ខេត្តប៉ៃលិន ៖ ដើម្បីចូលរួមអបអរសាទរ ក្នុងទិវាមច្ឆាជាតិ ១កក្កដា ឆ្នាំ២០២៥នេះ រដ្ឋបាលខេត្តប៉ៃលិន បានរៀបចំប្រារព្ធពិធីអបអរសាទរទិវាមច្ឆាជាតិ ១ កក្កដា…
ខេត្តប៉ៃលិន ៖ ដើម្បីចូលរួមអបអរសាទរ ក្នុងទិវាមច្ឆាជាតិ ១កក្កដា ឆ្នាំ២០២៥នេះ រដ្ឋបាលខេត្តប៉ៃលិន បានរៀបចំប្រារព្ធពិធីអបអរសាទរទិវាមច្ឆាជាតិ ១ កក្កដា ដោយបានព្រលែងកូនត្រីចម្រុះ និងមេពូជត្រីចំនួនជាង ២០,០០០ក្បាល នៅចំណុចសំណង់បង្ហៀរទឹកថ្នល់បទ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ក្រោមអធិបតីលោកជំទាវ បាន ស្រីមុំ អភិបាលខេត្តប៉ៃលិន និងលោក ជា ចាន់ឌិន ប្រធានក្រុមប្រឹក្សាខេត្ត ព្រមទាំងសិស្សានុសិស្ស ប្រជាពលរដ្ឋយ៉ាងច្រើនកុះករ ។
នៅចំពោះមុខអង្គពិធី លោកជំទាវ បាន ស្រីមុំ បានមានប្រសាសន៍ថា ក្នុងស្ថានភាព នៃកំណើនតម្រូវការស្បៀងអាហារ ដោយរត់តាមកំណើនសេដ្ឋកិច្ច និងកំណើនប្រជាជន នាពេលបច្ចុប្បន្ននេះ រាជរដ្ឋាភិបាលកម្ពុជា បានចាត់ទុកវិស័យកសិកម្មជាវិស័យអទិភាពដ៏ចម្បងបំផុត ក្នុងនោះអនុវិស័យជលផលនៅតែដើរតួនាទីយ៉ាងសំខាន់ ក្នុងការចូលរួមចំណែករក្សានិរន្តរភាព នៃកំណើនសេដ្ឋកិច្ចធានាសមធម៌ ធានាសុវត្ថិភាពសន្តិសុខស្បៀង និងជំរុញការអភិវឌ្ឍសេដ្ឋកិច្ចជនបទ ហើយក៏ជាបណ្តាញមួយនៃសុវត្ថិភាពសង្គម ដោយសារត្រី និងវារីជាតិផ្សេងៗ ទៀត នៅតែជាអាហារយ៉ាងសំខាន់មិនអាចខ្វះបានរបស់ប្រជាជនខ្មែរ បន្ទាប់ពីស្រូវ-អង្ករ និងដំណាំផ្សេងៗទៀត ។
លោកជំទាវអភិបាលខេត្ត បានបន្តទៀតថា រាជរដ្ឋាភិបាលកម្ពុជាអាណត្តិទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានគាំទ្រសកម្មភាពរបស់ក្រសួងកសិកម្ម រុក្ខាប្រមាញ់ និងនេសាទ ដែលបាននិងកំពុងអនុវត្ត ដើម្បីពង្រឹងការគ្រប់គ្រង ការអភិរក្ស និងការអភិវឌ្ឍធនធានជលផលប្រកបដោយចីរភាព សម្រាប់កូនចៅជំនាន់ក្រោយ និងបំផុសស្មារតីឱ្យចូលរួមតាមរយៈទិវាមច្ឆជាតិ ១កក្កដា ជារៀងរាល់ឆ្នាំ ព្រមទាំងផ្តល់អនុសាសន៍ដល់ស្ថាប័នថ្នាក់ជាតិ និងថ្នាក់ក្រោមជាតិ ត្រូវតែបង្កើនកិច្ចសហការ យកចិត្តទុកដាក់ និងពង្រឹងការគ្រប់គ្រងការពារ អភិរក្សធនធានជលផល ដើម្បីធានាបាននិរន្តរភាពបរិស្ថាន ប្រព័ន្ធអេកូឡូស៊ី និងទេសចរណ៍ធម្មជាតិផងដែរ។
លោកជំទាវ បាន ស្រីមុំ បានថ្លែងពីការជំរុញដល់ខណ្ឌរដ្ឋបាលជលផល ត្រូវរៀបចំដាក់ស្លាកកន្លែងអភិរក្សជលផលឱ្យបានច្បាស់លាស់ ដោយសហការជាមួយអាជ្ញាធរមូលដ្ឋាន និងកម្លាំងសមត្ថកិច្ចពាក់ព័ន្ធ ព្រមទាំងធ្វើសកម្មភាពគ្រប់គ្រងកន្លែងអភិរក្សជលផល ប្រកបដោយសុវត្ថិភាព ជាពិសេសរួមសហការគ្នាបង្ក្រាបបទល្មើសជលផល និងទប់ស្កាត់រាល់ការប្រើប្រាស់ឧបករណ៍នេសាទខុសច្បាប់ ដែលបំផ្លិចបំផ្លាញធ្ងន់ធ្ងរដល់ធនធានធម្មជាតិ ឱ្យមានប្រសិទ្ធភាពខ្ពស់។ ទន្ទឹមនឹងនេះដែរ ត្រូវខិតខំបំផុស និងគាំទ្រឱ្យប្រជាពលរដ្ឋធ្វើការចិញ្ចឹមត្រីជាលក្ខណៈគ្រួសារ និងលើកទឹកចិត្តដល់វិស័យឯកជនឱ្យវិនិយោគលើការងារចិញ្ចឹមត្រី ដែលមានតម្លៃសេដ្ឋកិច្ចខ្ពស់ ព្រមទាំងធ្វើការកែច្នៃរផលិតផលជលផលដើម្បីនាំចេញទៅក្រៅស្រុកថែមទៀត។
លោកជំទាវណែនាំឱ្យប្រជាពលរដ្ឋរស់នៅតាមភូមិនានាត្រូវតែចេះតែទាំសុខភាពផ្ទាល់ខ្លួន សុខភាពកូនចៅ ដោយត្រូវងូតទឹកសម្អាតខ្លួនឱ្យបានទៀងទាត់ និងត្រូវជៀសវាងការលេងល្បែងស៊ីសងគ្រប់ប្រភេទ ដែលនាំឱ្យប៉ះពាល់ដល់សេដ្ឋកិច្ចគ្រួសារ ជាពិសេសត្រូវយកចិត្តទុកដាក់សន្សំសំចៃថវិកា និងម្ហូបអាហារឱ្យបានគ្រប់គ្រាន់ ដោយមិនត្រូវធ្វេសប្រហែលឡើយ។
សូមបញ្ជាក់ផងដែរថា ក្នុងពិធីអបអរសាទរទិវាមច្ឆាជាតិ ១កក្កដា ២០២៥នេះ លោកជំទាវ បាន ស្រីមុំ អភិបាលខេត្ត និងក្រុមការងារបានព្រលែងកូនត្រីពូជ ដូចជាត្រីឆ្ពិន ត្រីកន្ធរ ត្រីក្រាញ់ ត្រីផ្ទក់ និងកូនត្រីចម្រុះ ប្រមាណជាង ២០,០០០ក្បាល ចូលទៅក្នុងនៅសំណង់បង្ហៀរទឹកថ្នល់បទ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដែលត្រូវបានសាងសង់ឡើងដោយក្រសួងធនធានទឹក និងឧត្តុនិយមខេត្តប៉ៃលិន កាលពីឆ្នាំ១៩៩៩ និងជួសជុលឡើងវិញកាលពីឆ្នាំ២០១៣។
សំណង់នេះ មានបណ្តោយ ៦៣,៥ម៉ែត្រ ទទឹង៨ម៉ែត្រ សាងសង់ក្នុងគោលបំណងស្ទាក់ និងបង្វែរទឹកពីស្ទឹងចូលប្រឡាយមេ ដើម្បីស្រោចស្រពដំណាំកសិកម្ម ជាពិសេសដំណាំស្រូវ។ បច្ចុប្បន្នសំណង់នេះ មានលទ្ធភាពស្រោចស្រពលើផ្ទៃដីស្រែរដូវវស្សាចំនួន ២,៩៥៦ហិកតា រដូវប្រាំងចំនួន៥០០ហិកតា និងដំណាំរួមផ្សំជាង៣៥០ហិកតា ដែលមានចំនួន ៤ភូមិ រួមមាន ៖ ភូមិទំនប់ ឃុំស្ទឹងត្រង់ ភូមិភ្នំស្ពង់ ភូមិភ្នំកុយ(សំបូរ) និងភូមិកំពង់ចម្លងក្រោម ស្ថិតក្នុងឃុំសាលាក្រៅ ស្រុកសាលាក្រៅ ខេត្តប៉ៃលិន៕
ចែករំលែកព័តមាននេះ