រាជធានីភ្នំពេញ ៖ ស្ត្រីពោះធំជិតគ្រប់ខែម្នាក់ ជាប់ក្នុងហាងលក់ចំណីសត្វឆ្កែ បន្ទាប់ពីភ្លើងឆេះ តែសំណាងល្អត្រូវបានពលរដ្ឋជួយសង្គ្រោះទាន់ពេលវេលា ។ ហេតុការណ៍នេះបង្កការភ្ញាក់ផ្អើលកាលពីវេលាម៉ោង ០៧ព្រឹកថ្ងៃទី ២៥…
រាជធានីភ្នំពេញ ៖ ស្ត្រីពោះធំជិតគ្រប់ខែម្នាក់ ជាប់ក្នុងហាងលក់ចំណីសត្វឆ្កែ បន្ទាប់ពីភ្លើងឆេះ តែសំណាងល្អត្រូវបានពលរដ្ឋជួយសង្គ្រោះទាន់ពេលវេលា ។
ហេតុការណ៍នេះបង្កការភ្ញាក់ផ្អើលកាលពីវេលាម៉ោង ០៧ព្រឹកថ្ងៃទី ២៥ ខែកក្កដា ឆ្នាំ២០២៥ នៅហាងលក់ចំណីសត្វសុនខយីហោ « VVV PET MART » តាមបណ្តោយផ្លូវ commercial បុរីជីបម៉ុង២៧១ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តាមការបញ្ជាក់ពីប្រជាពលរដ្ឋបានអោយដឹងថា មុនកើតហេតុ គេបានឭសម្លេងផ្ទុះ មួយដងទៅពីរដង ចេញពីខាងក្នុងហាងលក់ចំណីសត្វនោះ ។ ភ្លាមៗ មានផ្សែងហ៊ុយខ្មៅខ្មួលខ្មាញ់ លាយឡំអណ្តាតភ្លើង រួមទាំងមានសម្លេងស្រែកឆោរឡោរ ថា « មានជាប់ស្ត្រីពោះធំម្នាក់ នៅខាងលើ » ខណៈនោះប្រជាពលរដ្ឋ ក្បែរខាងក៏ដូចជាបុគ្គលិក បាននាំគ្នាឡើងទៅជួយស្ត្រីពោះធំខាងលើ ចុះមកក្រោមបានដោយសុវត្ថិភាព មិនបង្កអោយរងរបួសនោះឡើយ ។ ស្របពេលដែរ អគ្គិភ័យឆាបឆេះកាន់តែខ្លាំង មិនអាចគ្រប់គ្រងបាន ពលរដ្ឋប្រញាប់រាយការណ៍ជូនសមត្ថកិច្ចជំនាញ ពន្លត់អគ្គិភ័យ មកអន្តរាគមន៍ជៀសវាងមានការរាលដាល ។
អគ្គិភ័យនេះដែរបានបង្កការខូចខាត ចំណីសត្វ នឹង សម្ភារៈអស់មួយចំនួន សមត្ថកិច្ចប្រើប្រាស់រថយន្តពន្លត់ អគ្គីភ័យចំនួន១០គ្រឿង មកកាន់ទីតាំង បាញ់អោយរលត់ជាស្ថាពរ ។ ចំពោះមូលហេតុ សមត្ថកិច្ចបានស្រាវជ្រាវរកឃើញថា សង្ស័យឆ្លងចរន្តអគ្គិសនី ៕
ចែករំលែកព័តមាននេះ