ខេត្តប៉ៃលិន ៖ បន្ទាប់ពីមានការនិយាយតៗ គ្នាថា ប្រជាពលរដ្ឋខ្មែរមួយចំនួន ដែលកំពុងស្នាក់នៅធ្វើការក្នុងប្រទេសថៃ ត្រូវបានជនជាតិថៃវាយដំទាត់ធាក់ ពេលដែលពួកគេកំពុងដើរនៅតាមដងផ្លូវ និងអ្នកខ្លះទៀត ត្រូវបានជនជាតិថៃចូលទៅវាយដល់ក្នុងបន្ទប់…
ខេត្តប៉ៃលិន ៖ បន្ទាប់ពីមានការនិយាយតៗ គ្នាថា ប្រជាពលរដ្ឋខ្មែរមួយចំនួន ដែលកំពុងស្នាក់នៅធ្វើការក្នុងប្រទេសថៃ ត្រូវបានជនជាតិថៃវាយដំទាត់ធាក់ ពេលដែលពួកគេកំពុងដើរនៅតាមដងផ្លូវ និងអ្នកខ្លះទៀត ត្រូវបានជនជាតិថៃចូលទៅវាយដល់ក្នុងបន្ទប់ បណ្តាលឱ្យរងរបួសធ្ងន់ស្រាល។ ដូច្នេះ ដើម្បីធានា បាននូវសុវត្ថិភាព ពលករក្មេងចាស់ប្រុសស្រីជាច្រើននាក់ បានសម្រុកនាំគ្នាធ្វើដំណើរត្រឡប់មកស្រុកខ្មែរវិញកាន់តែច្រើនឡើងៗ ទោះបីជាអ្នកខ្លះត្រូវថៅកែ មិនបើកប្រាក់ឈ្នួលឱ្យ អ្នកខ្លះទៀត ត្រូវបានគេបោកប្រាស់កម្លាំងពលកម្មក៏ដោយ ហើយត្រូវបានលោកជំទាវ បាន ស្រីមុំ អភិបាលខេត្តប៉ៃលិន នៅថ្ងៃទី២៦ ខែកក្កដា ឆ្នាំ២០២៥ ជួបសំណេះសំណាល សួរសុខទុក្ខ និងចាំជូនដំណើរនៅច្រកទ្វារព្រំដែនអន្តរជាតិព្រំ ភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីឱ្យ ត្រលប់ទៅស្រុកកំណើតវិញ តាមរយៈរថយន្តក្រុងរដ្ឋបាលខេត្ត ដោយឥតគិតថ្លៃ ។
លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន បានលើកឡើងថា ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើការណែនាំ ដល់ក្រសួង ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្ត ជាប់ព្រំដែនថៃទាំង៧ ក្នុងករណីមានការវិលត្រឡប់ ដោយមូលហេតុណាមួយ របស់បងប្អូនពលករខ្មែរយើង ពីប្រទេសថៃ ត្រូវត្រៀមសម្របសម្រួលការឆ្លងកាត់ព្រំដែន ការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាពបឋម និងដឹកជញ្ជូនបងប្អូនពីព្រំដែន ត្រឡប់ទៅស្រុកកំណើតវិញ ដោយឥតគិតថ្លៃ ។
លោកជំទាវអភិបាលខេត្ត បានបញ្ជាក់ថា ដោយសារស្ថានភាពព្រំដែនកាន់តែតឹងតែង និងលំបាក ទើបរដ្ឋបាលខេត្ត អំពាវនាវឱ្យពលករខ្មែរ ដែលកំពុងធ្វើការនៅប្រទេសថៃ ត្រឡប់មកមាតុភូមិវិញ មុនពេលអាជ្ញាធរថៃ បណ្តេញចេញ ឬធ្វើការវាយដំទាត់ធាក់ បំពារបំពាន ដោយប្រមាថមើលងាយណាមួយដោយរង់ចាំទទួលទាំងអស់ឱ្យតែជាជនជាតិខ្មែរ ទោះបីជាមានឯកសារគ្រប់គ្រាន់ ឬមិនមានឯកសារគ្រប់គ្រាន់ក៏ដោយហើយជាក់ស្តែងនៅច្រកទ្វារព្រំដែនអន្តរជាតិព្រំ ខេត្តប៉ៃលិន គឺមានបងប្អូនពលករខ្មែរ បានធ្វើដំណើរឆ្លងព្រំដែន ត្រលប់មកកម្ពុជាវិញជារៀងរាល់ថ្ងៃ ដោយរដ្ឋបាលខេត្ត បានសហការជាមួយ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំទីតាំងត្រៀមទទួលបងប្អូនពលករ នៅក្បែរព្រំដែន ដើម្បីសម្រួលទាំងការស្នាក់នៅបណ្ដោះអាសន្ន ការហូបចុក ការថែទាំព្យាបាលសុខភាព និងជូនដំណើរវិលត្រលប់ទៅស្រុកកំណើតវិញ ដោយឥតគិតថ្លៃ ព្រមទាំងជួយរកការងារជូនបងប្អូនពលករផងដែរ ។
លោកជំទាវ បាន ស្រីមុំ ក៏បានអំពាវនាវ និងជូនដំណឹងដល់បងប្អូនពលករខ្មែរ ដែលមានបំណងវិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ ខេត្តប៉ៃលិន ឬក្នុងករណីបងប្អូន កំពុងស្ថិតនៅក្នុងប្រទេសថៃ ជួបបញ្ហាដែលថៅកែមិនទាន់បើកប្រាក់ខែ និងគ្មានមធ្យាបាយធ្វើដំណើរមកដល់ព្រំដែនកម្ពុជា។ តែមានបំណងចង់វិលត្រឡប់ទៅស្រុកកំណើតវិញ សូមទំនាក់ទំនងតាមរយៈលេខទូរសព្ទ 0975 79 78 78 / 088 369 6666 ក្រុមការងារនឹងរង់ចាំជួយសម្របសម្រួលជូន ២៤ម៉ោង/២៤ម៉ោង ។
បើតាមការរៀបរាប់ពីប្រជាពលករ បានបង្ហើបឱ្យដឹងថា សព្វថ្ងៃនេះ ជនជាតិថៃ ពិតជាមានការរើសអើង និងមើលងាយចំពោះពលករខ្មែរយើងយ៉ាងខ្លាំង ជាពិសេសក្រោយពីមានបញ្ហាជំលោះព្រំដែនរវាងប្រទេសទាំង២រួចមក ដោយមានក្រុមជនជាតិថៃជ្រុលនិយមមួយចំនួន បាននាំគ្នាព្រួតវាយជនជាតិខ្មែរយើង បណ្តាលឱ្យរងរបួសធ្ងន់ស្រាល ពេលឃើញនៅតាមផ្លូវ នៅកន្លែងធ្វើការ ឬនៅក្នុងបន្ទបជួលក៏មានដែរ។ ដូច្នេះ ពួកគេពិតជាមានការភ័យខ្លាចយ៉ាងខ្លាំងចំពោះសុវត្ថិភាព ទើបនាំគ្នាប្រញាប់ត្រឡប់មកស្រុកខ្មែរវិញ ៕
ចែករំលែកព័តមាននេះ