សម្តេចតេជោ ប្រាប់លោកថាក់ ស៊ីន មិនចង់និយាយជាមួយតាំង ពីកូនស្រីប្រហើ.នមកម្ល៉េះ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានបញ្ជាក់ថា សូមផ្តាំទៅ ថាក់ស៊ីនវិញថា ខ្ញុំទេ…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានបញ្ជាក់ថា សូមផ្តាំទៅ ថាក់ស៊ីនវិញថា ខ្ញុំទេ ដែលជាអ្នកមិនចង់និយាយជាមួយតាំងពីកូនស្រីប្រហើនមកម្ល៉េះ ។
សម្តេចតេជោ បានសរសេរលើបណ្តាញសង្គម នៅថ្ងៃទី២០ កក្កដា ឆ្នាំ២០២៥ថា« ខ្ញុំសូមផ្តាំទៅថាក់ ស៊ីនវិញថា ខ្ញុំទេ ដែលជាអ្នកមិនចង់និយាយជាមួយថាក់ស៊ីន ចាប់តាំងពីកូនស្រីរបស់អ្នកឯងព្រហើន និងមើលងាយខ្ញុំមក ហើយលើសពីនោះ ខ្ញុំក៏មិនចង់និយាយជាមួយអ្នកធ្លាប់មានទោស ហើយក៏នឹងកំពុងត្រៀមជាប់ទោសបន្ថែមទៀតផងដែរ ដូច្នេះកុំលើកតម្កើងខ្លួនឯងខ្ពស់ពេក ខ្ញុំនិយាយជាមួយអ្នកឯងនាំចង្រៃខ្លួនទេ !។
សម្តេចលើកឡើងថា ជាការកត់សម្គាល់របស់ខ្ញុំ ចាប់តាំងពីថាក់ ស៊ីន ចូលពាក់ព័ន្ធនយោបាយថៃមក ថៃមានភាពច្របូកច្របល់ខ្លាំង តាំងពីមុនរដ្ឋប្រហារ២០០៦មកម្លេះ ហើយខ្ញុំក៏មិនចង់លើករឿងអ្នកឯងប្រមាថធ្ងន់ៗលើព្រះមហាក្សត្រថៃដែរ វាជាសម្តីអាក្រក់អាក្រីខ្លាំងពេក មិនសមខ្ញុំនិយាយទេ នាំតែធ្វើឲ្យប៉ះពាល់ដល់ព្រះជេស្តាព្រះមហាក្សត្រថៃ ប៉ុន្តែគ្នាអ្នកឯង ទទួលស្គាល់ថាពិតជាមានមែន ។
ជាមួយគ្នានោះដែរ សម្តេចតេជោ បានលើកឡើងថាប៉ុន្មានថ្ងៃមុន លោកនិយាយថា អ្នកដឹកនាំកម្ពុជាពុំមានសីលធម៍ទេ ។ នេះជាការប្រមាថដ៏ធ្ងន់ធ្ងរ ដូចកូនស្រីលោកប្រមាថមេដឹកនាំកម្ពុជាថា គ្មានវិជ្ជាជីវៈដែលជាមូលហេតុធ្វើឲ្យមានការខឹងសម្បារពីប្រជាជនកម្ពុជា ។
សម្តេចគូសបញ្ជាក់ថា ៖ ខ្ញុំចង់សួរលោកថា បើខ្ញុំអត់សីលធម៍ ហេតុអ្វីបានជាលោកពឹងពាក់ខ្ញុំ អស់រយៈពេល១៩ឆ្នាំ (2006-2025) លោកស្តាប់ការទូន្មានរបស់ខ្ញុំ រហូតហៅខ្ញុំថាជាមេ០១ ។
លោកចាំបានទេ ការរៀបចំគណបក្សភឿថៃ ដើម្បីចូលរួមបោះឆ្នោតឆ្នាំ២០១១ ក្រៅពីគំនិតមួយចំនួន នៅមានទ្រឹស្តីមួយ គឺ (ថាក់ស៊ីនគិត ភឿថៃធ្វើ) នោះហើយជាទ្រឹស្តី ហ៊ុន សែន ដែលខ្ញុំគួរតែរំលឹកដល់លោក ។ នៅមានរឿងច្រើនណាស់ ដែលខ្ញុំមិនទាន់និយាយរាប់ទាំងការតែងតាំងសមាជិករដ្ឋាភិបាលផងដែរ ។
សម្តេចបានបន្ថែមបន្ថែមថា ការចោទប្រកាន់ថា លោកដឹកនាំបក្សភឿថៃ គឺជារឿងពិតរាប់ទាំងការក្បត់ជាមួយភូមិចាយថៃ គឺជាគំនិតលោកទាំងអស់ មិនមែនជាគំនិតអ៊ុងអ៊ីនទេ ៕
ចែករំលែកព័តមាននេះ