ទីក្រុងហាណូយ៖ ចំនួនអ្នកស្លាប់ដោយសារហេតុការណ៍លិចកាណូតទេសចរណ៍វៀតណាមនៅឆកសមុទ្រហាឡុងកាលពីល្ងាចថ្ងៃសៅរ៍នោះឥឡូវនេះកើនឡើងដល់៣៨នាក់ហើយគិតតែសាកសពដែលរកឃើញ។ ជួយសង្គ្រោះបាន១ចំនួន។ ដូច្នេះនៅបាត់ខ្លួន១ចំនួនទៀត មិនដឹងថាពួកគាត់មានសុខទុក្ខយ៉ាងណាទេ។ ខាងលើនេះជាការថ្លែងរបស់រដ្ឋាភិបាលវៀតណាម។
ក្រុមអ្នកជួយសង្គ្រោះបន្តធ្វើការយ៉ាងដុតដៃដុតជើងឥតបានឈប់សម្រាក ឬដេកពួនអ្វីទេតាំងពីយប់មិញរហូតមកដល់ពេលនេះ។ ទន្ទឹមនឹងនោះ ខ្យល់ព្យុះវីផាក៏កាន់តែបោកបក់ជិតដល់តំបន់មាត់សមុទ្រវៀតណាមភាគខាងជើងផងដែរ។ រដ្ឋាភិបាលវៀតណាមបានចេញសេចក្ដីប្រកាសមានសេចក្ដីជាអាទិ៍ថា «មនុស្សយ៉ាងតិច៣៨នាក់ដែលជិះនៅលើកាណូតនោះបានស្លាប់ហើយ និងដប់នាក់ត្រូវបានជួយសង្គ្រោះ»។
ទីភ្នាក់ងារព័ត៌មានវៀតណាមរាយការណ៍ថាអ្នកទេសចរសរុប៤៨នាក់សុទ្ធតែជាជនជាតិវៀតណាមទាំងអស់។ ក្នុងនោះក៏មានក្មេងៗប្រហែលម្ភៃនាក់ផងដែរ។ សារព័ត៌មានវៀតណាមអ៊ិចប្រែស (Vietnam Express) រាយការណ៍ថាអាជ្ញាធរបានប្រើប្រាស់ក្រុមអ្នកជួយសង្គ្រោះបីរយនាក់នៅក្នុងការស្វែងរកអ្នកបាត់ខ្លួនលើកនេះ។ ពួកគេមានសមាសភាពមកពីក្រុមល្បាតព្រំដែន, កងទ័ពជើងទឹក, នគរបាល និងក្រុមអ្នកជំនាញមុជទឹក។
ថ្វីដ្បិតនៅពេលនេះនៅលើផ្ទៃសមុទ្ររាងស្ងប់ខ្យល់ និងទឹករលកធម្មតាឡើងវិញ ប៉ុន្តែផ្ទៃមេឃមិនសូវស្រឡះប៉ុន្មានទេ ជាហេតុធ្វើឱ្យពិបាកមើលបានឆ្ងាយ និងធ្វើឱ្យប្រតិបត្តិការជួយសង្គ្រោះក៏រាងពិបាកសម្បើមណាស់ដែរ។ គេបានស្រង់កាណូតនោះមកលើគោកហើយ។ សូមរំលឹកថាហេតុការណ៍នេះកើតឡើងកាលពីរសៀលថ្ងៃសៅរ៍។ ពោលគឺបន្ទាប់ពីខ្យល់ព្យុះវីផាបក់ដល់សមុទ្រចិនខាងត្បូង។
សារព័ត៌មានវៀតណាមអ៊ិចប្រែសចុះផ្សាយថាកាណូតនេះរងការបោកបក់ពីខ្យល់កន្ត្រាក់មួយវឹបក៏លិចភ្លឹបទៅក្នុងទឹក និងផ្ងារជើងឡើងលើតែម្ដង។ អាជ្ញាធរសង្កេតឃើញថានៅពេលកើតហេតុនោះស្ថានភាពពោរពេញភាពអ័ព្ទអួណាស់។ ពេលនោះមានខ្យល់បក់ខ្លាំង, មានភ្លៀងធ្លាក់ខ្លាំង និងមានរន្ទះបាញ់ផូងផាំង។ អាជ្ញាធរសូមបញ្ជាក់ថាបាតុភូតទាំងនេះមិនមែនជាឥទ្ធិពលនៃព្យុះវីផាទេ។ វាជាការប្រមូលផ្ដុំខ្យល់កន្ត្រាក់នៅលើផ្ទៃមេឃភាគខាងជើងតែប៉ុណ្ណោះ។ ប៉ុន្តែគេដាក់ជាចម្ងល់ថាម៉េចបានឃើញស្ថានភាពបែបហ្នឹងហើយនៅតែចុះកាណូតទៀត?
ឆកសមុទ្រហាឡុងស្ថិតនៅចម្ងាយ២រយគីឡូម៉ែត្រភាគឦសានរដ្ឋធានីហាណូយ។ ទីនេះជាតំបន់ទេសចរណ៍ដ៏ពេញនិយម និងទាក់ទាញភ្ញៀវក្នុងមួយឆ្នាំៗរាប់ម៉ឺននាក់។ ការធ្វើដំណើរកម្សាន្តតាមទូក ឬកាណូតជាវិធីដ៏ពេញនិយម។ ដោយឡែក ខ្យល់ព្យុះវីផានឹងរំកិលខ្លួនទៅរកបណ្ដាខេត្តនៅមាត់សមុទ្រវៀតណាមខាងជើងនាដើមសប្ដាហ៍ក្រោយ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ