ទីក្រុងកៀវ៖ កាលពីយប់មិញរុស្ស៊ីវាយប្រហារទ្រង់ទ្រាយធំតាមដែនអាកាសមិនធ្លាប់មាននារយៈពេលជាច្រើនខែចុងក្រោយនេះ។ ការវាយប្រហារកើតឡើងត្រឹមតែប៉ុន្មានម៉ោងប៉ុណ្ណោះមុនពេលអង់គ្លេស និងអាល្លឺម៉ង់ធ្វើជាសហប្រធានរៀបចំកិច្ចប្រជុំតាមអនឡាញដើម្បីពិនិត្យមើលផែនការរបស់លោកត្រាំដែលចង់បញ្ជូនអាវុធទៅអ៊ុយក្រែន និងតម្រូវឱ្យអឺរ៉ុបចេញលុយ។
អ៊ុយក្រែនថ្លែងថារុស្ស៊ីបញ្ជូនដ្រូនម៉ាកសាហ៊ីត និងដ្រូនបញ្ឆោតសរុប៤២៦គ្រឿង រួមទាំងមីស៊ីល២៤គ្រឿងទៅវាយប្រហារ។ ដ្រូន២០០គ្រឿងត្រូវអ៊ុយក្រែនបាញ់ទម្លាក់, ២០៣គ្រឿងត្រូវអគ្គិសនីឆក់វង្វេងវង្វាន់ ឥតដឹងទិសតំបន់។ នៅសល់ក្រៅពីនេះអាចហោះទៅវាយប្រហារគោលដៅចុងក្រោយបានសម្រេច។
លោកហ្សេឡិនស្គីថ្លែងថាការវាយប្រហារយប់មិញសម្លាប់មនុស្ស២នាក់ និងរបួស១៥នាក់។ ក្នុងនោះក៏មានកុមារអាយុ១២ឆ្នាំផងដែរ។ នៅសង្កាត់សេវឆឹនគីវស្គី (Shevchenkivskyi) នៃរដ្ឋធានីកៀវ ដ្រូន១គ្រឿងវាយប្រហារច្រកចេញចូលនៃស្ថានីយរថភ្លើងក្រោមដី។ ស្ថានីយនេះជាកន្លែងលាក់ខ្លួនពួនអាត្មារបស់អ្នករស់នៅទីក្រុងកៀវនៅពេលមានការវាយប្រហារម្ដងៗ។
តាមរយៈវីឌីអូដែលគេបង្ហោះលើបណ្ដាញសង្គម គេឃើញស្ថានីយរថភ្លើងនេះហ៊ុមព័ទ្ធដោយផ្សែងយ៉ាងខ្មៅងងឹត។ មនុស្សរាប់សិបនាក់ស្ថិតនៅក្នុងស្ថានីយនោះ។ អភិបាលក្រុងកៀវ លោកវីតាលី គ្លីតឆ្កូ (Vitalii Klitschko) ថ្លែងថាអាជ្ញាធរត្រូវតែបញ្ចូលខ្យល់ទៅក្នុងស្ថានីយនោះដើម្បីឱ្យមានអុកស៊ីហ្សែនគ្រប់គ្រាន់។ កាលពីយប់មិញ ទីតាំងដែលរងការវាយប្រហារខ្លាំងជាងគេគឺសង្កាត់ដានីតស្គី (Darnytskyi)។ សាលាមត្តេយ្យ, ផ្សារទំនើប និងឃ្លាំងដាក់ឥវ៉ាន់នៅទីនោះឆេះយ៉ាងសន្ធោសន្ធៅ។
យន្តហោះអ៊ុយក្រែន៤គ្រឿងបើកជ្រុលចូលដែនអាកាសប្រទេសរ៉ូម៉ានីអស់ជាច្រើននាទី។ ប៉ុន្តែមិនបានបង្កការហានិភ័យចំពោះសន្តិសុខជាតិរ៉ូម៉ានី ឬអាយុជីវិតរបស់ជនស៊ីវិលប្រទេសនេះទេ។ ក្រសួងការពារជាតិរ៉ូម៉ានីថ្លែងថាហេតុការណ៍នោះកើតឡើងនៅពេលអ៊ុយក្រែនប្រញាប់ជម្លៀសយន្តហោះពីមូលដ្ឋានទ័ពអាកាសនៅពេលរុស្ស៊ីចាប់ផ្ដើមវាយប្រហារប្រាវៗ។
កាលពីយប់មិញ អ៊ុយក្រែនក៏ពន្លះរុស្ស៊ីមួយអស់ដៃផងដែរ។ នៅពេលរំលងអធ្រាត្របន្តិច ដ្រូនរបស់អ៊ុយក្រែនទាំងហ្វូងហោះទៅវាយប្រហាររុស្ស៊ី។ ការវាយប្រហារបន្តកើតឡើងរហូតដល់ម៉ោង៦ព្រឹក។ អ្នករស់នៅរដ្ឋធានីម៉ូស្គូគ្មានបានដេកពួនអ្វីទេព្រោះរវល់នឹងការរំខាននៃស្នូរគ្រាប់កាំភ្លើងយន្ត, សំឡេងវាយប្រហាររបស់ដ្រូន និងសំឡេងផ្ទុះផូងផាំងជាហូរហែ។
នេះជាការវាយប្រហារខ្នាតធំរបស់អ៊ុយក្រែនជាលើកដំបូងចាប់តាំងពីប្រេសិតពិសេសរបស់លោកត្រាំ លោកខេតខេឡក់ (Keith Kellogg) បំពេញទស្សនកិច្ចនៅអ៊ុយក្រែនកាលពីថ្ងៃចន្ទសប្ដាហ៍មុន។ រុស្ស៊ីទុកមុខឱ្យប្រេសិតរូបនេះដែរ និងមិនវាយប្រហារទីក្រុងកៀវទេកាលពីអំឡុងពេលដែលលោកបំពេញទស្សនកិច្ចរយៈពេលមួយសប្ដាហ៍នោះ។
តាមមើលទៅ, ការវាយប្រហារខ្លាំងៗដល់ម្លឹងប្រហែលជាបស្ចិមប្រទេសត្រូវតែបញ្ជូនប្រព័ន្ធដែនអាកាសទៅឱ្យអ៊ុយក្រែនជាប្រញាប់ហើយទើបបាន។ អ្នកវិភាគយល់ថាសន្ធឹកនៃការវាយប្រហារមិនថមថយទេព្រោះរុស្ស៊ីកំពុងតែពន្លឿនការផលិតដ្រូនក្នុងស្រុកឱ្យបានច្រើន។ នេះមិនទាន់គិតទៅដល់ដ្រូនអត្តឃាតម៉ាកសាហ៊ីតដែលផ្ដល់ដោយអ៊ីរ៉ង់ផងទេ។ ដូច្នេះ ភាគីទាំង២នឹងវាយប្រហារគ្នាមួយអស់ដៃជាមិនខាន។ ទោះបីលោកត្រាំទុកពេល៥០ថ្ងៃឱ្យរុស្ស៊ីពិចារណាថាត្រូវទទួលយកបទឈប់បាញ់ ឬបន្តវាយប្រហារគ្នាយ៉ាងណាកក្ដី។ ត្រាំព្រមានដាក់ទណ្ឌកម្មសេដ្ឋកិច្ច និងដំឡើងពន្ធទៅលើទំនិញរបស់រុស្ស៊ី។
នៅក្នុងផែនការរបស់លោកត្រាំដែលប្រកាសកាលពីសប្ដាហ៍មុន ពួកអឺរ៉ុបនឹងដកហូតអាវុធពីក្នុងឃ្លាំងប្រគល់ទៅឱ្យអ៊ុយក្រែនតាមរយៈអង្គការណាតូ។ បន្ទាប់មក ពួកគេនឹងកុម្ម៉ង់ទិញអាវុធពីអាមេរិកដើម្បីដាក់បំពេញនៅក្នុងឃ្លាំងវិញ។ រដ្ឋមន្ត្រីការពារជាតិអង់គ្លេសអាចនឹងជំរុញឱ្យក្រុមសម្ព័ន្ធមិត្តឆ្លៀតឱកាស៥០ថ្ងៃនេះពង្រឹងសមត្ថភាពការពារជាតិរបស់អ៊ុយក្រែន។
បើរុស្ស៊ីយល់ព្រមចូលតុចរចាជាការល្អ។ ប៉ុន្តែបើរុស្ស៊ីនៅតែបន្តធ្វើសង្គ្រាម ពេលនោះអ៊ុយក្រែនក៏អាចត្រៀមខ្លួនទប់ទល់បានគ្រាន់បើជាងមុនដែរ។ អាល្លឺម៉ង់ថ្លែងថាខ្លួនត្រៀមលុយទិញប្រព័ន្ធការពារដែនអាកាសម៉ាកផេទ្រាតបាន២គ្រឿង ហើយអាចនឹងដកយកពីឃ្លាំងរបស់ខ្លួនខ្លះដើម្បីផ្សែផ្សំគ្នាបញ្ជូនទៅឱ្យអ៊ុយក្រែន។ ប៉ុន្តែគេត្រូវការពេលវេលាច្រើនដែរដើម្បីដឹកជញ្ជូនទៅដល់គោលដៅ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី (AP) និងប្រភពដទៃទៀត៕
ចែករំលែកព័តមាននេះ