លោក ត្រាំ ប្រកាសអំពីកិច្ចព្រមព្រៀងពាណិជ្ជកម្មដ៏ធំសម្បើមជាមួយប្រទេសជប៉ុន
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី២២ ខែកក្កដា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី២២ ខែកក្កដា ឆ្នាំ២០២៥ បានប្រកាសថា សហរដ្ឋអាមេរិកបានយល់ព្រមលើកិច្ចព្រមព្រៀងពាណិជ្ជកម្ម ដែលលោកហៅថា កិច្ចព្រមព្រៀងពាណិជ្ជកម្មដ៏ធំសម្បើមជាមួយប្រទេសជប៉ុន ដែលជាដៃគូពាណិជ្ជកម្មដ៏ធំបំផុតមួយរបស់ខ្លួន។ នេះបើតាមប្រភពពីសារព័ត៌មាន BBC និង CNN បានចេញផ្សាយ ។
លោក ត្រាំ បានប្រកាសនៅក្នុងការបង្ហោះលើប្រព័ន្ធផ្សព្វផ្សាយសង្គមថា កិច្ចព្រមព្រៀងនេះនឹងនាំឱ្យប្រទេសជប៉ុនវិនិយោគលើទឹកប្រាក់៥៥០ពាន់លានដុល្លារនៅអាមេរិក និងបង់ពន្ធចំនួន ១៥%។ លោកបានបន្ថែមថា ជប៉ុននឹងបើកទ្វារសេដ្ឋកិច្ចរបស់ខ្លួន សម្រាប់ទំនិញអាមេរិករួមមាន រថយន្ត រថយន្តដឹកទំនិញ អង្ករ និងផលិតផលកសិកម្មមួយចំនួនផ្សេងទៀត។
លោក ត្រាំ ក៏បានប្រកាសផងដែរថា កិច្ចព្រមព្រៀងពាណិជ្ជកម្មជាមួយសហភាពអឺរ៉ុបនឹងត្រូវបានប្រកាសនៅថ្ងៃពុធនេះ ស្របពេលកិច្ចព្រមព្រៀងជាច្រើនទៀត ក៏នឹងត្រូវប្រកាសនៅក្នុងពេលឆាប់ៗខាងមុខនេះផងដែរ។
នាយករដ្ឋមន្ត្រីជប៉ុន លោក Shigeru Ishiba បានស្វាគមន៍ចំពោះកិច្ចព្រមព្រៀងនេះ ប៉ុន្តែលោកថា លោកត្រូវការសិក្សាលម្អិតបន្ថែមទៀត។ ថ្លែងទៅកាន់អ្នកសារព័ត៌មាននៅថ្ងៃទី២៣ ខែកក្កដា ឆ្នាំ២០២៥ នាយករដ្ឋមន្ត្រីជប៉ុនបានឱ្យដឹងដូច្នេះថា «ចំពោះអ្វីដែលត្រូវសម្រេចពីលទ្ធផលនៃការចរចានោះ ខ្ញុំមិនអាចបញ្ជាក់ជូនបានទេ រហូតទាល់តែយើងបញ្ចប់ការត្រួតពិនិត្យយ៉ាងយកចិត្តទុកដាក់នូវព័ត៌មានលម្អិតនៃការចរចា និងកិច្ចព្រមព្រៀង»។
គួរររំលឹកថា នៅក្នុងលិខិតផ្ញើទៅកាន់ប្រទេសជប៉ុនក្នុងខែនេះ លោក ត្រាំ បានប្រកាសយកពន្ធ ២៥% លើទំនិញជប៉ុន ដែលនឹងចូលជាធរមាននៅថ្ងៃទី១ ខែសីហា ឆ្នាំ២០២៥ ប្រសិនបើមិនមានកិច្ចព្រមព្រៀងពាណិជ្ជកម្មថ្មីបានកើតឡើង។ នោះគឺជាការកើនឡើង១% ពីអត្រាចាស់ ២៥% ដែលលោកបានប្រកាស កាលពីថ្ងៃទី២ ខែមេសា កន្លងទៅ។ អត្រាពន្ធគយកាលពីខែមេសា ដែលរួមបញ្ចូលពន្ធលើដៃគូពាណិជ្ជកម្មអាមេរិកជាច្រើននៅទូទាំងពិភពលោក ត្រូវបានផ្អាករយៈពេល៩០ថ្ងៃ បន្ទាប់ពីភាពចលាចលទីផ្សារទូទាំងពិភពលោក ក៏ដូចជាទុកពេលសម្រាប់ការចរចាកិច្ចព្រមព្រៀងពាណិជ្ជកម្មថ្មី។
ក្រៅពីសម្ពាធពីកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក លោក Ishiba ក៏កំពុងស្ថិតក្រោមសម្ពាធក្នុងការចុះចេញពីតំណែង បន្ទាប់ពីគណបក្សសេរីប្រជាធិបតេយ្យរបស់លោក (LDP) បានបាត់បង់សំឡេងភាគច្រើននៅក្នុងសភាជាន់ខ្ពស់របស់ជប៉ិន នៅក្នុងការបោះឆ្នោតកាលពីចុងសប្តាហ៍មុន ដ្បិតគណបក្សរបស់លោកបានបាត់បង់ភាគច្រើន រួចហើយនៅក្នុងសភាជាន់ទាប កាលពីឆ្នាំមុន៕
ចែករំលែកព័តមាននេះ