សំណុំរឿងបង្គោលសូឡា ក្លាយជាប្រធានបទក្តៅ នាយករដ្ឋមន្ត្រីឱ្យអភិបាលខេត្តជម្រះបញ្ជីរឿងថ្លៃកប់ពពក
- កំពង់ឆ្នាំង
ខេត្តកំពង់ឆ្នាំង ៖ ពេលនេះ ប្រធានបទមួយកំពុងជជែកដេញដោលគ្នាពីមួយទៅមួយ ពិសេសតាមបណ្តាញសង្គមតែម្តង បានញ័រកក្រើកដោយសារតែរឿងបង្គោលភ្លើងសូឡា១ដើម មានតម្លៃ ៨លានរៀល ស្មើនឹង ២ ០០០ដុល្លារ ដែលការវាយតម្លៃមិនថ្លៃដល់ថ្នាក់នេះទេ ។ បង្គោលភ្លើងសូឡានេះ ត្រូវបានដំឡើងនៅក្នុងឃុំទឹកហូត ស្រុករលាប្អៀរ ។
ឥឡូវនេះទាំងគូទឆ្នាំង ទាំងគម្របឆ្នាំង ក្តៅស្ទើរស្មើគ្នាហើយ ។សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំបន្ទាន់ដល់អភិបាលខេត្តកំពង់ឆ្នាំង ត្រូវត្រួតពិនិត្យមើលករណីបង្គោលភ្លើងសូឡា១ដើមមានតម្លៃរហូតដល់៨លានរៀល ឬស្មើ ២ ០០០ដុល្លារ ដែលបានដាក់ដំឡើងនៅឃុំទឹកហូត ស្រុករលាប្អៀរ ។
ការលើកឡើងរបស់សម្តេចធិបតីនាយករដ្ឋមន្ត្រី បន្ទាប់ពីកាលពីពេលថ្មីៗនេះ មានករណីបង្គោលភ្លើងសូឡាតម្លៃ១ដើម ៨លានរៀល (ប្រហែល ២ ០០០ដុល្លារ) កំពុងក្លាយជាប្រធានបទក្តៅ និងទទួលរងការរិះគន់យ៉ាងខ្លាំងពីមហាជននៅលើបណ្តាញសង្គម ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានា នៅក្រុងស្ទឹងត្រែង ខេត្តស្ទឹងត្រែង កាលពីថ្ងៃទី១២ ខែសីហា ឆ្នាំ២០២៦សម្តេចធិបតី ហ៊ុន ម៉ាណែត នាយករដ្ឋមន្ត្រី បានលើកឡើងថា ថ្មីៗនេះឃើញមានការភ្ញាក់ផ្អើលជាខ្លាំងចំពោះបង្គោលភ្លើងសូឡាតម្លៃ ២ពាន់ដុល្លារនៅខេត្តកំពង់ឆ្នាំង ។ ហេតុនេះ រដ្ឋបាលខេត្តត្រូវចុះពិនិត្យមើលករណីនេះយ៉ាងណាដែរ ?
សម្តេចធិបតីនាយករដ្ឋមន្ត្រី បានបន្តថា «ប៉ុន្មានថ្ងៃនេះ ឃើញអារឿងស្អីបង្គោលភ្លើង២ពាន់ដុល្លារ ឡើងផ្អើល អាហ្នឹងហេតុផលយ៉ាងម៉េចត្រូវមើល ខេត្តត្រូវពិនិត្យមើល អាហ្នឹងគេដាក់ខ្ពស់ដេញថ្លៃ តែទម្លាក់ថ្លៃលូ ថ្លៃអីខ្ញុំមិនដឹងទេ ប៉ុន្តែត្រូវពង្រឹង» ។ សម្តេចធិបតីបានលើកឡើងទៀតថា ត្រូវពិនិត្យដើម្បីបង្កើនទំនុកចិត្តដល់ប្រជាពលរដ្ឋ និងទទួលមកវិញបានផលច្រើន ។
សូមបញ្ជាក់ថា ពាក់ព័ន្ធនឹងករណីបង្គោលភ្លើងនេះដែរ បើយោងតាមរបាយការណ៍គម្រោងឃុំបានដំឡើងចំនួន ៣បង្គោល ដែលចំណាយអស់សរុប ២៤លានរៀល ។ គម្រោងអភិវឌ្ឍន៍រួមមាន ផ្លូវ លូ និងបង្គោលសូឡានេះ គឺដេញថ្លៃបានដោយក្រុមហ៊ុន «ឡាយ ផល្លា» ។ មេឃុំបានបកស្រាយថា នេះជាយុទ្ធសាស្ត្រដេញថ្លៃរបស់ក្រុមហ៊ុន ដែលទម្លាក់តម្លៃមុខទំនិញខ្លះឱ្យថោក ហើយដំឡើងតម្លៃបង្គោលសូឡានេះឱ្យខ្ពស់ ដើម្បីឱ្យជាប់ការដេញថ្លៃគម្រោងសរុប ។
ជុំវិញករណីរឿងបង្គោលភ្លើងសូឡា ១ដើមតម្លៃ៨លានរៀល ជាគម្រោងសាងសង់ផ្លូវរបស់មូលនិធិឃុំទឹកហូត ស្រុករលាប្អៀរ ធ្វើឱ្យកក្រើកពេញបណ្ដាញសង្គម និងមានការដេញដោល ចោទជាចម្ងល់ថា ហេតុអី្វបានជាមានតម្លៃថ្លៃម្ល៉េះ ហើយក៏មានសារព័ត៌មានខ្លះបានលែបខាយសម្ដីថា ប្រហែលធ្វើអំពីមាសឬប្លាទីនទៀតផងនិងកែបង្គោលធម្មតាមកស្រោបមាស ។ មកដល់ពេលនេះ នៅតែមានការស្រពេចស្រពឹល មានភាពមិនច្បាស់លាស់ បើទោះបីលោកមេឃុំទឹកហូត បានផ្ដល់កិច្ចសម្ភាសន៍ដល់បណ្ដាអ្នកយកព័ត៌មានតាមទូរស័ព្ទជាច្រើនក្តី ក៏នៅតែចុងក្រោយ រង់ចាំការបកស្រាយរបស់មន្ត្រីជំនាញនិងអាជ្ញាធរខេត្តកំពង់ឆ្នាំង ព្រោះបានចាត់មន្ត្រីជំនាញចុះស្រាវជ្រាវស៊ើបអង្កេតហើយ ។
មន្ត្រីឃុំនិយាយថា គម្រោងជួសជុលផ្លូវក្រាលក្រួសក្រហមមួយខ្សែក្នុងឃុំទឹករហូត ស្រុករលាប្អៀរ ត្រូវបានប្រកាសឲ្យដេញថ្លៃកាលពីថ្ងៃទី៨ ខែឧសភា ឆ្នាំ២០២៦ មានប្រវែង ២ ០៤០ម៉ែត្រ ទទឹង៥ម៉ែត្រ កម្រាស់០,១៥ម៉ែត្រ ដាក់លូ២កន្លែង ដាក់សូឡា ៣កន្លែង និងផ្លាកសញ្ញាគម្រោងសាងសង់១កន្លែង ដែលមានតម្លៃប៉ាន់ស្មាន ១៣៥ ៩០៩ ៣៦៥រៀល។ ពេលនោះមានក្រុមហ៊ុនចូលដេញថ្លៃចំនួន៩ និងដេញបានទៅក្រុមហ៊ុនសំណង់ ឡាយ ផល្លា តម្លៃទាបជាងគេ ដេញបានក្នុងតម្លៃ ៦៦ ៩០០ ០០០រៀលគត់ ។
ថ្មីៗនេះ បណ្ដាសារព័ត៌មាននានានិងបណ្ដាញសង្គម បានចុះផ្សាយព្រោងព្រាតអំពីបញ្ហាបង្គោលភ្លើងសូឡា១ដើមមានតម្លៃ៨លានរៀលដែលបានដាក់នៅលីទីតាំងជួសជុលផ្លូវក្រាលក្រួសក្រហមក្នុងឃុំខាងលើ ដែលធ្វើឲ្យមហាជន បណ្តាអ្នកសារព័ត៌មានកើតចម្ងល់ ធ្វើឲ្យផ្ទុះពេញបណ្ដាញសង្គម ។
លោក ជ័យ ម៉ូត មេឃុំទឹកហូត បានចេញសេចក្តីបំភ្លឺកាលពីថ្ងៃទី៧ ខែសីហា ឆ្នាំ២០២៦ ដែលកោះសន្តិភាពសូមដកស្រង់ខ្លឹមសារសង្ខេបមួយចំនួនថា «ការបើកសំណើដាក់ឲ្យដេញថ្លៃ ដែលបានធ្វើឡើងកាលពីថ្ងៃទី៨ ខែឧសភា ឆ្នាំ២០២៦ គម្រោងផ្លូវក្រាលក្រួសក្រហមមានប្រវែង ២ ០៤០ម៉ែត្រ និងមានទទឹង កម្រាស់ ចំនួនសូឡាហ្នឹង ចំនួនលូ ដូចបានរៀបរាប់មកខាងលើ(ពេលប្រកាសដេញថ្លៃ) ។
លុះពេលចុះកិច្ចសន្យាអនុវត្តគម្រោងផ្លូវក្រាលក្រួសក្រហម គឺមានប្រវែងដល់ទៅ៣ ០៩២ម៉ែត្រ ទទឹង៥ម៉ែត្រ កម្រាស់០,១៥ម៉ែត្រ លូចំនួន២ សូឡា១៥កន្លែង មានផ្លាកគម្រោង១ ដែលមានតម្លៃក្នុងកិច្ចសន្យាសរុប ១៨៤ ៩១៩ ៨០៥រៀលគត់» ។ លើចំណុចត្រង់នេះ លោកមេឃុំបានបញ្ជាក់ថា ផ្អែកលើការណែនាំរបស់សៀវភៅភីមឆ្នាំ២០១៧ ក្នុងជំពូកទី៣ ចំណុចទី៣,១៣ ,២ ក្នុងទំព័រទី២៥១ នៃសៀវភៅភីម ដោយក្នុងនោះចែងថា ក្រុមប្រឹក្សាឃុំ-សង្កាត់ អាចសម្រេចផ្លាស់ប្ដូរចំនួនលទ្ធផលកិច្ចសន្យាតម្លៃ ដេញថ្លៃឈ្នះ គឺទាបជាងតម្លៃប៉ាន់ស្មាន ។ ករណីនេះក្រុមប្រឹក្សាឃុំ-សង្កាត់ អាចសម្រេចបន្ថែមចំនួនលទ្ធផលកិច្ចសន្យាដើម្បីប្រើប្រាស់ថវិកាដែលនៅសល់ពីការដេញថ្លៃនោះបាន» ។
ដូចក្នុងន័យខ្លឹមសារនៃការបកស្រាយរបស់លោក ជ័យ ម៉ូត មេឃុំទឹកហូត ពិតណាស់គម្រោងដាក់ដេញថ្លៃមានប្រវែងតែ ២ ០៤០ម៉ែត្រ ប៉ុន្តែពេលចុះអនុវត្តមានប្រវែង ៣ ០៩២ម៉ែត្រ គឺបានបន្ថែមផ្លូវប្រវែង១ ០៥២ម៉ែត្រ និងបានបន្ថែមសូឡា ១២កន្លែង បន្ថែមទៀត លើគម្រោងដេញថ្លៃមានតែ៣កន្លែង ដូច្នេះសរុប ១៥កន្លែង ។
កោះសន្តិភាព មិនទាន់ហ៊ានបកស្រាយថាមិនមានភាពប្រក្រតីឬយ៉ាងណានោះទេ ។ ប៉ុន្តែរាល់គម្រោងដាក់ឲ្យដេញថ្លៃជាសាធារណៈ មានអ្នកយកព័ត៌មានជាច្រើនចូលរួមកត់ត្រា លើកំណត់ហេតុដែលក្រុមហ៊ុនដេញបាន រួមទាំងផ្លូវបេតុង ផ្លូវក្រាលក្រួសក្រហម សាលាមត្តេយ្យជាដើម ហើយបានយកមកផ្សព្វផ្សាយថា ការចំណាយថវិកាមូលនិធិរបស់ឃុំ-សង្កាត់ មានតម្លាភាពឬគ្មានតម្លាភាព និងពីលទ្ធផលនៃការដេញថ្លៃនាថ្ងៃនោះ ។
ចុះហេតុអី្វ ចាំបាច់នៅពេលដែលក្រុមហ៊ុនចុះអនុវត្តគម្រោងហើយ បែរជាទៅអាជ្ញាធរឃុំ ពន្លាតប្រវែង បំពាក់សូឡាបន្ថែមទៀត ដែលមើលទៅហាក់ដូចជាកីឡាប្រដាល់ ស៊ីញ៉ូឆ្វេង វ៉ៃស្ដាំឬយ៉ាងណា ?
សំណុំរឿងអំពូលភ្លើងសូឡាតម្លៃ៨លានរៀល ក្នុង១ដើមប្រហែលជាអាចនឹងគិតដល់ការបន្ថែមផ្លូវដែលមានចម្ងាយជាង ១ ០០០ម៉ែត្រ និងបំពាក់សូឡាបន្ថែម១២ដើមហ្នឹងទេដឹង ?
ជុំវិញករណីខាងលើនេះ លោក ឡាយ ផល្លា ក្រុមហ៊ុនសំណង់ ឡាយ ផល្លា បានបញ្ជាក់ថា ពេលចុះអនុវត្តគម្រោង អាជ្ញាធរឃុំបានស្នើសុំឲ្យបន្តប្រវែងផ្លូវបន្ថែមសម្រាប់សម្រួលដំណើរដល់បងប្អូនប្រជាពលរដ្ឋ ទើបក្រុមហ៊ុនយល់ព្រមធ្វើបន្ត បើគួបផ្សំនឹងតម្លៃទាបពេលដាក់ដេញថ្លៃ និងតម្លៃធ្វើបន្ត ក្រុមហ៊ុនមិនចំណេញទេ សល់តិចតួច ណានៅកំពុងសាងសង់ស្ពានរដ្ឋទៀតផង ។
ទោះជាយ៉ាងនេះក្តី រហូតមកដល់ព្រឹកថ្ងៃទី១២ ខែសីហា ឆ្នាំ២០២៦ នៅមិនទាន់ឃើញខាងជំនាញណាបកស្រាយច្បាស់លាស់នៅឡើយទេ រង់ចាំការស៊ើបអង្កេតស្រាវជ្រាវរបស់អាជ្ញាធរខេត្ត នឹងជូនដំណឹងនៅពេលក្រោយ ៕
ចែករំលែកព័តមាននេះ