ទីក្រុងប៉េកាំង៖ ប្រទេសចិនបញ្ចេញប្រតិកម្មតបទៅលោកត្រាំដែលប្រកាសដកខ្លួនពីអង្គការយូណេស្កូ។ ក្រសួងការបរទេសអាមេរិកថ្លែងថាដោយសារចូលយូណេស្កូចំណាយលុយឥតប្រយោជន៍ និងមិនបានបម្រើឱ្យផលប្រយោជន៍ជាតិរបស់អាមេរិកទេ។ តបទៅនឹងបញ្ហានេះ ប្រទេសចិនចោទប្រកាន់ថាទីក្រុងវ៉ាស៊ីនតោនគ្មានការទទួលខុសត្រូវចំពោះកាតព្វកិច្ចរបស់ខ្លួនក្នុងនាមជាប្រទេសមហាអំណាចពិភពលោកមួយទាំងមូលចេះធ្វើបែបនេះទៅរួច។
ប្រភពខ្លះបង្ហើបឱ្យដឹងថាលោកត្រាំដកខ្លួនពីយូណេស្កូព្រោះលោកបារម្ភថាអង្គការនេះមានចរិតលំអៀងទៅខាងប៉ាឡេស្ទីន និងប្រទេសចិន។ ម៉្យាងទៀត អង្គការនេះក៏សង្កត់ទៅលើបញ្ហា១ចំនួនដែលផ្ទុយគ្នាពីនយោបាយរបស់លោក។ ឧទាហរណ៍ ភាពចម្រុះ, សមតា, និងបរិយាប័ណ្ណ (ចូលរួមពីគ្រប់មជ្ឈដ្ឋាន) ដែលសុទ្ធតែជាគោលការណ៍ឆ្វេងនិយមដែលត្រាំប្រឆាំង។
ប្រតិកម្មតបចំពោះបញ្ហានេះ អ្នកនាំពាក្យចិន លោកគួជាឃុន (Guo Jiakun) ថ្លែងថានេះជាលើកទីបីដែលអាមេរិកដកខ្លួនពីអង្គការយូណេស្កូ។ ចិនថាអាមេរិកមិនបានចូលរួមវិភាគទានឱ្យបានគ្រប់គ្រាន់នៅឡើយទេទៅតាមអ្វីដែលខ្លួនគួរតែធ្វើ។ នេះមិនមែនជាអ្វីដែលប្រទេសដ៏ធំមួយ (តួយ៉ាងដូចជាអាមេរិក) គួរប្រកាន់យកនោះទេ។ អ្នកនាំពាក្យរូបនេះសូមបញ្ជាក់ថារដ្ឋាភិបាលរបស់ខ្លួនប្ដេជ្ញាគាំទ្រសកម្មភាពការងាររបស់យូណេស្កូដោយឥតងាករេ។
អ្នកនាំពាក្យចិនក៏ឆ្លៀតរំលេចឱ្យឃើញបញ្ហាមួយចំនួនពាក់ព័ន្ធនឹងស្ថាប័នអន្តរជាតិផងដែរ។ លោកនិយាយអំពីខួបទី៨០ឆ្នាំនៃការបង្កើតអង្គការសហប្រជាជាតិ។ លោកថារដ្ឋាភិបាលចិនសូមអំពាវនាវឱ្យប្រទេសទាំងអស់ទូទាំងសាកលលោកប្រកាន់ខ្ជាប់នូវនយោបាយពហុភាគីនិយម និងចាត់វិធានការដ៏ហ្មត់ចត់ដើម្បីគាំទ្រប្រព័ន្ធអន្តរជាតិដោយផ្អែកទៅលើគោលការណ៍របស់អង្គការសហប្រជាជាតិ៕
ចែករំលែកព័តមាននេះ