បរទេស ៖ យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters កាលពីព្រឹកថ្ងៃទី២១ ខែកក្កដា ឆ្នាំ២០២៥ បានឱ្យដឹងថា តម្លៃមាសបានកើនឡើង ស្របពេលដែលតម្លៃប្រេងឆៅមានការប្រែប្រួលតិចតួចប៉ុណ្ណោះ។…
បរទេស ៖ យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters កាលពីព្រឹកថ្ងៃទី២១ ខែកក្កដា ឆ្នាំ២០២៥ បានឱ្យដឹងថា តម្លៃមាសបានកើនឡើង ស្របពេលដែលតម្លៃប្រេងឆៅមានការប្រែប្រួលតិចតួចប៉ុណ្ណោះ។
តម្លៃមាសបានកើនឡើងនៅព្រឹកថ្ងៃទី២១ ខែកក្កដា ឆ្នាំ២០២៥ ចំពេលប្រាក់ដុល្លារបានធ្លាក់ចុះ ខណៈដែលបណ្តាវិនិយោគិនបានបន្តតាមដានការអភិវឌ្ឍន៍ក្នុងការចរចាពាណិជ្ជកម្មរបស់សហរដ្ឋអាមេរិក រួមទាំងកិច្ចប្រជុំគោលនយោបាយធនាគារកណ្តាលអាមេរិកដែលបានគ្រោងទុកសម្រាប់សប្តាហ៍ក្រោយ។
តម្លៃមាសអន្តរជាតិបានកើនឡើង ០,៦% នៅក្នុងតម្លៃ ៣ ៣៦៨ដុល្លារក្នុង១អោន ឬស្មើនឹង ៤ ០៥៧ដុល្លារក្នុង១តម្លឹង គិតត្រឹមម៉ោង ១:៤០នាទីរសៀលថ្ងៃទី២១ ខែកក្កដា ឆ្នាំ២០២៥ (ម៉ោងនៅកម្ពុជា) ខណៈមាសរបស់សហរដ្ឋអាមេរិកបានកើនឡើង ០,៥% នៅក្នុងតម្លៃ ៣ ៣៧៦ដុល្លារក្នុង១អោន ឬ ៤ ០៦៧ដុល្លារក្នុង១តម្លឹង។
លោក Tim Waterer ប្រធានផ្នែកវិភាគទីផ្សារពាណិជ្ជកម្មក្រុមហ៊ុន KCM បានថ្លែងថា ប្រាក់ដុល្លារអាមេរិកបានចាប់ផ្តើមធ្លាក់ចុះនៅសប្តាហ៍នេះ ជំរុញឱ្យតម្លៃមាសកើនឡើង ជាមួយនឹងកាលបរិច្ឆេទកំណត់ពន្ធគយរបស់សហរដ្ឋអាមេរិក ដែលកាន់តែខិតជិតដល់ថ្ងៃផុតកំណត់នៃថ្ងៃទី១ ខែសីហា ឆ្នាំ២០២៥ ដ្បិតគ្មានកិច្ចព្រមព្រៀងពាណិជ្ជកម្មថ្មីណាមួយលេចឡើង ដូច្នេះមាសទំនងជាចាប់ផ្តើមបង្កើនតម្លៃរបស់ខ្លួនឆ្ពោះទៅរកកម្រិត ៣ ៤០០ដុល្លារក្នុង១អោន (៤ ០៩៦ក្នុង១តម្លឹង) ហើយប្រហែលអាចជាកើនលើសពីនេះទៅទៀត»។
សន្ទស្សន៍ប្រាក់ដុល្លារអាមេរិកបានធ្លាក់ចុះ ០,១% ធៀបនឹងរូបិយប័ណ្ណជាគូប្រជែងរបស់ខ្លួន ដោយធ្វើឱ្យមាសមានតម្លៃថោកសម្រាប់អ្នកកាន់រូបិយប័ណ្ណផ្សេងទៀត។ វិនិយោគិនកំពុងសម្លឹងមើលការវិវឌ្ឍន៍នៃការចរចាពាណិជ្ជកម្មនៅមុនថ្ងៃផុតកំណត់ថ្ងៃទី១ ខែសីហារបស់ប្រធានាធិបតីអាមេរិក លោក ដូណាល់ ត្រាំ (Donald Trump) ខណៈដែលរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick នៅតែមានសុទិដ្ឋិនិយមចំពោះការឈានដល់កិច្ចព្រមព្រៀងជាមួយសហភាពអឺរ៉ុប។
កិច្ចប្រជុំនៅចុងសប្តាហ៍នេះ ធនាគារកណ្តាលអ៊ឺរ៉ុបត្រូវបានរំពឹងថានឹងរក្សាអត្រាការប្រាក់ថេរនៅកម្រិត ២,០% បន្ទាប់ពីការកាត់បន្ថយជាច្រើនលើក។ កាលពីសប្តាហ៍មុន លោក Christopher Waller ទេសាភិបាលធនាគារកណ្តាលសហព័ន្ធបានលើកឡើងថា លោកនៅតែជឿជាក់ថា ធនាគារកណ្តាលអាមេរិកគួរតែកាត់បន្ថយអត្រាការប្រាក់នៅឯកិច្ចប្រជុំគោលនយោបាយរបស់ខ្លួន នៅសប្តាហ៍ក្រោយ។
ក្រឡេកទៅតម្លៃប្រេងឆៅឯណោះវិញ បើតាមប្រភពពី Reuters បានឱ្យដឹងថាមានការប្រែប្រួលតិចតួចនៅថ្ងៃទី២១ ខែកក្កដា ឆ្នាំ២០២៥ ខណៈដែលពាណិជ្ជករវាយតម្លៃពីផលប៉ះពាល់នៃទណ្ឌកម្មថ្មីរបស់អឺរ៉ុបលើការផ្គត់ផ្គង់ប្រេងរបស់រុស្ស៊ី ដោយពួកគេក៏ព្រួយបារម្ភអំពីពន្ធគយដែលអាចធ្វើឱ្យតម្រូវការប្រេងឥន្ធនៈធ្លាក់ចុះ ស្របពេលដែលបណ្តាអ្នកផលិតនៅមជ្ឈិមបូព៌ាកំពុងបង្កើនផលិតកម្មរបស់ខ្លួន។
តម្លៃប្រេងឆៅ Brent ដែលជាប្រេងស្តង់ដារអន្តរជាតិបានកើនឡើង៦សេន នៅក្នុងតម្លៃ ៦៩,៣៤ដុល្លារក្នុង១បារ៉ែល គិតត្រឹមម៉ោង១០ព្រឹកថ្ងៃទី២១ ខែកក្កដា (ម៉ោងនៅកម្ពុជា) បន្ទាប់ពីធ្លាក់ចុះ ០,៣៥% កាលពីថ្ងៃសុក្រ។ ចំណែកប្រេងឆៅអាមេរិក West Texas Intermediate (WTI) មានតម្លៃ ៦៧,៥១ដុល្លារក្នុង១បារ៉ែល ពោលកើនឡើង ១៧សេន បន្ទាប់ពីការធ្លាក់ចុះ ០.៣០%។
សហភាពអឺរ៉ុប (EU) កាលពីថ្ងៃសុក្របានអនុម័តកញ្ចប់ទណ្ឌកម្មលើកទី១៨ ប្រឆាំងនឹងប្រទេសរុស្ស៊ីជុំវិញជម្លោះក្នុងប្រទេសអ៊ុយក្រែន ដែលបានកំណត់គោលដៅផងដែរទៅលើក្រុមហ៊ុន Nayara Energy របស់ឥណ្ឌា ដែលជាអ្នកនាំចេញផលិតផលប្រេងចម្រាញ់ពីប្រេងឆៅរបស់រុស្ស៊ី។ ទណ្ឌកម្មរបស់ EU បានអនុវត្តតាមការគំរាមកំហែងរបស់លោក ត្រាំ ក្នុងការដាក់ទណ្ឌកម្មលើបណ្តាអ្នកទិញការនាំចេញប្រេងរុស្ស៊ី លុះត្រាតែរុស្ស៊ីយល់ព្រមលើកិច្ចព្រមព្រៀងសន្តិភាពក្នុងរយៈពេល៥០ថ្ងៃ។
អ្នកវិភាគពីសាជីវកម្មសេវាធនាគារ និងហិរញ្ញវត្ថុ ING Group របស់ប្រទេសហូឡង់បានមើលឃើញថា ទីផ្សារប្រេងទំនងមិនរងឥទ្ធិពលដោយប្រសិទ្ធភាពនៃទណ្ឌកម្មទាំងនេះទេ ទោះជាយ៉ាងណាក៏ដោយ ផ្នែកនៃកញ្ចប់ទណ្ឌកម្មទំនងជាមានឥទ្ធិពលលើទីផ្សារធំបំផុតគឺ EU បានដាក់បម្រាមនាំចូលផលិតផលប្រេងចម្រាញ់ដែលកែច្នៃពីប្រេងឆៅរុស្ស៊ីនៅក្នុងប្រទេសទីបី។ ប៉ុន្តែច្បាស់ណាស់ វានឹងពិបាកក្នុងការត្រួតពិនិត្យការបញ្ចូលប្រេងឆៅទៅក្នុងរោងចក្រចម្រាញ់ប្រេងនៅក្នុងប្រទេសទាំងនោះ។
ជាមួយគ្នានោះផងដែរ អ្នកនាំពាក្យក្រសួងការបរទេសរបស់អ៊ីរ៉ង់ នៅថ្ងៃទី២១ ខែកក្កដា បានថ្លែងថា ប្រទេសអ៊ីរ៉ង់ ដែលជាប្រទេសផលិតប្រេងដ៏សំខាន់មួយ ហើយដែលកំពុងរងទណ្ឌកម្មនោះ នឹងត្រូវរៀបចំកិច្ចចរចាពាក់ព័ន្ធនឹងកម្មវិធីនុយក្លេអ៊ែរ នៅទីក្រុងអ៊ីស្តង់ប៊ុល ប្រទេសតួកគី ជាមួយចក្រភពអង់គ្លេស បារាំង និងអាល្លឺម៉ង់ នៅថ្ងៃទី២៥ ខែកក្កដា នោះបន្ទាប់ពីមានការព្រមានដោយប្រទេសអឺរ៉ុបទាំងបីថា ការបរាជ័យក្នុងការបន្តការចរចានឹងនាំឱ្យទណ្ឌកម្មអន្តរជាតិត្រូវបានដាក់ឡើងវិញលើអ៊ីរ៉ង់៕
ចែករំលែកព័តមាននេះ