ខេត្តព្រះសីហនុ ៖ ព្យុះទីហ្វុងឈ្មោះវីផា(Wipha) បានបោកបក់បំផ្លាញផ្ទះពលរដ្ឋមួយចំនួន និងដើមឈើមួយចំនួនតាមផ្លូវជាតិលេខ៤ ក្នុងឃុំជើងគោ ស្រុកព្រៃនប់ ខេត្តព្រះសីហនុ ។ មន្ត្រីមូលដ្ឋានបានឲ្យដឹងថា…
ខេត្តព្រះសីហនុ ៖ ព្យុះទីហ្វុងឈ្មោះវីផា(Wipha) បានបោកបក់បំផ្លាញផ្ទះពលរដ្ឋមួយចំនួន និងដើមឈើមួយចំនួនតាមផ្លូវជាតិលេខ៤ ក្នុងឃុំជើងគោ ស្រុកព្រៃនប់ ខេត្តព្រះសីហនុ ។
មន្ត្រីមូលដ្ឋានបានឲ្យដឹងថា ដំបូលផ្ទះប្រជាពលរដ្ឋនៅក្នុងឃុំជើងគោ ចំនួន១១ខ្នងផ្ទះ រងការខូចខាតរបើកស័ង្កសី និងមានខ្លះបាក់រលំខូចខាតដោយសារឥទ្ធិពលព្យុះ កាលពីថ្ងៃទី២០ ខែកក្កដា ឆ្នាំ២០២៥ ។
បើតាមសមត្ថកិច្ចឲ្យដឹងថា នៅម៉ោងជាង៣រសៀលថ្ងៃទី២១ ខែកក្កដា ឆ្នាំ២០២៥នេះ ដោយសារឥទ្ធិពលចំហាយព្យុះវីផា បោកបក់មកខ្លាំងមួយប្រាវ បានធ្វើឲ្យដើមឈើតាមផ្លូវជាតិលេខ៤ បានដួលរលំចំនួន២កន្លែង នៅម្តុំស្ពានព្រៃនប់ ក្នុងឃុំ/ស្រុកព្រៃនប់ ខេត្តព្រះសីហនុ ដើមឈើមួយដើមបានដួលរលំកាត់ទទឹងមកលើផ្លូវជាតិ។ ហើយមួយករណីទៀត នៅផ្លូវជាតិលេខ៤ដែរ ចន្លោះគីឡូម៉ែត្រលេខ១៨៣-១៨៤ ភូមិចុងអូរ ឃុំសំរុង ស្រុកព្រៃនប់ ដើមឈើមួយដើមបានដួលរលំលើតូបលក់កាហ្វេជាប់ចិញ្ចើមផ្លូវជាតិ បណ្តាលឲ្យខូចខាតរបស់របរក្នុងតូបមួយចំនួន តែមិនមានមនុស្សរងគ្រោះនោះទេ ដោយសារម្ចាស់អ្នកលក់បានចេញពីតូបទៅក្នុងផ្ទះខាងក្រោយតូបកាហ្វេនោះ ។
នៅក្នុងឃុំទួលទទឹង ស្រុកព្រៃនប់ ខេត្តព្រះសីហនុ តាមសេចក្តីរាយការណ៍បឋម ក៏មានផ្ទះរបស់ប្រជាពលរដ្ឋចំនួន១២ គ្រួសារផងដែរ ដែលបានរងគ្រោះប៉ើងដំបូលស័ង្កសី ដែលបង្កឡើងដោយចំហាយខ្យល់ជុះពីផ្សារនេះផងដែរ ។
សូមបញ្ជាក់ថា កាលពីព្រឹកម្សិលមិញ ក៏មានដើមឈើ១ដើម បានដួលរលំកាត់ទទឹងមកលើផ្លូវជាតិលេខ៤ដែរ នៅគីឡូម៉ែត្រ១៨២-១៨៣ ស្ថិតក្នុងភូមិ/ឃុំសំរុង ស្របពេល ដែលមានភ្លៀងខ្យល់កន្ត្រាក់ខ្លាំង។ យ៉ាងណា មិនបង្កគ្រោះថ្នាក់អ្វីដល់អ្នកធ្វើដំណើរលើផ្លូវឡើយ ហើយភ្លាមៗ សមត្ថកិច្ចអាជ្ញាធរមូលដ្ឋានបានកាត់ប្រមូលចេញភ្លាមៗ ដើម្បីកុំឲ្យស្ទះចរាចរណ៍។
បើតាមការព្យាករណ៍ធាតុអាកាសពីក្រសួងជំនាញថា ព្យុះវីផានេះ នឹងបន្តរហូតដល់ថ្ងៃទី២៣ ខែកក្កដា ឆ្នាំ២០២៥ ។ ក្នុងនោះអាជ្ញាធរអំពាវនាវឲ្យបងប្អូនប្រជាពលរដ្ឋបង្កើនការប្រុងប្រយ័ត្ន ៕
ចែករំលែកព័តមាននេះ