កីឡាករ សុខ ធី ឈ្នះខ្សែក្រវាត់ ISKA ប្រភេទទម្ងន់៦០គីឡូក្រាម
រាជធានីភ្នំពេញ ៖ ទីបំផុត! កីឡករ សុខ ធី ធ្វើបានសម្រេចហើយ ក្នុងការយកឈ្នះកីឡាករ Samuel Olyas…
រាជធានីភ្នំពេញ ៖ ទីបំផុត! កីឡករ សុខ ធី ធ្វើបានសម្រេចហើយ ក្នុងការយកឈ្នះកីឡាករ Samuel Olyas ដោយពិន្ទុ នៅលើសង្វៀនប៉ុស្តិ៍ទូរទស្សន៍អប្សារា កាលពីថ្ងៃអាទិត្យ ទី២០ ខែកក្កដា ឆ្នាំ២០២៥ ដោយដណ្ដើមបានជាម្ចាស់ខ្សែក្រវាត់ ISKA KUNKHMER WORLD CHAMPION ក្នុងប្រភេទទម្ងន់៦០គីឡូគ្រាម ។
សម្រាប់ការប៉ះគ្នាជាមួយអ្នកប្រដាល់សញ្ជាតិអេស្ប៉ាញ លើកនេះ មិនមែនជារឿងធម្មតានោះទេ ទោះបីជានៅត្រឹមទឹកទី១ សុខ ធី បានបើកការវាយសម្រុកធ្វើឱ្យ Samuel Olyas ដួលទាំងជំហរក្ដី ប៉ុន្តែក៏ត្រូវកីឡាករអេស្ប៉ាញម្នាក់នេះ វាយបុកត្រូវមួយកែងស្ដាំ ចំក្រោមភ្នែកឆ្វេង បណ្ដាលឱ្យបែកចេញឈាមហូរស្រោចពេញមុខ។ គូនេះ បើកការវាយសម្រុករកគ្នាកាន់តែខ្លាំង ក្រោយពីម្នាក់ ត្រូវវាយឱ្យដួល និងម្នាក់ទៀត ត្រូវមួយកែង រួចមក។ ជាពិសេសកីឡាករ Samuel Olyas ដែលមានប្រៀបខាងកំពស់ជាង ដូចជារៀងមើលស្រាលពេក គេព្យាយាមដើរចូលវាយទៅលើកីឡាករ សុខ ធី ទាំងកម្រោល ។
ចូលដល់ទឹកទី២ សុខ ធី ដើរចូលបោះជង្គង់ហោះ ទៅលើកីឡាករ Samuel Plyas ទាំងជំហរ តែត្រូវកីឡាករអេស្ប៉ញ ម៉ាត់បកសងវិញដូចព្យុះ សរុបសេចក្ដីទៅគូនេះ ប្រកួតគ្នាវាយសម្រុកដាក់គ្នា ធ្វើឱ្យអ្នកទស្សនាស្រែកហ៊ោកងរំពងពេញសង្វៀនតែម្ដង។ ម្យ៉ាងវិញទៀតសុខ ធី ទោះបីជាគេចាញ់ខាងកម្ពស់បន្តិចមែន តែស្នៀតជើងរបស់គេទាត់ចូលកញ្ចឹង.កពេញៗ តែត្រូវ Plyas តាមដេញវាយធ្វើឱ្យ សុខ ធី ដកថយបណ្ដើរវាយបកសងវិញ ដោយស្នៀតកណ្ដាប់ដៃ ធ្វើឱ្យកីឡាករ Olyas ដកថយស្ទើរតែមិនទាន់ ។
គូនេះ ប្រកួតគ្នា ៥ទឹកពេញ តែកម្លាំងគេទាំងពីរ នៅពេញដូចគ្នា។ ចប់ការប្រកួតទឹកទី៥ សុខ ធី សរសើរថ្វីដៃកីឡាករ Samulel Olyas ថា ល្អខ្លាំងណាស់ ជាពិសេសស្នៀតកែង និងស្នៀតកណ្ដាប់ដៃ។ តែ សុខ ធី ដែលជាកីឡាករជើងខ្លាំង លំដាប់ប្រទេស ប្រភេទទម្ងន់៦០គីឡូក្រាមម្នាក់ដែរ មិនធ្វើឱ្យអ្នកគាំទ្រ ខកចិត្តនោះទេ ។
កីឡាករ សុខ ធី ឈ្នះខ្សែក្រវាត់លើកនេះ គឺជាខ្សែក្រវាត់ទី២ហើយ ក្នុងឆ្នាំ២០២៥ ដែលគេដណ្ដើមបាន ព្រោះកាលពីខែមុន គេដណ្ដើមបាន១គ្រឿង ពីកីឡាករ ពេជ្រ សម្បត្តិ ៕
ចែករំលែកព័តមាននេះ