ទីក្រុងដាកា៖ យន្តហោះ១គ្រឿងរបស់កងទ័ពអាកាសបង់ក្លាដែសធ្លាក់ទៅលើបរិវេណសាលារៀន និងសាកលវិទ្យាល័យពេទ្យមួយកន្លែងនៃរដ្ឋធានីដាកាបណ្ដាលឱ្យស្លាប់មនុស្ស១៩នាក់ និងរបួស១៦៤នាក់។ នេះជាប្រភេទយន្តហោះហ្វឹកហ្វឺនកងទ័ពដែលជួបប្រទះនឹងបញ្ហាបច្ចេកទេសបន្ទាប់ពីហោះឡើងបានតែបន្តិចប៉ុណ្ណោះ។ យន្តហោះម៉ាកអែហ្វ៧ប៊ីជីអាយ (F-7 BGI) ១គ្រឿងនេះបានចាកចេញពីមូលដ្ឋានទ័ពអាកាសគួរមីតូឡា (Kurmitola)នៃរដ្ឋធានីដាកានៅម៉ោង១:០៦រសៀល។
មិនយូរប៉ុន្មាន យន្តហោះក៏ចាប់ផ្ដើមមានបញ្ហាមិនស្រួល។ អ្នកនាំពាក្យយោធាបង់ក្លាដែសថ្លែងថាអាកាសយានិកសម្រេចចិត្តកាច់ចង្កូតយន្តហោះដើម្បីបត់ក្បាលថយក្រោយវិញ។ គាត់ព្យាយាមធ្វើយ៉ាងណាបើយន្តហោះបានជ្រុលធ្លាក់ហើយកុំឱ្យធ្លាក់ទៅលើផ្ទះរបស់ប្រជាជនដែលមានមនុស្សរស់នៅច្រើន។ ទោះបីគាត់ខំប្រឹងយ៉ាងណាក៏ដោយក៏ជាការឥតប្រយោជន៍។ នៅទីបំផុត យន្តហោះធ្លាក់ទៅលើអគារកម្ពស់២ជាន់នៃសាកលវិទ្យាល័យម៉ាលស្តូន (Milestone)។
អ្នកនាំពាក្យដដែលនេះប្រាប់ថាអាកាសយានិកក៏បានស្លាប់នៅក្នុងហេតុការណ៍នោះផងដែរ។ ឥឡូវនេះ គេបានបង្កើតគណៈកម្មការស៊ើបអង្កេតសំណុំរឿងនេះហើយ។ យន្តហោះដែលកើតហេតុខាងលើនេះជាផលិតផលរបស់ប្រទេសចិនដែលបំពាក់បច្ចេកវិទ្យាទំនើបចុងក្រោយ។ បង់ក្លាដែសបានកុម្ម៉ង់ទិញយន្តហោះនេះចំនួន១៦គ្រឿងកាលពីឆ្នាំ២០១១ និងទទួលបានគ្រប់ចំនួននៅឆ្នាំ២០១៣។
តាមរយៈវីឌីអូរបស់សាក្សីដែលថតបានក្រោយពេលធ្លាក់ គេឃើញថាយន្តហោះឆេះនៅក្នុងភ្លើងដ៏សន្ធោសន្ធៅក្បែរវាលខ្មៅមួយកន្លែង និងបញ្ចេញផ្សែងហុយទ្រលោមទៅលើអាកាស។ អ្នករស់នៅម្ដុំនោះបានត្រឹមសម្លឹងមើលពីចម្ងាយតែប៉ុណ្ណោះព្រោះពួកគេមិនអាចជួយអ្វីបានឡើយ។ នៅក្នុងចំណោមជនរងគ្រោះដែលស្លាប់ក៏មានកូនសិស្សថ្នាក់ទីបីម្នាក់ផងដែរ។មនុស្សបីនាក់នៅក្នុងសាលានោះអាយុ១២ឆ្នាំម្នាក់ ១៤ឆ្នាំម្នាក់ និង៤០ឆ្នាំម្នាក់ត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ។
សាក្សីម្នាក់ជាគ្រូបង្រៀននៅសាលានេះប្រាប់ថាខ្លួនទៅដឹកកូនពីសាលាត្រឡប់ទៅផ្ទះវិញ។ ទើបតែជិះដល់របងសាលា ខ្លួនទទួលអារម្មណ៍ថាមានអ្វីកើតឡើងនៅក្រោយខ្នងរបស់ខ្លួន។ រំពេចនោះស្រាប់តែខ្លួនស្ដាប់ឮសំឡេងផ្ទុះយ៉ាងកងរំពងតែម្ដង។ នៅពេលខ្លួនក្រឡេកមើលទៅក្រោយឃើញភ្លើងឆេះយ៉ាងសន្ធោសន្ធៅ និងផ្សែងខ្មៅងងឹតហោះហើរទៅលើអាកាស៕
ចែករំលែកព័តមាននេះ