លួ.ចកា.ត់ខ្សែភ្លើងក្នុងរោងចិញ្ចឹមជ្រូកមួយកន្លែង ម្ចាស់ប្តឹងនគរបាលឃាត់ខ្លួន
- កំពង់ស្ពឺ
ខេត្តកំពង់ស្ពឺ ៖ យុវជនម្នាក់ត្រូវបានកម្លាំងនគរបាលស្រុកសំរោងទងធ្វើការឃាត់ខ្លួន ខណៈដែលធ្វើសកម្មភាពលួចកាត់ខ្សែភ្លើងពីរោងចិញ្ចឹមជ្រូកមួយកន្លែង ហើយយកទៅលាក់ទុកនៅផ្ទះរបស់ខ្លួន ដើម្បីយកទៅលក់បន្ត។ ប៉ុន្តែត្រូវបានម្ចាស់ដាក់ពាក្យបណ្ដឹងឲ្យសមត្ថកិច្ចឃាត់ខ្លួន។
ការឃាត់ខ្លួនយុវជនសង្ស័យបានការពារវេលាម៉ោង៨និង៣០នាទីយប់ថ្ងៃទី១២ ខែសីហា ឆ្នាំ២០២៦ នៅផ្ទះជនសង្ស័យ ស្ថិតនៅក្នុងភូមិអង្គខ្មៅ ឃុំសំបូរ ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឲ្យដឹងថា÷ កម្លាំងនគរបាលប៉ុស្តិ៍ឃុំសំបូរ បានសហការជាមួយប្រជាការពារភូមិ ធ្វើការឃាត់ខ្លួនឈ្មោះ គូ ណារ៉ុង ភេទប្រុស អាយុ២១ឆ្នាំ មុខរបរមិនពិតប្រាកដ រស់នៅក្នុងភូមិអង្គខ្មៅ ឃុំសំបូរ ស្រុកសំរោងទង ខេត្តកំពង់ស្ពឺ ពាក់ព័ន្ធរឿងលួចកាត់ខ្សែភ្លើងប្រវែងប្រហែល៥០ម៉ែត្រ នៅចំណុចរោងចិញ្ចឹមជ្រូកខាងលិចភូមិអង្គខ្មៅ ដែល ម្ចាស់រោងចិញ្ចឹមជ្រូកមានឈ្មោះ តែម ភី ភេទប្រុស អាយុ៥១ឆ្នាំ រស់នៅក្នុងភូមិអង្គខ្មៅ ឃុំសំបូរ ស្រុកសំរោងទងខេត្តកំពង់ស្ពឺ។
នគរបាលស្រុកសំរោងទងបាននិយាយបន្តឲ្យដឹងថា ក្រោយពេលឃាត់ខ្លួនយុវជនសង្ស័យខាងលើនគរបាលបានធ្វើការសួរនាំ។ ជនសង្ស័យ បានឆ្លើយសារភាពថារូបខ្លួនពិតជាបានយកកូនកាំបិតចូលលួចកាត់ខ្សែភ្លើងក្នុងរោងចិញ្ចឹមជ្រូកខាងលើយកមកទុកខាងក្រោយផ្ទះកាលពីថ្ងៃទី១១ ខែសីហា ឆ្នាំ២០២៦ ពិតប្រាកដមែន។ ក្រោយឃាត់ខ្លួននគរបាលធ្វើការដករហូតខ្សែភ្លើងមួយចំនួន។
នគរបាលស្រុកសំរោងទងបានបញ្ជាក់ឱ្យដឹងថា ក្រោយឃាត់ខ្លួនជនសង្ស័យនគរបាលបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ