ទីក្រុងប្រ៊ុចសែល៖ រដ្ឋជាសមាជិកសហភាពអឺរ៉ុបយល់ថាពន្ធ៣០%ដែលលោកត្រាំកំណត់យកនាដើមខែសីហា (បើគ្មានកិច្ចព្រមព្រៀងពាណិជ្ជកម្មជាមួយគ្នា) ហាក់ដូចជាហួសហេតុពេកហើយ ហើយខ្លួនទទួលយកមិនបានទេ។ ប្រតិកម្មនេះចេញមុនគេពីរដ្ឋមន្ត្រីការបរទេសដាណឺម៉ាក លោកឡាស់ ឡូកេ រ៉ាស់មូសឹន (Lars…
ទីក្រុងប្រ៊ុចសែល៖ រដ្ឋជាសមាជិកសហភាពអឺរ៉ុបយល់ថាពន្ធ៣០%ដែលលោកត្រាំកំណត់យកនាដើមខែសីហា (បើគ្មានកិច្ចព្រមព្រៀងពាណិជ្ជកម្មជាមួយគ្នា) ហាក់ដូចជាហួសហេតុពេកហើយ ហើយខ្លួនទទួលយកមិនបានទេ។ ប្រតិកម្មនេះចេញមុនគេពីរដ្ឋមន្ត្រីការបរទេសដាណឺម៉ាក លោកឡាស់ ឡូកេ រ៉ាស់មូសឹន (Lars Lokke Rasmussen) នៅក្នុងសន្និសីទសារព័ត៌មានជាមួយប្រធានពាណិជ្ជកម្មសហភាពអឺរ៉ុបនៅទីក្រុងប្រ៊ុចសែល។
ឥឡូវនេះ អឺរ៉ុបកំពុងសម្រួចមាត់ចាត់វិធានការសងសឹកវិញដោយឥតបន្ធូរដៃទេបើសិនរយៈពេលជាង២អាទិត្យខាងមុខនេះចរចាមិនត្រូវគ្នាជាមួយអាមេរិកទេ និងបើសិនលោកត្រាំពិតជាដំឡើងពន្ធដូចការប្រកាសមែន។ ដូចអ្វីដែលប្រធានគណៈកម្មការអឺរ៉ុប លោកស្រីឡីយឹន (Leyen) និយាយអីចឹងគឺថាអឺរ៉ុបប្រើយុទ្ធសាស្ត្រមុខ២។ ទី១ប្រើការចរចាឱ្យអស់លទ្ធភាពជាមុនសិន និងទី២បើចរចាមិនត្រូវគ្នាទេគឺមានតែដំឡើងពន្ធលើទំនិញអាមេរិកវិញដើម្បីវាយបក។
អឺរ៉ុបមិនមែនបរិភោគអាហារនឹងត្រឡោកនោះទេ។ បើសហភាពអឺរ៉ុបមិនព្រមចាត់ការដំឡើងពន្ធទៅលើទំនិញអាមេរិកដើម្បីវាយបកវិញទេ អាមេរិកអាចចំណេញពីការយកពន្ធរាប់សិបពាន់លានដុល្លារ។ ទោះបីទឹកលិចដល់ច្រមុះបែបនេះក្ដី ប្រធានពាណិជ្ជកម្មអឺរ៉ុប លោកម៉ារ៉ូស សេកូវិច (Maros Sefcovic) នៅតែមានជំនឿថាផ្លូវចរចានៅតែបើកចំហជានិច្ច។ ដូច្នេះ ត្រូវតែបន្តដើរតាមយុទ្ធសាស្ត្រនេះសិន។
ឧបមាថាគាប់ជួនចៃដន្យប៉ុន្មានអាទិត្យទៅមុខទៀតភាគីទាំង២ចរចាត្រូវរ៉ូវគ្នា កិច្ចព្រមព្រៀងពាណិជ្ជកម្មនោះត្រូវតែឆ្លងកាត់ការយល់ព្រមពីរដ្ឋជាសមាជិកសហភាពអឺរ៉ុប និងសភាអឺរ៉ុប។ លោកថ្លែងបន្តទៀតថាការកំណត់តម្លៃពន្ធគយហួសហេតុដល់ថ្នាក់៣០% ឬលើសនេះនឹងជះឥទ្ធិពលធំធេងណាស់។ ពោលគឺរកស៊ីជាមួយគ្នារវាងអាមេរិក និងអឺរ៉ុបលែងកើតតែម្ដង ខណៈដែលតម្លៃដោះដូរពាណិជ្ជកម្មក្នុងមួយថ្ងៃៗមិនក្រោម៤,៤ពាន់លានអឺរ៉ូនោះឡើយ។ ខាងលើនេះជាការដកស្រង់ប្រភពពីសារព័ត៌មានដឹហ្កាឌាន (The Guardian)៕
ចែករំលែកព័តមាននេះ