រាជធានីភ្នំពេញ ៖ ក្រសួងការពារជាតិកម្ពុជា បានប្រកាសទាត់ចោលព័ត៌មានភូតកុហករបស់ថៃ ដែលផ្សាយថា កម្ពុជាប្រើមីស៊ីល PHL 03 បាញ់ចូលដីខ្លួន ។…
រាជធានីភ្នំពេញ ៖ ក្រសួងការពារជាតិកម្ពុជា បានប្រកាសទាត់ចោលព័ត៌មានភូតកុហករបស់ថៃ ដែលផ្សាយថា កម្ពុជាប្រើមីស៊ីល PHL 03 បាញ់ចូលដីខ្លួន ។
ការប្រកាសរបស់ក្រសួងការពារជាតិកម្ពុជា បន្ទាប់ពីមេដឹកនាំភូមិភាគ២ របស់ថៃ បានសម្ដែងការព្រួយបារម្ភ និងខ្លាចកម្ពុជា ក្នុងការបាញ់គ្រាប់ PHL-03 ក្នុងទឹកដីខ្លួន ។
ការបញ្ជាក់របស់ក្រសួងការពារជាតិកម្ពុជា ខណៈកងទ័ពថៃ នៅតែឈ្លានពានកម្ពុជាទាំងកំរោល និងបន្តពង្រីកការឈ្លានពានតាំងពីទិសខេត្តព្រះវិហារ ឈានដល់ខេត្តពោធិ៍សាត់់ និងខេត្តបន្ទាយមានជ័យ ហើយថែមទាំងចោទប្រកាន់កម្ពុជាថា បានបាញ់គ្រាប់ផ្លោងចូលទឹកដីឡាវ និងប្រើមីស៊ីលចម្ងាញឆ្ងាយ បាញ់ចូលទឹកដីថៃទៀតផង នេះបើតាមការថ្លែងរបស់ អ្នកនាំពាក្យក្រសួងការពារជាតិ ។
ថ្លែងក្នុងសន្និសីទសារព័ត៌មាន នារសៀលថ្ងៃទី២៦ ខែកក្កដា ឆ្នាំ២០២៥ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានទាត់ចោលទាំងស្រុង ចំពោះការចោទប្រកាន់ទាំងនេះ។
លោកជំទាវ ឧត្តមសេនីយ៍ឯក ម៉ាលី សុជាតា បានថ្លែងថា «មុននេះបន្តិច ក៏មានព័ត៌មានចោទប្រកាន់ថា កម្ពុជាបានប្រើនូវមីស៊ីលចម្ងាយឆ្ងាយ PHL-03 ទៅលើភាគីថៃ ។ ចំណុចកន្លែងនេះ ក្រសួងការពារជាតិ សូមទាត់ចោលអំពីព័ត៌មានភូតកុហក និងជាព័ត៌មានប្រឌិតក្លែងក្លាយលាបពណ៌មកលើកម្ពុជា ។ កម្ពុជាគ្មានការចាំបាច់ក្នុងការប្រើមីស៊ីលនេះទេ» ។
ជាមួយគ្នានេះ អ្នកនាំពាក្យក្រសួងការពារជាតិ ក៏បានបដិសេធទាំងស្រុង ចំពោះការចោទប្រកាន់ពីភាគីថៃ ថា កម្ពុជាបានបាញ់ចូលទឹកដីឡាវ ជាការចោទប្រកាន់គ្មានមូលដ្ឋាន ខណៈប្រទេសឡាវ មិនបានចោទប្រកាន់កម្ពុជា និងមិនទាន់បានបើកការស៊ើបអង្កេតលើករណីនេះនៅឡើយ ។
ជាថ្មីម្ដងទៀត កម្ពុជាទាមទារឱ្យភាគីថៃ បញ្ឈប់រាល់សកម្មភាពផ្សព្វផ្សាយព័ត៌មានមិនពិត ដោយចេតនាក្នុងគោលដៅបង្វែរចំណាប់អារម្មណ៍អំពីការរំលោភបំពានច្បាប់អន្តរជាតិរបស់ខ្លួន ដោយលាបពណ៌កម្ពុជា ៕
ចែករំលែកព័តមាននេះ