ទីក្រុងបាងកក៖ ថ្មីៗនេះមានករណីទាហានថៃនៅភូមិភាគ២ដើរជាន់មីនបណ្ដាលឱ្យយោធិនខ្លះរងរបួស និងខ្លះទៀតត្រូវកាត់ជើង។ កាសែតបាងកកប៉ុស្តិ៍ចុះផ្សាយថាជារួម ទាហានថៃបីនាក់រងរបួសនៅក្នុងហេតុការណ៍នោះ។ ក្នុងនោះ ម្នាក់ដាច់ជើងនៅពេលមីនមួយគ្រាប់ផ្ទុះឡើងនៅតំបន់ឆូងបក់ (Chong Bok) ស្រុកណាំយ៉ឺន…
ទីក្រុងបាងកក៖ ថ្មីៗនេះមានករណីទាហានថៃនៅភូមិភាគ២ដើរជាន់មីនបណ្ដាលឱ្យយោធិនខ្លះរងរបួស និងខ្លះទៀតត្រូវកាត់ជើង។ កាសែតបាងកកប៉ុស្តិ៍ចុះផ្សាយថាជារួម ទាហានថៃបីនាក់រងរបួសនៅក្នុងហេតុការណ៍នោះ។ ក្នុងនោះ ម្នាក់ដាច់ជើងនៅពេលមីនមួយគ្រាប់ផ្ទុះឡើងនៅតំបន់ឆូងបក់ (Chong Bok) ស្រុកណាំយ៉ឺន (Nam Yuen) ខេត្តឧប៊ុនរាជធានី (Ubon Ratchathani)។
បញ្ជាការដ្ឋានភូមិភាគ២របស់ថៃបានរាយការណ៍កាលពីយប់ថ្ងៃពុធថាទាហានរបស់ខ្លួនម្នាក់ដើរជាន់មីននៅពេលក្រុមការងាររបស់ពួកគេដើរល្បាត។ ចំណុចចាប់ផ្ដើមនៃការធ្វើដំណើររបស់ពួកគេពីតំបន់ប្រតិបត្តិការសឹកមរកតឆ្ពោះទៅភ្នំ៤៨១នៅម៉ោង១:៣០រសៀលថ្ងៃពុធ។ រំពេចនោះ គ្រាប់មីនក៏ផ្ទុះឡើងបណ្ដាលឱ្យរបួសទាហានទាំងបីនាក់នោះ។
ពួកគេត្រូវបានបញ្ជូនទៅមន្ទីរពេទ្យស្រុកមឿង ខេត្តដដែលនេះ។ នៅក្នុងចំណោមជនរងគ្រោះទាំងនោះ ម្នាក់ឈ្មោះថាណាវ៉ាត់ ហួយវ៉ាន់ (Thanapat Huiwan) ត្រូវកាត់ត្រឹមកជើងខាងឆ្វេង។ នៅពេលជួយសង្គ្រោះបឋមនោះ គាត់នៅដឹងខ្លួននៅឡើយទេ។ គាត់ត្រូវបានលាងរបួស និងដាក់អុកស៊ីហ្សែន។ បន្ទាប់មកដឹកតាមឧទ្ធម្ភាគចក្រទៅមន្ទីរពេទ្យ។
ឥឡូវនេះ គ្រូពេទ្យកំពុងវះកាត់មុខរបួស និងតាមដានអាការៈរបួសដោយយកចិត្តទុកដាក់ដើម្បីទប់ស្កាត់មិនឱ្យក្លាយមុខរបួស។ ដោយឡែក ទាហាន២នាក់ទៀតដែលត្រូវរបួសដែរនោះ ម្នាក់ឈ្មោះផាធីផាន ស្រីឡាសាក់ (Patiphant Srilasak) និងម្នាក់ទៀតឈ្មោះណាថាវុទ្ធ ស្រីខឹម (Nathawut Srikhem)។ ពួកគេរងរបួសនៅត្រង់ដើមទ្រូង៕
ចែករំលែកព័តមាននេះ