ទីក្រុងបាងកក៖ កាលពីព្រឹកមិញ នារីជនជាតិថៃវ័យ១៩ឆ្នាំម្នាក់ជានិស្សិតសាកលវិទ្យាល័យនៃខេត្តនគររាជសីមាដោយសារតែមានអារម្មណ៍តានតឹងខ្លាំង និងស្ត្រែសខ្លាំងពេកក៏សម្រេចចិត្តលោតពីលើជាន់ទី៥នៃអគារដ៏ខ្ពស់ស្កឹមស្កៃមួយ។ ជាលទ្ធផល នាងមិនបានបាត់បង់ជីវិតដូចការប៉ុនប៉ងនោះទេ។ ប៉ុន្តែក៏បានរងរបួសគ្រាំក្នុងយ៉ាងធ្ងន់ធ្ងរស្ទើរស្លាប់ស្ទើររស់ផងដែរ។
សមត្ថកិច្ចបានទទួលដំណឹងនេះនៅម៉ោង៨:៣០ព្រឹក។ មានគេទូរស័ព្ទប្រាប់ថាមនុស្សម្នាក់ធ្លាក់ពីលើអគារនៃបរិវេណសាកលវិទ្យាល័យមួយនៅក្នុងទីរួមខេត្តនេះ។ គេបានបញ្ជូនក្រុមអ្នកជួយសង្គ្រោះដើម្បីចុះទៅកន្លែងកើតហេតុជាបន្ទាន់។ ហេតុការណ៍នេះកើតឡើងនៅប៉ែកខាងជើងនៃអគារមហាវិទ្យាល័យគ្រប់គ្រងធុរកិច្ច។ អគារនេះមានកម្ពស់៥ជាន់។
និស្សិតឆ្នាំទី២ម្នាក់នោះកំពុងសិក្សាមុខវិជ្ជាគ្រប់គ្រងទូទៅ។ បន្ទាប់ពីលោតទម្លាក់ខ្លួនពីលើអគារនោះ គេឃើញថានាងនៅមានដង្ហើមដក ហើយនៅដឹងខ្លួន (មិនសន្លប់)។ នៅពេលនោះ នាងធ្លាក់ទៅលើវាលស្មៅ។ នាងអាចនិយាយតិចៗដើម្បីស្នើសុំទឹកផឹក និងព្យាយាមចាកចេញពីទីនោះ។ ក្រុមអ្នកជួយសង្គ្រោះប្រាប់ថាជើងទាំង២របស់នាងបាក់ហើយ ហើយត្រូវកាត់ចេញ។
មិនតែប៉ុណ្ណោះ នាងហាក់ដូចជាឈឺដើមទ្រូងយ៉ាងខ្លាំង។ ដូច្នេះ គេក៏បញ្ជូននាងទៅសង្គ្រោះបន្ទាន់នៅមន្ទីរពេទ្យ។ មិត្តភក្ដិម្នាក់របស់នារីរូបនោះប្រាប់អាជ្ញាធរថានាងមានប្រវត្តិកើតជំងឺធ្លាក់ទឹកចិត្ត និងធ្លាប់ទៅព្យាបាលនៅមន្ទីរពេទ្យថែមទៀតផង។ សាក្សីនៅនឹងកន្លែងកើតហេតុប្រាប់ថាពួកគេឃើញនារីរូបនោះដើរឡើងទៅសំយាបជាន់ទី៥នៃអគារ ហើយក៏លោតចុះមកតែម្ដង។
គ្រូពេទ្យប្រាប់ថាកាលពីមុននេះ នាងសន្លប់ធំ និងស្ថិតនៅក្នុងបន្ទប់សង្គ្រោះបន្ទាន់។ ប៉ុន្តែឥឡូវនេះ ស្ថានភាពរបួសបានប្រសើរជាងមុនបន្តិច។ នាងអាចដឹងខ្លួនពីសន្លប់ និងអាចឆ្លើយសំណួរបាន។ គេបានបញ្ជូននាងទៅបន្ទប់វះកាត់ដើម្បីព្យាបាលមុខរបួសជាច្រើនកន្លែងដូចជាបាក់ជើង, បាក់ឆ្អឹងត្រគាក និងប្រេះសួត។ ក្រុមគ្រូពេទ្យនៅតែបន្តតាមដានស្ថានភាពមុខរបួសរបស់នាងដោយយកចិត្តទុកដាក់។ ខាងលើនេះជាការដកស្រង់ប្រភពពីសារព័ត៌មានបាងកកប៉ុស្តិ៍៕
ចែករំលែកព័តមាននេះ