កម្ពុជាកំពុងមានមហិច្ឆតាពង្រីកទេសចរណ៍ផ្លូវទឹកពីខេត្តសៀរាប ទៅ កាន់ ខេត្តជាប់សមុទ្រដោយផ្ទាល់តាមរយ:គម្រោងកសាងព្រែកជីកហ្វូណនតេជោ ដែលកំពុងតែបោះជំហានសន្សឹមៗទៅមុខ។
គម្រោងនេះនឹងក្លាយជាការតភ្ជាប់ជាប្រវត្តិសាស្ត្រថ្មីបំផុតដែលកម្ពុជាអាចធ្វើការតភ្ជាប់ពីខេត្តសៀមរាបដែលជា ប៉ូលទេសចរណ៍វប្បធម៌ ទៅតំបន់់ឆ្នេរសមុទ្រដែលជាប៉ូលសេដ្ឋកិច្ចទេសចរណ៍នៅឆ្នេរ ខណៈដែលបច្ចុប្បន្ននេះគឺមានត្រឹមតែការតភ្ជាប់តាមផ្លូវអាកាសនិងផ្លូវគោកតែប៉ុណ្ណោះ ។
នេះគឺជាផែនការដ៏មានមហិច្ឆតារបស់កម្ពុជា ហើយពិតជាសក្តិសមបំផុតនៅក្នុងការចំណាយថវិកាដល់ទី ១,៧ពាន់លានដុល្លារធ្វើការកសាងព្រែកជីកដែលមានលក្ខណៈទំនើបនិងមាននិរន្តភាព គឺព្រែកជីកហ្វូណនតេជោឡើងមកនេះ ។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនក្នុងពេលអញ្ជើញជាអធិបតីប្រកាសតែងតាំង ឋានន្តរស័ក្តិមន្ត្រីបច្ចេកទេសជាន់ខ្ពស់ នៃក្របខណ្ឌមន្ត្រីបច្ចេកទេសជាន់ខ្ពស់ ជាប្រធានមន្ទីរសាធារណការ និងដឹកជញ្ជូនខេត្តសៀមរាប ថ្មីៗកន្លងទៅនេះ បានលើកឡើងថា ក្រសួងមានមហិច្ឆតាចង់ឱ្យមានការធ្វើដំណើរពីខេត្តសៀមរាប ទៅកាន់តំបន់សមុទ្រតែម្ដង តាមរយៈព្រែកជីកហ្វូណនតេជោ ខណៈគម្រោងនេះកំពុងតែអនុវត្តទៅតាមផែនការ ហើយនៅពេលព្រែកជីកធ្វើរួចហើយ យើងអាចតភ្ជាប់ពីទន្លេទៅកាន់តំបន់សមុទ្របាន។
នាឱកាសនោះដែរ លោកក៏បានបន្តថា នេះជាការគិតគូអភិវឌ្ឍផ្លូវទឹកនេះ ដែលនឹងនាំប្រទេសកម្ពុជាក្លាយទៅជាប្រទេសដែលមានចំណូលខ្ពស់នៅឆ្នាំ២០៥០ តាមរយៈការធ្វើឱ្យវិស័យសាធារណការ និងដឹកជញ្ជូន កាន់តែមានភាពប្រទាក់ក្រឡា ភ្ជាប់ពីទីប្រជុំជនទៅទីជនបទ និងកាន់តែបង្កភាពងាយស្រួលដល់ពលរដ្ឋក្នុងការធ្វើដំណើរ ក៏ដូចជាផ្តល់ជម្រើសកាន់តែច្រើនសម្រាប់ពលរដ្ឋ ។
ចាប់តាំងពីរដ្ឋាភិបាលកម្ពុជាបានចាប់ផ្តើមជាផ្លូវការបើកការដ្ឋានព្រែកជីកហ្វូណនតេជោ នាថ្ងៃទី៥ ខែសីហា ឆ្នាំ២០២៤មក តម្រាយផ្លូវនៃការបើកការដ្ឋានព្រែកមានប្រវែងសរុប១៨០ គីឡូម៉ែត្រឆ្លងកាត់ខេត្តចំនួន៤ គឺ ខេត្តកណ្តាល ខេត្តតាកែវ ខេត្តកំពត និងខេត្តកែប គឺកំពុងតែបោះជំហានសន្សឹមៗ។
នាយករដ្ឋមន្ត្រីកម្ពុជា កាលពីថ្ងៃទី ២២ ខែកក្កដា ទើបតែបានដឹកនាំកិច្ចប្រជុំត្រួតពិនិត្យ និងតាមដានវឌ្ឍនភាពនៃការអនុវត្តគម្រោងការកសាងព្រែកជីកជាប្រវត្តិសាស្ត្រនេះ ស្របពេលដែលគេដឹងថា គម្រោងនេះ នឹងបិទបញ្ចប់ដំណើរការចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីព្រែកជីកហ្វូណនតេជោ នៅក្នុងរង្វង់ថ្ងៃទី២៥ កក្កដាចុងសប្ដាហ៍នេះ។
មកដល់ពេលនេះ គម្រោងព្រែកជីកហ្វូណននេះជាការវិនិយោគរួមគ្នារវាងក្រុមហ៊ុនខ្មែរដែលមានទុនវិនិយោគចំនួន ៥១%និងក្រុមហ៊ុនចិន CRBC ចំនួន ៤៩%ក្នុងរូបភាពសាងសង់ ប្រតិបត្តិការ និងផ្ទេរ ដោយគ្រោងបញ្ចប់ការសាងសង់ឲ្យរួចរាល់នៅឆ្នាំ ២០២៨ខាងមុខ។
សរុបទៅគម្រោងនេះគឺជាគម្រោងដ៏មហិមាមួយដែលកម្ពុជាបានកំណត់គោលដៅឲ្យចេញជាលទ្ធផល ទុកជាកំណត់ហេតុប្រចាំសតវត្សរ៍ទី២១ ។ ក្រោយពេលដែលវាបញ្ចាប់ គម្រោងនេះ នឹងក្លាយជា គម្រោងដែលនឹងអាចធ្វើឲ្យចរាចរណ៍តាមផ្លូវទឹកដែលជាមធ្យោបាយដឹកជញ្ជូនតម្លៃថោកបំផុតមួយគឺអាចមានសភាពកាន់តែមមាញឹក ។ យើងក៏រំពឹងផងដែរថា គម្រោងទាំងនេះនឹងធ្វើឲ្យកម្ពុជា អាចសម្រេចបាននូវផែនការលើកកម្ពស់អនុត្តរភាពនៃវិស័យដឹកជញ្ជូននៅក្នុងប្រទេសកាន់តែជោគជ័យ ។ វានឹងជួយកាត់បន្ថយរយៈពេល ចម្ងាយ និងតម្លៃនៃការដឹកជញ្ជូននាពេលបច្ចុប្បន្ន ការបង្កើតតំបន់ពាណិជ្ជកម្ម និង មជ្ឈមណ្ឌលភស្តុភារកម្ម ការអភិវឌ្ឍផែរណបថ្មីៗជាច្រើន។ គម្រោងនេះក៏នឹងពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វដើម្បី ជួយគាំទ្រដល់ការអភិវឌ្ឍសេដ្ឋកិច្ចកម្ពុជាផងដែរ ៕
ចែករំលែកព័តមាននេះ