រាជធានីភ្នំពេញ ៖ អាជ្ញាធររាជធានីភ្នំពេញ ស្នើឱ្យបុរសឈរបន្ទោបង់(បត់ជើងតូច)នៅទីសាធារណៈ ត្រង់ចំណុចហួសច្រក់ចេញមុខព្រលានយន្តហោះអន្តរជាតិភ្នំពេញ ក្នុងខណ្ឌពោធិ៍សែនជ័យ ចូលខ្លួនមកសុំទោសជាសាធារណៈ នៅសាលាខណ្ឌពោធិ៍សែនជ័យ ឬនៅសាលារាជធានីភ្នំពេញ ក្រោយពីវីដេអូបុរសរូបនេះ…
រាជធានីភ្នំពេញ ៖ អាជ្ញាធររាជធានីភ្នំពេញ ស្នើឱ្យបុរសឈរបន្ទោបង់(បត់ជើងតូច)នៅទីសាធារណៈ ត្រង់ចំណុចហួសច្រក់ចេញមុខព្រលានយន្តហោះអន្តរជាតិភ្នំពេញ ក្នុងខណ្ឌពោធិ៍សែនជ័យ ចូលខ្លួនមកសុំទោសជាសាធារណៈ នៅសាលាខណ្ឌពោធិ៍សែនជ័យ ឬនៅសាលារាជធានីភ្នំពេញ ក្រោយពីវីដេអូបុរសរូបនេះ បង្កឱ្យមានការរិះគន់ពេញបណ្តាញសង្គមយ៉ាងខ្លាំង ។
ការរិះគន់នេះ បានផ្ទុះឡើងនៅថ្ងៃទី២១ ខែកក្កដា ឆ្នាំ២០២៥នេះ ដោយមានអ្នកខ្លះលើកឡើងថា «តាមទីសាធារណៈ បើទ្រាំមិនបាន គួរណាស់តែ រកកន្លែងបាំងបិទអោយអស់លទ្ធភាព កុំមកឈរទាំងននលគកបែបនេះ ទីតាំងនៅហួសច្រក់ចេញមុខព្រលានយន្តហោះអន្តរជាតិភ្នំពេញបន្តិច ។
តាមរយៈវីដេអូ ដែលគេថតបានបុរសម្នាក់នេះ អាចមានអាយុចាប់ពីជាង៣០ឆ្នាំ ទៅជាង៤០ឆ្នាំ ជិះរថយន្តមួយគ្រឿង ម៉ាកកាម៉ារី ពណ៌ស ស៊េរី៩៦ ពាក់ស្លាក់លេខ ភ្នំពេញ 2A-3483 បានឈប់រថយន្ត អែបកៀនលើទ្រូងផ្លូវ រួចចុះទៅបត់ជើងតូចដាក់លើសួន ដោយមិនខ្មាសអៀន ខណៈដែលមានអ្នកដំណើរច្រើន មមាញឹកបំផុត ។
ជុំវិញសកម្មភាពមិនល្អភ្នែកនៅតាមទីសាធារណៈនេះ លោកស្រី ដោ សម្ផស្ស នាយិការរងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានស្នើឱ្យអ្នកបត់ជើងតូចនៅតាមទីសាធារណៈរូបនេះ ចូលខ្លួនមកសុំទោសជាសាធារណៈ នៅសាលាខណ្ឌពោធិ៍សែនជ័យ ឬនៅសាលារាជធានីភ្នំពេញ ដើម្បីកុំឱ្យថ្ងៃក្រោយធ្វើសកម្មភាពមិនល្អបែបនេះទៀត ហើយក៏ដើម្បីជាសារមួយព្រមានដល់អ្នកផ្សេងទៀតកុំឱ្យអនុវត្តនៅគំរូអាក្រក់បែបនេះនៅថ្ងៃក្រោយផងដែរ។ យើងដឹងហើយថា រាជធានីភ្នំពេញរបស់យើង ទទួលបានជ័យលាភី ជារាជធានីបញ្ចប់ការបន្ទោបង់ពាសវាលពាសកាល កម្រិតខ្ពស់ (ODF+) លើកទី១ ដោយជោគជ័យរួចហើយ កាលពីចុងខែខែវិច្ឆិកា ឆ្នាំ២០២៤ កន្លងមកនេះ ។
គួររំលឹកថា រាជធានីភ្នំពេញ ទទួលបានជ័យលាភីជារាជធានីបញ្ចប់ការបន្ទោបង់ពាសវាលពាសកាល កម្រិតខ្ពស់ (ODF+) លើកទី១ ដោយជោគជ័យ ដោយគ្រប់ខ្នងផ្ទះ មានបង្គន់អនាម័យប្រើប្រាស់ផ្ទាល់ខ្លួន និងមានបង្គន់សាធារណៈប្រើប្រាស់រួមគ្នា ដោយពិធីប្រកាសជ័យលាភីនោះ ត្រូវបានធ្វើឡើងកាលពីថ្ងៃទី២៧ ខែវិច្ឆិកា ឆ្នាំ២០២៤ នៅសណ្ឋាគារ រ៉េស៊ីដង់សុខាភ្នំពេញ ក្រោមអធិបតីភាព ឯកឧត្ដម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ។ ដើម្បីទីក្រុងស្អាត គឺចាប់ផ្ដើមពីយើងទាំងអស់គ្នា ម្នាក់ៗជួយសម្អាតថែរក្សាអនាម័យ បរិស្ថានបានល្អកុំបន្ទោបង់ពាសវាលពាសកាល ចេះទុកដាក់សំរាមឱ្យបានល្អ កុំយកទៅបោះចោលក្នុងលូ ឬប្រឡាយទឹកនាំឱ្យស្ទះ៕
ចែករំលែកព័តមាននេះ