ស្វីស ៖ FIFA បានសម្រេចដកឈ្មោះក្រុមដែលធ្លាប់ឈ្នះម្ចាស់ជើងឯកពានរង្វាន់ FIFA Club World Cup កាលពីមុនៗទាំងអស់ ដោយសហព័ន្ធក្បាលម៉ាស៊ីនកីឡាបាល់ទាត់ពិភពលោកមួយនេះ…
ស្វីស ៖ FIFA បានសម្រេចដកឈ្មោះក្រុមដែលធ្លាប់ឈ្នះម្ចាស់ជើងឯកពានរង្វាន់ FIFA Club World Cup កាលពីមុនៗទាំងអស់ ដោយសហព័ន្ធក្បាលម៉ាស៊ីនកីឡាបាល់ទាត់ពិភពលោកមួយនេះ បានប្រកាសថា ក្រុមតោខៀវ Chelsea គឺជាក្រុមដំបូងគេបង្អស់ក្នុងប្រវត្តិសាស្ត្រ ដែលឈ្នះជើងឯកពានរង្វាន់ក្លិបលំដាប់ពិភពលោកមួយនេះ ផ្អែកលើការកែប្រែរូបមន្តប្រកួតថ្មីនៅឆ្នាំ២០២៥ ដោយបង្កើនក្រុមចូលរួមដល់ ៣២ ។
ពានរង្វាន់ FIFA Club World Cup ត្រូវបានបង្កើតឡើងដំបូងនៅឆ្នាំ២០០០ ដោយធ្វើការប្រកួតរៀងរាល់ឆ្នាំ ប៉ុន្តែត្រូវបានអាក់ខានប៉ុន្មានឆ្នាំ មុនពេលចាប់ផ្តើមឡើងវិញនៅឆ្នាំ២០០៥ ដោយមាន៦ក្រុមចូលរួម ហើយបង្កើនដល់៧ក្រុមចាប់តាំងពីឆ្នាំ២០០៧ (លើកលែងតែឆ្នាំ២០២០ មានតែ៦ក្រុម)។ លុះឆ្នាំ២០២៤ ពុំមានការប្រកួតឡើយ តែជំនួសមកនូវការប្រកួតពានរង្វាន់ FIFA Intercontinental Cup។
ទោះយ៉ាងណាក៏ដោយ នៅឆ្នាំ២០២៥ ការប្រកួតក៏ធ្វើឡើងវិញ ដោយសហរដ្ឋអាមេរិកជាម្ចាស់ផ្ទះ ហើយក៏ជាការប្រកួតដំបូងបង្អស់ដែល FIFA បានកែប្រែរូបមន្តប្រកួតដោយបង្កើនសមាសភាពក្រុមចូលរួមរហូតដល់ ៣២ក្រុម ហើយនឹងត្រូវប្រកួតរៀងរាល់៤ឆ្នាំម្តងជំនួសវិញ។ FIFA បានចំណាយប្រាក់ជាង២ពាន់លានដុល្លារអាមេរិកសម្រាប់ការប្រកួតនោះ ហើយបានអះអាងទៀតថា ពួកគេរកប្រាក់បានដល់៤ពាន់លានដុល្លារ នៅពេលដែលការប្រកួតឆ្នាំនេះបានបញ្ចប់ ដោយក្រុមតោខៀវ Cheslea ជាម្ចាស់ជើងឯក បន្ទាប់ពីបំបាក់ក្រុមសេដ្ឋីបារាំង PSG លទ្ធផល ៣ទល់នឹង០ កាលពីថ្ងៃទី១៣ ខែកក្កដា កន្លងទៅ។
យ៉ាងណាមិញ សេចក្តីប្រកាសមួយពី FIFA កាលពីថ្ងៃទី២០ ខែកក្កដា ឆ្នាំ២០២៥ បានបញ្ជាក់ថា រាល់ការប្រកួត FIFA Club World Cup ពីមុនៗ នឹងត្រូវបានកំណត់ថាជាការប្រកួតពានរង្វាន់ Intercontinental Cup ដូច្នេះមានន័យថា ក្រុមដែលធ្លាប់ឈ្នះជើងឯកពីមុនទាំងអស់ លែងមានឈ្មោះជាម្ចាស់ជើងឯកពានរង្វាន់ FIFA Club World Cup ទៀតហើយ ប៉ុន្តែពួកគេជាក្រុមឈ្នះពានរង្វាន់ FIFA Intercontinental Cup ជំនួសវិញ លើកលែងតែ Chelsea ដែលត្រូវបានកំណត់ជាក្រុមឈ្នះជើងឯក FIFA Club World Cup ដំបូងគេបង្អស់ក្នុងប្រវត្តិសាស្ត្រ តាមរយៈការអនុវត្តរូបមន្តប្រកួតថ្មីរបស់ FIFA ចាប់ពីឆ្នាំ២០២៥តទៅ។
គួរបញ្ជាក់ជូនថា ចាប់ពីត្រូវបានបង្កើតឡើងដំបូងនៅឆ្នាំ២០០០ ពានរង្វាន់ FIFA Club World Cup មានម្ចាស់ជើងឯកចំនួន ១២ ក្រុម ដោយរួមមាន Real Madrid ឈ្នះ៥ដង Barcelona ៣ដង Corinthians, Bayern Munich និង Chelsea ២ដង ខណៈដែល Liverpool, São Paulo, Internacional, AC Milan, Manchester United, Inter Milan និង Manchester City ឈ្នះ១ដងដូចគ្នា៕ ដកស្រង់ ៖ Tribuna និងSPORTbible
ចែករំលែកព័តមាននេះ