រាជធានីភ្នំពេញ ៖ ថ្លែងពីទឹកដីខេត្តកំពង់ឆ្នាំង សម្ដេចបវរធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ដ្រី នៃកម្ពុជា បានគូសបញ្ជាក់ជាថ្មី…
រាជធានីភ្នំពេញ ៖ ថ្លែងពីទឹកដីខេត្តកំពង់ឆ្នាំង សម្ដេចបវរធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ដ្រី នៃកម្ពុជា បានគូសបញ្ជាក់ជាថ្មី អំពីជំហរដាច់ណាត់ ក្នុងការបើកច្រកទ្វារព្រំដែនរវាងកម្ពុជា-ថៃ ឡើងវិញ ហើយកម្ពុជារក្សាសិទ្ធិប្រើប្រាស់គ្រប់មធ្យោបាយ ក្នុងការការពារបូរណភាពទឹកដី ។
សម្តេចបានអះអាងថា ការបើកច្រកទ្វារព្រំដែន មិនលំបាកនោះទេ ពោលគឺកូនសោប្រគល់ឲ្យភាគីថៃរួចរាល់ហើយ ត្រង់ការសម្រេចគឺស្ថិតនៅលើភាគីថៃ កម្ពុជាត្រៀមអនុវត្តតាមក្រោយ បើសិនថៃបើកព្រំដែនឡើងវិញ ហើយការបើក គឺត្រូវបើកទាំងអស់ដំណើរការដូចដើម ។
ថ្លែងក្នុងឱកាសសម្ពោធប្រើប្រាស់សមិទ្ធផល នៃមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ និងអបអរសាទរខួបលើកទី៣២ ទិវាកងរាជអាវុធហត្ថ នាព្រឹកថ្ងៃទី១៤ ខែកក្កដា ឆ្នាំ២០២៥ នៅខេត្តកំពង់ឆ្នាំ សម្ដេចមហាបវរធិបតី ហ៊ុន ម៉ាណែត បានផ្ដល់លក្ខខណ្ឌ ៣ចំណុច ដល់ភាគីថៃ សម្រាប់ការបើកព្រំដែនឡើងវិញនេះ ដោយក្នុងនោះ ទី១៖ ថៃប្រកាសបើកមុន ហើយប្រកាសមិនបិទជាឯកតោភាគីជាថ្មី, ទី២៖ បើកគ្រប់ច្រក មិនមែនបើកខ្លះ បិទខ្លះនោះទេ និងទី៣៖ បើកដំណើរការប្រក្រតីភាពវិញ ឲ្យដូចមុនថ្ងៃទី៧ ខែមិថុនា ។
សម្ដេចបវរធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា ៖ «កម្ពុជាចង់បានសាមញ្ញបំផុត រឿងបើកច្រកនេះ សុំតែបីលក្ខខណ្ឌទេ ហើយសោប្រគល់ឲ្យភាគីថៃហើយ បើកចុះ មិនចាំបាច់អង្គុយចរចាទេ។ ទី១៖ ថៃប្រកាសបើកមុនជាឯកតោភាគី ហើយបញ្ជាក់ថា មិនប្រើប្រាស់វិធានការបិទជាឯកតោភាគី ហើយបើកឲ្យដូចមុនថ្ងៃទី៧ ខែមិថុនា, ទី២៖ បើកម្ដង បើកគ្រប់ច្រកទាំងអស់ មិនមែនបើកមួយទុកមួយនោះទេ និងទី៣៖ បើកឲ្យដូចស្ថានភាពមុនថ្ងៃទី៧ ខែមិថុនា ពោលម៉ោង៦ព្រឹក ដល់ម៉ោង១០យប់» ។
បើតាមការលើកឡើងរបស់សម្ដេចបវរធិបតី ហ៊ុន ម៉ាណែត បានលើកឡើងថា នៅពេលភាគីថៃ អនុវត្តនូវលក្ខខណ្ឌ៣ចំណុចនេះហើយ យ៉ាងយូរត្រឹមរយៈពេល៥ម៉ោង កម្ពុជានឹងអនុវត្តតាម ពោលគឺបើកគ្រប់ច្រកវិញទាំងអស់ ។
សម្ដេចបានបន្ដថា កម្ពុជាមិនចង់ប្រើប្រាស់វិធានក្នុងការបិទច្រកព្រំដែនោះទេ ប៉ុន្ដែទ្រាំមិនបាន ចំពោះការសម្រេចចិត្តជាឯកតោភាគី ម្ដងហើយ ម្ដងទៀត ពីសំណាក់ក្រុមយោធាថៃ ។
សម្ដេចបវរធិបតី នាយករដ្ឋមន្ដ្រី បានគូសបញ្ជាក់ថា កម្ពុជា មិនចង់លេងបិទពួនដូចថៃកំពុងលេងនោះទេ មិនមែនចង់បិទក៏បិទ ចង់បើកខ្លះទុកខ្លះ ឬបិទបើកតាមទំនើងចិត្តនោះទេ ហើយកម្ពុជា យល់អំពីការលំបាករបស់ប្រជាពលរដ្ឋ ប៉ុន្ដែកម្ពុជា មានសិទ្ធិក្នុងការឆ្លើយតបចំពោះការគំរាមកំហែងរបស់ក្រុមយោធាថៃ។ កម្ពុជា បញ្ជាក់ជំហរច្បាស់ គឺនៅពេលថៃ បើកទាំងអស់ឲ្យវិលមករកប្រក្រតីភាពវិញ កម្ពុជានឹងអនុវត្តតាមក្រោយ ។
ជាមួយគ្នានោះដែរ សម្ដេចធិបតី នាយករដ្ឋមន្ត្រី បានលើកឡើងទៀតថា កម្ពុជាចង់បានដំណោះស្រាយមួយច្បាស់លាស់ មាននិរន្ដរភាព ហើយបញ្ឈប់ការប្រើប្រាស់វិធានច្រកព្រំដែនជាឯកតោភាគីរបស់ថៃ មកធ្វើជាល្បែង ឬធ្វើជាលក្ខខណ្ឌ នៃជីវភាពប្រជាជន ដើម្បីដោះស្រាយបញ្ហាវិវាទព្រំដែននោះទេ ។
សម្ដេចមហាបវរធិបតី ប្រមុខ នៃរាជរដ្ឋាភិបាលកម្ពុជា បានអះអាងថា ការជជែកលើការកែសម្រួលកងទ័ព អាចធ្វើទៅបាន ត្រូវបើកច្រកព្រំដែនឲ្យដូចដើមវិញជាមុនសិន ហើយកម្ពុជា មិនមែនជាអ្នកបង្កបញ្ហានោះឡើយ ដូច្នេះកូនសោដោះស្រាយបញ្ហា គឺស្ថិតនៅលើដៃរបស់ថៃ។ សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា កម្ពុជារក្សាសិទ្ធិប្រើប្រាស់គ្រប់មធ្យោបាយ ក្នុងការការពារបូរណភាពទឹកដី៕
ចែករំលែកព័តមាននេះ