ឧបទ្វីបកូរ៉េចូលក្នុងដំណាក់កាលនៃភាពតានតឹងយ៉ាងខ្លាំងបន្ទាប់ពីនាវាចម្បាំងកូរ៉េខាងត្បូងមួយគ្រឿងសង្ស័យលិចដោយសារត្រូវគ្រាប់បែកបុកនៅជិតព្រំដែនរវាងកូរ៉េទាំង២នៅសមុទ្រលឿង ។
នាវាចម្បាំងឈ្មោះ CHEONAN ចំណុះ១.២០០តោន ដែលបែកជា២កាលពីថ្ងៃទី២៦ មីនា កន្លងមកនេះ ដោយសារការផ្ទុះដ៏អាថ៌កំបាំងមួយបណ្ដាលឱ្យស្លាប់នាវិក៤៦នាក់ ក្នុងចំណោមសមាជិកក្រុមនាវិកទាំង១០៤នាក់ត្រូវបានស្ទូចស្រង់ចេញពីទឹកកាលពីថ្ងៃទី២៤ មេសា ។ គ្រប់គ្នាគូសបញ្ជាក់ថា ការវាយប្រហារដោយគ្រាប់បែកបុកមួយគ្រាប់អាចជាមូលហេតុនៃការលិចនាវានោះ។ នោះជាការអះអាងកាលពីថ្ងៃទី២៥ មេសា របស់រដ្ឋមន្ដ្រីការពារប្រទេសកូរ៉េខាងត្បូងលោកគីម តាអ៊ីយ៉ុង ។
ការពិនិត្យកន្សៃនាវាញ៉ាំងឱ្យលេចពាក្យចចាមអារ៉ាមនានាអំពីការវាយប្រហារដោយកូរ៉េខាងជើង ។ ពួកអ្នកស៊ើបអង្កេតក្នុងនោះ មានពួកអ្នកជំនាញការអាមេរិក អូស្ដ្រាលី អង់គ្លេស និងស៊ុយអែត ត្រូវកំណត់ពីមូល ហេតុនៃការលិចនាវានោះ ។
យោងតាមលទ្ធផលដំបូងនៃការស៊ើបអង្កេតថា នាវានេះលិចដោយសារការផ្ទុះមួយមានកំលាំងស្មើនឹងគ្រឿងផ្ទុះ TNT ២០០គ.ក្រ នៅខាងក្រោមនាវា ។
ក្រុងព្យុងយ៉ាងបានបដិសេធកាលពីថ្ងៃទី១៧ មេសា រាល់ការជាប់ទាក់ទិនក្នុងការលិចនាវានេះ ដោយចោទប្រកាន់ពួកប៉ូលិសស្ដាំនិយម “និងពួកក្បត់ក្រុងសេអ៊ូល” ដទៃៗទៀតថា ចង់ទំលាក់ការទទួលខុសត្រូវចំពោះគ្រោះថ្នាក់គួរឱ្យសោកស្ដាយនេះលើខ្លួន ហើយសំដែងនូវសមានចិត្ដចំពោះបណ្ដាអ្នករងគ្រោះ ។
ទោះបីជាយ៉ាងណារដ្ឋមន្ដ្រីការបរទេសអាមេរិកលោកស្រីហ៊ីលឡារី គ្លីនតុន ថ្លែង កាលពីថ្ងៃទី២៣ មេសា ដោយសង្ឃឹមថា គ្មានសកម្មភាពណាមួយ ឬការភាន់ច្រឡំណាមួយនឹងញ៉ាំងឱ្យមានសង្គ្រាមថ្មីរវាងកូរ៉េទាំង២ឡើយ ៕
ចែករំលែកព័តមាននេះ