អាណិតណាស់! អតីតតារាកំប្លែង «នាយគ្រោង» ជួបគ្រោះថ្នា.ក់ចរាចរណ៍នៅផ្លូវជាតិលេខ៤
- កំពង់ស្ពឺ
ខេត្តកំពង់ស្ពឺ៖ អតីតតារាកំប្លែងដែលធ្លាប់មានឈ្មោះល្បីក្នុងវិស័យសិល្បៈខ្មែរ គឺ «នាយគ្រោង» ដែលមានឈ្មោះពិត អ៊ុក សំណាង ហៅ ឡាំ សេន អាយុ៧២ឆ្នាំ ត្រូវបានសមត្ថកិច្ចរាយការណ៍ថា បានជួបគ្រោះថ្នាក់ចរាចរណ៍នៅ ចំណុចមុខផ្សារកំពង់ស្ពឺ តាមបណ្ដោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៤៧ទៅ ៤៨ ស្ថិតនៅក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ កាលពីព្រឹកថ្ងៃទី១៣ ខែសីហា ឆ្នាំ២០២៦នេះ ត្រូវបានដឹកបញ្ជូនយកទៅព្យាបាលនៅមន្ទីរពេទ្យបង្អែកខេត្តកំពង់ស្ពឺ។
សមត្ថកិច្ចបាននិយាយដឹងថា លោក អ៊ុក សំណាង ហៅ នាយគ្រោង បានធ្វើដំណើរដោយម៉ូតូម៉ាកហុងដាសេ១២៥ ហើយត្រូវបានបុកជាមួយម៉ូតូមួយគ្រឿងទៀតនៅលើកំណត់ផ្លូវជាតិលេខ៤ បណ្ដាលឲ្យរងរបួសត្រូវបានដឹកបញ្ជូនទៅព្យាបាលភ្លាមៗ។
តាមប្រភពព័ត៌មានឲ្យដឹងថា លោក អ៊ុក សំណាង ហៅ នាយគ្រោង អាយុ៧២ឆ្នាំ រស់នៅក្នុងភូមិត្រពាំងលើក សង្កាត់រការធំ ក្រុងច្បារមន ខេត្តកំពង់ស្ពឺ មានជីវភាពខ្វះខាត និងកំពុងរស់នៅជាមួយកូន។
អ្វីដែលកាន់តែធ្វើឱ្យជីវភាពគ្រួសាររបស់អតីតតារាកំប្លែងរូបនេះជួបការលំបាក គឺភរិយារបស់លោកមានជំងឺ រហូតដល់មិនអាចដើរបានលោក និងភរិយា ក៏មិនមានលំនៅឋានសមរម្យសម្រាប់រស់នៅផងដែរ។ សម្រាប់បងប្អូនដែលធ្លាប់ទស្សនាស្នាដៃសិល្បៈកាលពីអតីតកាល ប្រាកដជានៅចងចាំ «នាយគ្រោង» ដែលធ្លាប់សម្តែងជាមួយតារាល្បីៗ ក្នុងនោះមានលោក ព្រាប សុវត្ថិ និង នាយព្រែក ក្នុងបទ «ភ្លេចសន្យាសាយ័ណ្ហ» ដែលធ្លាប់ធ្វើឱ្យទស្សនិកជនជាច្រើនទទួលបានភាពសប្បាយរីករាយ និងសំណើច។ ដោយសារបច្ចុប្បន្ន «នាយគ្រោង» និងភរិយាកំពុងជួបការលំបាកខ្លាំង សូមសាធារណជន និងសប្បុរសជនមេត្តាចូលរួមអាណិតអាសូរ និងជួយតាមលទ្ធភាព។
មនុស្សដែលធ្លាប់ផ្តល់សំណើច និងសេចក្តីសប្បាយដល់មហាជន ក៏សមនឹងទទួលបានការយកចិត្តទុកដាក់ និងការជួយគាំទ្រ នៅពេលជីវិតជួបការលំបាកផងដែរ៕
ចែករំលែកព័តមាននេះ