សង្គ្រាមអ៊ុយក្រែន ៖ យោងតាមអាជ្ញាធរមូលដ្ឋានថា កងទ័ពរុស្ស៊ីបានវាយប្រហារលើទីក្រុង៤របស់អ៊ុយក្រែនកាលពីយប់ថ្ងៃទី១៥មក១៦កក្កដា បណ្ដាលឲ្យមនុស្សយ៉ាងតិច១៥នាក់រងរបួស។
ការវាយប្រហារថ្មីទាំងនោះស្ថិតក្នុងក្របខណ្ឌ នៃការបង្កើនយុទ្ធនាការវាយប្រហារតាមអាកាសរបស់រុស្ស៊ី ប្រឆាំងបណ្ដាតំបន់ស៊ីវិលដោយសំដៅជាពិសេសលើហេដ្ឋារចនាសម្ព័ន្ធថាមពល។
កងទ័ពអាកាសអ៊ុយក្រែននិយាយថា រុស្ស៊ីបានប្រើដ្រូន៤០០គ្រឿងព្រមទាំងមីស៊ីលបាលីស្ទិកមួយគ្រាប់វាយប្រហារនាវេលាយប់។
ការវាយប្រហារទាំងនេះសំដៅលើភាគឦសានក្រុងខាគៀវ ទីក្រុងវីននីតស៊ីយ៉ាភាគខាងលិចប្រទេស ទីក្រុងអូដេសានិងទីក្រុងកំណើតរបស់ប្រធានាធិបតីអ៊ុយក្រែនលោកវ៉ូឡូឌីមៀរហ្សឡេនស្គី គឹទីក្រុងគ្រីវយីរីហ៍។ ប្រធានាធិបតីអ៊ុយក្រែនថ្លែងថា រុស្ស៊ីមិនផ្លាស់ប្ដូរយុទ្ធសាស្ត្ររបស់ខ្លួនឡើយ។ លោកថា ដើម្បីទប់ទល់ឲ្យមានប្រសិទ្ធភាពចំពោះយុទ្ធសាស្ត្រនោះ យើងត្រូវពង្រឹងប្រព័ន្ធការពាសអាកាសដើម្បីឲ្យរុស្ស៊ីស្គាល់ពីការឆ្លើយតបរបស់យើង ។
ប្រធានាធិបតីអាមេរិកបានដាក់ឱសាទវាទមួយដល់រុស្ស៊ីត្រឹមថ្ងៃទី២កញ្ញា ធ្វើឲ្យសម្រេចបានកិច្ចព្រមព្រៀងសន្តិភាពមួយបញ្ចប់សង្គ្រាម ដែលកើតមានចាប់តាំងពីជាង៣ឆ្នាំមកហើយដោយគំរាមដាក់ទណ្ឌកម្មធ្ងន់ធ្ងរបំផុត រហូតដល់បណ្ដាសម្ព័ន្ធមិត្តរុស្ស៊ី ដែលនឹងត្រូវយកពន្ធ១០០% ។
លោកត្រាំក៏សន្យាផ្ដល់អាវុធថែមទៀតដល់អ៊ុយក្រែន ពិសេសប្រព័ន្ធមីស៊ីលការពារអាកាសប៉ាទ្រីយ៉ូតនិងគំរាមដាក់ទណ្ឌកម្មថែមទៀតលើរុស្ស៊ី។ ទោះបីយ៉ាណា គេកត់សម្កាល់ឃើញថាបណ្ដាឱសានវាទដែលលោកត្រាំដាក់ដល់រុស្ស៊ីរយៈពេលប៉ុន្មានខែចុងក្រោយនេះហាក់គ្មានផល ដោយមិនអាចឲ្យមេដឹកនាំរុស្ស៊ីបញ្ចប់ការលុកលុយចូលអ៊ុយក្រែនឡើយ ។
ទីក្រុងហ្សាប៉ូរីហ្ស៊ីយ៉ាភាគខាងត្បូងអ៊ុយក្រែន ក៏រងការវាយប្រហារដែរ ។ នៅទីនោះអគារយ៉ាងតិច៣០រងការខូចខាត បន្ទាប់ពីហ្វូងដ្រូនវាយប្រហារស្រុកមួយនៃតំបន់ទីក្រុងនោះ៕
ចែករំលែកព័តមាននេះ