ទីក្រុងបាក់ដាត៖ មានហេតុការណ៍ឆេះផ្សារទំនើបដែលទើបតែបើកដំណើរការនៅខេត្តវ៉ាស៊ីត (Wasit) ប្រទេសអ៊ីរ៉ាក់ភាគខាងកើត។ យោងតាមព័ត៌មានបឋម មនុស្សជាង៦០នាក់បានស្លាប់នៅក្នុងហេតុការណ៍នេះ។ ក្រសួងមហាផ្ទៃអ៊ីរ៉ាក់ប្រកាសថាមនុស្ស៦១នាក់ត្រូវគេបញ្ជាក់ថាបានស្លាប់ហើយ។ ភាគច្រើននៃជនរងគ្រោះស្លាប់ដោយសារថបដង្ហើមដោយឈ្លក់នឹងផ្សែង។
សាក្សីនិយាយថាភ្លើងចាប់ផ្ដើមឆេះកាលពីល្ងាចថ្ងៃពុធនៅទីក្រុងឃុត (Kut)។ នៅក្នុងចំណោមសាកសពដែលគេទាញចេញពីផ្សារទំនើបនោះ ១៤នាក់ឆេះឡើងខ្លោចដូចធ្យូងរហូតដល់កំណត់អត្តសញ្ញាណលែងបាន។ ក្រុមប្រជាការពារអាចជួយសង្គ្រោះមនុស្សលើសពី៤៥នាក់ទាន់ពេលវេលា។ នៅពេលនោះ ពួកគេជាប់ផុងនៅក្នុងអគារ។
ផ្សារទំនើបដែលទើបតែបើកដំណើរការបានមួយសប្ដាហ៍នោះជាអគារកម្ពស់ប្រាំជាន់ មានភោជនីយដ្ឋាន និងអគារលក់ទំនិញ។ សារព័ត៌មានរបស់រដ្ឋអ៊ីរ៉ាក់ផ្សាយថាមនុស្សជាច្រើននៅបាត់ខ្លួននៅឡើយទេ។ តាមរយៈរូបថត និងវីឌីអូឃ្លីបដែលបង្ហោះនៅលើបណ្ដាញសង្គម គេឃើញថាអគារទាំងមូលត្រូវហ៊ុមព័ទ្ធដោយអណ្ដាតភ្លើងយ៉ាងសន្ធោសន្ធៅ។
អភិបាលខេត្ត លោកមហាមេត អាល់ម៉ាយេ (Mohammed al-Mayyeh) ប្រកាសកាន់មរណទុក្ខរយៈពេលបីថ្ងៃដើម្បីគោរពវិញ្ញាណក្ខន្ធជនរងគ្រោះ។ លោកថ្លែងថាសមត្ថកិច្ចកំពុងស៊ើបអង្កេតមូលហេតុដែលនាំឱ្យឆេះនេះហើយ។ ប៉ុន្តែជាបឋមត្រូវដាក់ពាក្យប្ដឹងម្ចាស់អគារ និងម្ចាស់ផ្សារទំនើបទៅតុលាការដើម្បីឱ្យពួកគេទទួលខុសត្រូវនៅចំពោះមុខច្បាប់។ លោកមិនបានបញ្ជាក់លម្អិតថាចោទប្រកាន់ពីបទអ្វីទេ។ ការស៊ើបអង្កេតបឋមអាចនឹងដឹងលទ្ធផលនៅក្នុងរង្វង់៤៨ម៉ោងខាងមុខនេះ។
នាយករដ្ឋមន្ត្រីអ៊ីរ៉ាក់បានចាត់ឱ្យរដ្ឋមន្ត្រីមហាផ្ទៃចុះទៅកន្លែងកើតហេតុដើម្បីស៊ើបអង្កេតសំណុំរឿងនេះជាបន្ទាន់ និងចាត់វិធានការទប់ស្កាត់មិនឱ្យមានករណីនេះកើតឡើងជាថ្មី។ នៅអ៊ីរ៉ាក់ វិស័យសំណង់មិនសូវមានស្តង់ដារល្អ និងមិនបានបំពាក់គ្រប់គ្រាន់នូវប្រព័ន្ធការពារសុវត្ថិភាពទេ។ ធ្លាប់មានករណីឆេះស្លាប់ម្ដងៗច្រើននាក់ណាស់។ ឧទាហរណ៍កាលពីឆ្នាំ២០២១ ឆេះមន្ទីរពេទ្យស្លាប់ចន្លោះពី៦០-៩២នាក់។ ក្រោយមកទៀត ឆេះអគារសម្រាប់ជួលរៀបមង្គលការស្លាប់ជាងមួយរយនាក់៕
ចែករំលែកព័តមាននេះ