ខេត្តព្រៃវែង ៖ ដីចំណីទន្លេមេគង្គ-ទន្លេតូច នឹងដីបឹងចាក់ខ្លាញ់ដែលជាដីសម្បត្តិសាធារណ:របស់រដ្ឋត្រូវបានបុគ្គលអ្នកមានលុយមានអំណាច ព្រមទាំងជនអន្តោរប្រវេសន៍វៀតណាមរំលោភបំពានយកធ្វើជាកម្មសិទ្ធសាងសង់សំណង់រឹងបានយ៉ាងអានាធិបតេយ្យ បែរជាអាជ្ញ្ញាធរទទួលកបន្ទុកជាអ្នករក្សាការពារដីសាធារណ:របស់រដ្ឋ រក្សាភាពស្ងៀមស្ងាត់មិនមានវិធានការទប់ស្កាត់ឬបង្ក្រាបឡើយ ។ ដីចំណីថ្នល់ជាតិលេខ៣១០និងដីចំណីទន្លេមេគង្គត្រង់ចំណុចភូមិព្រែកខ្សាយ(ក) ឃុំព្រែកខ្សាយ(ក) ស្រុកពាមរក៍ ខេត្តព្រៃវែង ត្រូវឈ្មួញអ្នកមានលុយមានអំណាចរំលោភបំពានយកធ្វើជាកម្មសិទ្ធ បុកគ្រឹះសាងសង់សំណង់រឹងមាំចូលរហូតដល់ទន្លេមេគង្គ ។ ដីចំណីផ្លូវជាតិលេខ៣១០និងដីចំណីទន្លេតូចនិងដីបឹងចាក់ខ្លាញ់ក្នុងឃុំពាមរក៍និងឃុំបាបោង ស្រុកពាមរក៍ ត្រូវជនអន្តោរប្រវេសន៍វៀតណាមសង់សំណង់រឹងមាំយ៉ាងណែនតាន់តាប់។
ប្រភពព៌តមានសូមមិនបញ្ចេញឈ្មោះបានលួចខ្សឹបប្រាប់អោយដឹងថា ជនអន្តោរប្រវេសន៍វៀតណាមទាំងនេះ ពីដើមឡើយគឺសុទ្ធតែរស់នៅលើទូកប្រកបមុខរបរនេសាទត្រីចិញ្ចឹមជីវិត ប៉ុន្តែឥឡូវឡើងមកសាងសង់ផ្ទះថ្មផ្ទះឈើជីកស្រះចិញ្ចឹមត្រីដូចរុនបាយខុមនៅលើដីសម្បត្តិសាធារណ:របស់រដ្ឋបានដោយរលូនគ្មានដែលឃើញអាជ្ញាធរសមត្ថកិច្ចឬស្ថាប័នណាមួយចុះទៅហាមឃាត់អោយមានប្រសិទ្ធភាពនោះឡើយ តែបើជនជាតិខ្មែរវិញកុំថាឡើយបុកគ្រឹះធ្វើសំណង់រឹងមាំសូម្បីធ្វើរោងគោ រោងមាន់ទាឬផ្ទះឈើស្នាក់នៅបណ្តោះអាសន្នគឺមិនបានជាដាច់ខាត សង្ស័យគ្នាអត់លុយបុក ។
ប្រភពដដែលបញ្ជាក់បន្ថែមថា ការបណ្តែតបណ្តោយអនុញាតជនអន្តោរប្រវេសន៍វៀតណាមស្នាក់នៅលើដីសាធារណ:របស់រដ្ឋនេះបាន សង្ស័យតែអាជ្ញាធរមូលដ្ឋានទទួលបានលាភសក្ការ:យ៉ាងក្រាស់ក្រែលហើយមើលទៅទើបបានជាសំងំស្ងៀមបែបនេះ ព្រោះជនជាតិវៀតណាមគេមានលុយហើយហ៊ានចំណាយច្រើន តែបើខ្មែរអ្នកក្រវិញគ្មានលុយទេបានតែលើកដៃសំពះសុំតែប៉ុណ្ណោះបានជាអត់ ។
ដោយឡែកសម្រាប់អ្នកសង់សំណង់រឹងមាំនៅលើដីសាធារណ:របស់រដ្ឋភូមិព្រែកខ្សាយ(ក) ឃុំព្រែកខ្សាយ(ក)វិញគឺសុទ្ធសឹងតែអ្នកមានលុយមានអំណាចនៅតំបន់អ្នកលឿងត្រើយខាងកើតជាអ្នកសាងសង់ ហើយកន្លងទៅលោកអភិបាលស្រុកក៍ធ្លាប់បានបញ្ជាក់ប្រាប់អ្នកសារព៌តមានអោយដឹងថា គេបានសុំច្បាប់ដល់ខេត្តធ្វើឃ្លាំងស្តុបទំនិញបណ្តោះអាសន្នមិនប៉ះពាល់ដល់ដីចំណីទន្លេមេគង្គទេ អាជ្ញាធរបានចុះទៅវាស់វែងនិងធ្វើកិច្ចសន្យារួចរាល់ចោលចំណីទន្លេមេគង្គប្រវែង៥០ម៉ែត្រពីច្រាំងទន្លេ តែដល់ពេលអ្នកសារព៌តមានចុះទៅពិនិត្យមើលម្តងទៀត ឃើញថា ថៅឃ្លាំងនោះលួចបុកគ្រឹះពន្លាតការសាងសង់សំណង់រឹងមាំរហូតចូលដល់ក្នុងទឹកទន្លេមេគង្គតែម្តង។
ជុំវិញបញ្ហាជនអន្តោរប្រវេសន៍វៀតណាមសាងសង់សំណង់រឹងនៅលើដីរដ្ឋនេះ លោកមេឃុំពាមរក៍បានប្រាប់អ្នកសារព៌តមានអោយដឹងតាមទូរស័ព្ទកាលពីរសៀលថ្ងៃទី១៩ ខែកក្កដា ឆ្នាំ២០២៥នេះថា លោកបានប្រជុំឯកភាពក្រុមប្រឹក្សាឃុំ សម្រេចអនុញ្ញាតអោយធ្វើតែផ្ទះឈើនិងផ្ទះដែកទេ។ចំណែកលោក កៅ ពិសី អភិបាលស្រុកពាមរក៍ ក៍បានប្រាប់អោយដឹងតាមប្រព័ន្ធតេឡេក្រាមដែរថា គឺអាជ្ញាធរខេត្តបានចេញលិខិតអោយផ្អាកការសាងសង់ហើយ តែបើអ្នកកាសែតថា នៅមានសាងសង់បន្តទៀតរចាំមើលចំណាត់របស់ខេត្តបន្តទៀតសិន ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ