ​ទូ​ទាំង​ឧស្សាហកម្ម​នេះ ដើម្បី​ទប់ទល់​នឹង​សម្ពាធ​សេដ្ឋកិច្ច​ដោយសារ​បរិត្តផរណា​។

នៅ​ក្នុង​កំណត់​ត្រា​ស្រាវជ្រាវ​ក្នុង​ខែកក្កដា លោក Jacky Tsang អ្នកវិភាគ​ប្រចាំ​ទីក្រុង​ហុងកុង​របស់​ក្រុមហ៊ុន Morningstar បាន​ព្យាករណ៍​ថា ការ​លក់​ក្រុមហ៊ុន Nongfu Spring នឹង​កើនឡើង ១៣,៦% ពី​មួយ​ឆ្នាំទៅ​មួយ​ឆ្នាំ​រហូត​ដល់​តម្លៃ ៤៨,៧​ពាន់​លាន​យន់ ឬ​ស្មើនឹង ៦,៨​ពាន់​លាន​ដុល្លារ​អា​មេ​រិ​ក​ក្នុងឆ្នាំនេះ​។

ក្រៅពី​ជា​ម្ចាស់​ក្រុមហ៊ុន Nongfu Spring នោះ លោក Zhong ក៏​មាន​ភាគហ៊ុន​នៅ​ក្នុង​ក្រុមហ៊ុន Beijing Wantai Biological Pharmacy Enterprise ដែល​ជា​ក្រុមហ៊ុន​ផ្គត់ផ្គង់​ថ្នាំពេទ្យ ផលិត​ឧបករណ៍​ធ្វើតេស្ត និង​វ៉ាក់សាំង​។

ចំណាត់ថ្នាក់​ទី​២ នៅ​ក្នុង​ចំណោម​មហាសេដ្ឋី​កំពូល​របស់​ប្រទេស​ចិន លោក Zhang Yiming មានទ្រព្យ​សម្បត្តិ​ចំនួន ៦៥,៥​ពាន់​លាន​ដុល្លារ ដែល​បាន​មក​ពី​ភាគហ៊ុន​របស់​l​លោក​ក្នុង​ក្រុមហ៊ុន ByteDance ដែល​ជា​ក្រុមហ៊ុនមេ​របស់​ក្រុមហ៊ុន TikTok​។ ចំណែក​លោក Ma Huateng ប្រធាន​ក្រុមហ៊ុន​បច្ចេកវិទ្យា​ចិន Tencent ឈរ​នៅ​ចំណាត់ថ្នាក់​ទី​៣ ជាមួយ​ទ្រព្យសម្បត្តិ​ចំនួន ៥៦,៤​ពាន់​លាន​ដុល្លារ​៕ ដកស្រង់ ៖ VnExpress