ទីក្រុងវ៉ាស៊ីនតោន៖ ព្រលឹងចុងសក់ដោយសារឧបទ្ទវហេតុពាក់ព័ន្ធនឹងយន្តហោះទៀតហើយ។ លើកនេះកើតឡើងទៅលើយន្តហោះរបស់ក្រុមហ៊ុនអាកាសចរណ៍ដែលតា អ៊ែឡាញ (Delta Airlines) របស់អាមេរិក។ យន្តហោះនេះត្រូវចាកចេញដំណើរពីទីក្រុងឡូសអេនជើឡេស (Los Angeles)…
ទីក្រុងវ៉ាស៊ីនតោន៖ ព្រលឹងចុងសក់ដោយសារឧបទ្ទវហេតុពាក់ព័ន្ធនឹងយន្តហោះទៀតហើយ។ លើកនេះកើតឡើងទៅលើយន្តហោះរបស់ក្រុមហ៊ុនអាកាសចរណ៍ដែលតា អ៊ែឡាញ (Delta Airlines) របស់អាមេរិក។ យន្តហោះនេះត្រូវចាកចេញដំណើរពីទីក្រុងឡូសអេនជើឡេស (Los Angeles) រដ្ឋកាលីហ្វ័រញ៉ា ឆ្ពោះទៅទីក្រុងអាត្លង់តា (Atlanta) រដ្ឋចរចា (Georgia)។
ចាកចេញពីអាកាសយានដ្ឋានបានតែបន្តិចប៉ុណ្ណោះស្រាប់តែមានភ្លើងឆេះម៉ាស៊ីនយន្តហោះខាងឆ្វេង។ នៅពេលមើលស្ថានការណ៍មិនស្រួលដូច្នេះ អាកាសយានិកក៏ប្រញាប់កាច់ចង្កូតយន្តហោះដើម្បីបត់ក្បាលត្រឡប់ថយក្រោយវិញជាបន្ទាន់។ តាមរយៈវីឌីអូឃ្លីបដែលអ្នកសារព័ត៌មានទទួលបាន គេឃើញថាយន្តហោះឆេះចេញអណ្ដាតភ្លើងយ៉ាងសន្ធោសន្ធៅខ្លាំងគួរសមដែរ។
ប៉ុន្តែលក្ខណៈពិសេសមួយរបស់យន្តហោះនៅត្រង់ថាទោះបីឆេះដល់កម្រិតណាក៏ដោយ យន្តហោះមិនផ្ទុះជាដាច់ខាត កុំឱ្យតែប៉ះទង្គិចនឹងអ្វីមួយ ឬហោះទៅបក់នឹងអ្វីមួយទើបវាផ្ទុះ។ ជាក់ស្ដែង យន្តហោះជប៉ុនឆេះកាលពីដើមឆ្នាំ២០២៤សុខចិត្តឆេះទាល់តែខ្ទេចរហូតដល់ក្លាយជាផេះ។ ចំណែកអ្នកដំណើរអាចជម្លៀសខ្លួនចេញពីយន្តហោះដោយសុវត្ថិភាព។
ករណីយន្តហោះរបស់ដែលតា អ៊ែឡាញ ក្រោយពេលមានភ្លើងឆេះបែបនេះ អាកាសយានិកក៏បញ្ជាយន្តហោះម៉ាកបូអ៊ីង៧៦៧-៤០០នោះក្រឡឹងមួយជុំសិនដើម្បីរកចំណុចដែលត្រូវចុះ។ បន្ទាប់មកចុះចតដោយសុវត្ថិភាព។ ភ្នាក់ងារសង្គ្រោះបន្ទាន់រង់ចាំធ្វើអន្តរាគមន៍រួចជាស្រេច។
អ្នកដំណើរ និងបុគ្គលិកបម្រើការនៅលើយន្តហោះចុះដល់ដី និងសុខសប្បាយគ្រប់ៗគ្នា គ្មាននរណាម្នាក់រងរបួសទេ។ អាជ្ញាធរអាកាសចរណ៍ស៊ីវិលអាមេរិកចាប់ផ្ដើមបើកការស៊ើបអង្កេតដើម្បីរកមូលហេតុពិតប្រាកដនៅពីក្រោយការឆេះម៉ាស៊ីនយន្តហោះនេះ។ ខាងលើនេះជាការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ