ទីក្រុងកៀវ៖ ប្រេសិតពិសេសអាមេរិក លោកខេត ខេឡក់ (Keith Kellogg) បានទៅដល់រដ្ឋធានីកៀវ ប្រទេសអ៊ុយក្រែនដើម្បីពិភាក្សាអំពីបញ្ហាសន្តិសុខជាតិ និងការដាក់ទណ្ឌកម្មរុស្ស៊ី។ ខាងលើនេះជាការបង្ហើបឱ្យដឹងពីមន្ត្រីរដ្ឋាភិបាលអ៊ុយក្រែន។…
ទីក្រុងកៀវ៖ ប្រេសិតពិសេសអាមេរិក លោកខេត ខេឡក់ (Keith Kellogg) បានទៅដល់រដ្ឋធានីកៀវ ប្រទេសអ៊ុយក្រែនដើម្បីពិភាក្សាអំពីបញ្ហាសន្តិសុខជាតិ និងការដាក់ទណ្ឌកម្មរុស្ស៊ី។ ខាងលើនេះជាការបង្ហើបឱ្យដឹងពីមន្ត្រីរដ្ឋាភិបាលអ៊ុយក្រែន។ រដ្ឋមន្ត្រីការបរទេសអ៊ុយក្រែន លោកអានឌ្រី យេម៉ាក់ (Andriy Yermak) បានបង្ហោះសារនៅលើតេឡេក្រាមថាអ្វីដែលជារបៀបវារៈសំខាន់ៗនៅក្នុងទស្សនកិច្ចនេះមានដូចជាបញ្ហាការពារជាតិ, ការពង្រឹងសន្តិសុខជាតិ, ការផ្ដល់អាវុធ, ការដាក់ទណ្ឌកម្ម (ទៅលើរុស្ស៊ី), ការការពារប្រជាជនរបស់យើង, ការពង្រឹងកិច្ចសហប្រតិបត្តិការរវាងអ៊ុយក្រែន និងអាមេរិក។ល។
ប្រមុខដឹកនាំអ៊ុយក្រែន លោកហ្សេឡិនស្គី ថ្លែងនៅក្នុងសុន្ទរនៅពេលរាត្រីថាលោកបានណែនាំទៅអគ្គបញ្ជាការ និងនាយអគ្គសេនារាយការណ៍អំពីសមត្ថភាពយោធារបស់អ៊ុយក្រែន និងអ្វីដែលអ៊ុយក្រែនចង់បានពីអាមេរិក។ លោកហ្សេឡិនស្គីថ្លែងបន្តទៀតថាលោកខេត ខេឡក់ក៏នឹងជួបសេវាសន្តិសុខជាតិ និងស៊ើបការណ៍សម្ងាត់ផងដែរ។ លោកថ្លែងថានៅសប្ដាហ៍នេះ អ៊ុយក្រែន និងអាមេរិកនឹងចរចាគ្នាដើម្បីស្នើសុំជំនួយ។ លោកចង់ឱ្យអាមេរិកស្វែងយល់ឱ្យបានច្បាស់ថាតើត្រូវធ្វើអ្វីខ្លះដើម្បីបង្ខំឱ្យរុស្ស៊ីទទួលយកការចរចាសន្តិភាព។
ក្រឡេកទៅមើលស្ថានការណ៍សឹកវិញម្ដង។ កាលពីយប់មិញ រុស្ស៊ីវាយប្រហារផ្គួបគ្នាដោយដ្រូន និងមីស៊ីល។ តំបន់ស៊ូមី (Sumy) និងមីកូឡាយ (Mykolaiv) រងការវាយប្រហារខ្លាំងជាងគេ។ ទីភ្នាក់ងារសង្គ្រោះបន្ទាន់នៅតំបន់ទាំង២រាយការណ៍ថាដ្រូនរបស់រុស្ស៊ីវាយប្រហារទៅលើអគារជាច្រើន និងបង្កជាអណ្ដាតភ្លើងឆាបឆេះជាច្រើនកន្លែង។ ប៉ុន្តែសំណាងល្អ គ្មាននរណាម្នាក់រងរបួស ឬស្លាប់ទេ។
នៅក្នុងស្ថានភាពនេះ លោកត្រាំប្រហែលជាទ្រាំមើលការវាយប្រហារនេះតទៅទៀតមិនកើតទេ។ ជាពិសេស បើអ៊ុយក្រែនចាញ់ប្រៀបខ្លាំងនៅក្នុងសង្គ្រាមនេះ ការចរចាគ្នាក៏ពិបាកនឹងនិយាយលក្ខខណ្ឌជាមួយនឹងភាគីម្ខាងទៀតផងដែរ។ ដូច្នេះ លោកសម្រេចថានឹងបញ្ជូនប្រព័ន្ធការពារដែនអាកាសម៉ាកផេទ្រាត (Patriot) ទៅឱ្យអ៊ុយក្រែននៅក្នុងចំនួនប៉ុន្មានពិតប្រាកដមិនទាន់ដឹងនៅឡើយទេ។ ត្រាំយល់ថាខែលការពារដែនអាកាសជារបស់សំខាន់សម្រាប់ទប់ទល់នឹងការវាយប្រហាររបស់រុស្ស៊ី។
លោកត្រាំចាប់ផ្ដើមដាក់ចម្ងល់។ លោកមិនយល់ទាល់តែសោះថាតើលោកពូទីនកំពុងគិតអ្វីសព្វថ្ងៃនេះ? លោកទាំង២សន្ទនាគ្នាតាមទូរស័ព្ទបណ្ដើរៗ រីឯកងទ័ពរុស្ស៊ិបន្តវាយប្រហារអ៊ុយក្រែនដោយដ្រូន និងមីស៊ីលទៅលើទីក្រុងតូចធំរបស់អ៊ុយក្រែនឥតលស់ថ្ងៃ។ លោកត្រាំថាលោកពូទីននិយាយល្អៗតែនឹងមុខលោក។ រួចហើយ គាត់បន្តបាញ់កាំភ្លើងចូលអ៊ុយក្រែនជារៀងរាល់យប់។ ត្រាំថាគាត់ខកចិត្តណាស់ជាមួយពូទីន។
សូមជម្រាបថាផែនការបញ្ជូនខែលការពារដែនអាកាសម៉ាកផេទ្រាតនេះខាងសហភាពអឺរ៉ុបជាអ្នកចេញលុយ១០០%។ នេះបើយោងតាមការបញ្ជាក់របស់លោកត្រាំ។ លោកថាធ្វើបែបទើបត្រូវចិត្តរបស់លោក។ លោកគ្រោងជួបអគ្គលេខាធិការអង្គការណាតូនៅពេលឆាប់ៗនេះដើម្បីពិភាក្សាអំពីបញ្ហាអ៊ុយក្រែន និងបញ្ហាដទៃទៀត។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ