ទីក្រុងបាងកក ៖ យោងតាមការព្យាករណ៍ពីសាកលវិទ្យាល័យសភាពាណិជ្ជកម្មថៃ ហៅកាត់ថា UTCC បានបង្ហាញថា ប្រទេសថៃអាចបាត់បង់រហូតដល់ ២០០ពាន់លានបាត ដែលស្មើនឹង ៦,១៤ពាន់លានដុល្លារអាមេរិកក្នុងតម្លៃនាំចេញនៅឆ្នាំនេះ…
ទីក្រុងបាងកក ៖ យោងតាមការព្យាករណ៍ពីសាកលវិទ្យាល័យសភាពាណិជ្ជកម្មថៃ ហៅកាត់ថា UTCC បានបង្ហាញថា ប្រទេសថៃអាចបាត់បង់រហូតដល់ ២០០ពាន់លានបាត ដែលស្មើនឹង ៦,១៤ពាន់លានដុល្លារអាមេរិកក្នុងតម្លៃនាំចេញនៅឆ្នាំនេះ នៅពេលដែលសហរដ្ឋអាមេរិកដាក់ពន្ធថ្មីចាប់ពី ២៥% ទៅ ៣៦% លើទំនិញពីប្រទេសថៃ ចូលជាធរមាននៅខែក្រោយ។
លោក Thanavath Phonvichai ប្រធាន UTCC បានកត់សម្គាល់ថា នៅតែមានឱកាសសម្រាប់ប្រទេសថៃក្នុងការចរចាលើអត្រាពន្ធអនុគ្រោះបន្ថែមទៀត ដោយអាចបញ្ចុះមកត្រឹម ២០% មុនពេលចូលជាធរមាននៅថ្ងៃទី១ ខែសីហា ឆ្នាំ២០២៥។ ប៉ុន្តែលោកបានសង្កត់ធ្ងន់ថា កិច្ចព្រមព្រៀងចុងក្រោយជាមួយអាមេរិកគឺនៅឆ្ងាយពីភាពជាក់លាក់។
ការព្រួយបារម្ភបន្ថែមទៀត លោកបានព្រមានថា អស្ថិរភាពនយោបាយក្នុងស្រុក ដូចជា ការរំលាយសភា ឬការខកខានរបស់រដ្ឋាភិបាលក្នុងការអនុម័តថវិកាជំរុញសេដ្ឋកិច្ច អាចកាត់បន្ថយកំណើនផលិតផលក្នុងស្រុកសរុប (GDP) ចំនួន ១%។ នៅក្នុងស្ថានភាពបែបនេះ កំណើនសេដ្ឋកិច្ចរបស់ប្រទេសថៃអាចនឹងធ្លាក់ចុះក្រោម ១% សម្រាប់ឆ្នាំនេះ ដែលស្ថិតនៅក្រោមការព្យាករណ៍ពីមុន ១,៧%។
ប្រសិនបើពន្ធថ្មីរបស់សហរដ្ឋអាមេរិកពី ២៥% ទៅ ៣៦% នៅតែដំណើរការពេញ១ឆ្នាំនោះ UTCC បានប៉ាន់ប្រមាណថា ការនាំចេញដែលមានតម្លៃចន្លោះចាប់ពី ៤០០-៦០០ពាន់លានបាត ឬស្មើប្រមាណ ១២-១៨ពាន់លានដុល្លារ អាចរងផលប៉ះពាល់។ UTCC ក៏បានរាយការណ៍ពីការធ្លាក់ចុះនៃសន្ទស្សន៍ទំនុកចិត្តអ្នកប្រើប្រាស់ក្នុងស្រុក ដែលបានធ្លាក់ចុះដល់ ៥២,៧ ពិន្ទុក្នុងខែមិថុនាកន្លងទៅ ដែលជាកម្រិតទាបបំផុតក្នុងរយៈពេល២៨ខែ ចំពេលមានការធ្លាក់ចុះនៃសុទិដ្ឋិនិយមជាសាធារណៈ៕ ប្រភព ៖ VNA
ចែករំលែកព័តមាននេះ