ខេត្តប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន និងជាប្រធានគណៈកម្មការចំពោះកិច្ច ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) បានធ្វើការប្តេជ្ញាយ៉ាងម៉ឺងម៉ាត់…
ខេត្តប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន និងជាប្រធានគណៈកម្មការចំពោះកិច្ច ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) បានធ្វើការប្តេជ្ញាយ៉ាងម៉ឺងម៉ាត់ ក្នុងការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា ដែលផែនការនេះ បានធ្វើឡើងក្នុងកិច្ចប្រជុំ យុទ្ធនាការបោសសម្អាតការឆបោក តាមប្រព័ន្ធបច្ចេកវិទ្យា នៅខេត្តប៉ៃលិន កាលពីរសៀលថ្ងៃទី១៧ ខែកក្កដា ឆ្នាំ២០២៥ ដោយមានការចូលរួមពីលោកព្រះរាជអាជ្ញាអមសាលាដំបូងខេត្ត លោកអភិបាលរងខេត្ត នាយករដ្ឋបាលខេត្ត ស្នងការនគរបាលខេត្ត មេបញ្ជាការអាវុធហត្ថខេត្ត មេបញ្ជាការសឹករងខេត្ត អភិបាលក្រុង/ស្រុក និងមន្ត្រីពាក់ព័ន្ធមួយចំនួនទៀត ។
លោកជំទាវ បាន ស្រីមុំ អភិបាលខេត្តប៉ៃលិន បានលើកឡើងថា ដោយយល់ឃើញពីភាពស្មុគស្មាញ និងការគំរាមកំហែង នៃការឆបោកតាមប្រព័ន្ធបច្ចេកវិទ្យា អនឡាញ ដែលតែងតែផ្លាស់ប្តូរទម្រង់ថ្មីៗ លោកជំទាវអភិបាលខេត្ត ក៏បានជំរុញឲ្យគ្រប់ភាគីពាក់ព័ន្ធ ត្រូវតែអនុវត្ត នូវចំណុចគន្លឹះមួយចំនួន រួមមាន ៖ សមត្ថកិច្ច និងមន្ត្រីមូលដ្ឋាន ត្រូវតែបន្តចុះអប់រំ និងផ្សព្វផ្សាយព័ត៌មាននេះ ដល់ប្រជាពលរដ្ឋអំពីទម្រង់ថ្មីៗ នៃការឆបោក ដូចជាការឆបោកតាមរយៈការងារតាមប្រព័ន្ធអនឡាញ ការវិនិយោគក្លែងក្លាយ ល្បែងស៊ីសងអនឡាញ និងការបោកបញ្ឆោត តាមរយៈការបន្លំធ្វើជាសមត្ថកិច្ច ឬស្ថាប័នរដ្ឋជាដើម ។
លោកជំទាវអភិបាលខេត្ត ក៏បានណែនាំឲ្យបង្កើនកិច្ចសហការជិតស្និទ្ធ រវាងកងកម្លាំងនគរបាល កងរាជអាវុធហត្ថ រដ្ឋបាលខេត្ត-ក្រុង-ស្រុក-ឃុំ-សង្កាត់ និងស្ថាប័នពាក់ព័ន្ធផ្សេងៗទៀត ដើម្បីចែករំលែកនូវ ព័ត៌មាន ស៊ើបអង្កេត និងបង្ក្រាបបណ្តាញឆបោក ប្រកបដោយប្រសិទ្ធភាពខ្ពស់។
លោកជំទាវបានបញ្ជាក់ថា រាល់ករណីឆបោក ដែលរកឃើញ ត្រូវតែចាត់វិធានការផ្លូវច្បាប់ យ៉ាងតឹងរ៉ឹងបំផុត ដោយគ្មានការលើកលែងឡើយ ដើម្បីនាំខ្លួនជនល្មើសមកផ្តន្ទាទោសតាមផ្លូវច្បាប់ និងជាការព្រមានដល់អ្នកផ្សេងទៀតផងដែរ ។
លោកជំទាវអភិបាលខេត្ត បានសង្កត់ធ្ងន់ថា ជាមួយគ្នានេះ ត្រូវបង្កើតយន្តការងាយស្រួល សម្រាប់ប្រជាពលរដ្ឋ ក្នុងការរាយការណ៍ករណីសង្ស័យ ឬករណី ដែលខ្លួនបានក្លាយជាជនរងគ្រោះ នៃការឆបោក។ នេះអាចរាប់បញ្ចូលទាំងខ្សែទូរសព្ទបន្ទាន់ ប្រព័ន្ធរាយការណ៍អនឡាញ ឬការដាក់ពាក្យបណ្តឹង ដោយផ្ទាល់ នៅតាមប៉ុស្តិ៍នគរបាល ឬសាលាឃុំ-សង្កាត់ទាំងអស់ ។
លោកជំទាវ បានបន្ថែមទៀតថា ការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា គឺជាការងារអាទិភាពមួយរបស់រាជរដ្ឋាភិបាលកម្ពុជា ក៏ដូចជារដ្ឋបាលខេត្តប៉ៃលិន ដើម្បីធានាបាននូវសន្តិសុខ សុវត្ថិភាព និងភាពសុខដុមរមនា របស់ប្រជាពលរដ្ឋនៅក្នុងប្រទេស និងភូមិសាស្ត្រខេត្តប៉ៃលិនទាំងមូល ដើម្បីឱ្យប្រជាពលរដ្ឋរស់នៅទទួលបានសេចក្តីសុខសាន្ត និងសុវត្ថិភាព ៕
ចែករំលែកព័តមាននេះ