លោក ត្រាំ ដាក់ពន្ធ៣៥% លើកាណាដា និងសម្លឹងមើលពន្ធ១៥%ទៅ២០% លើដៃគូពាណិជ្ជកម្មផ្សេងទៀត
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១០ ខែកក្កដា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃទី១០ ខែកក្កដា ឆ្នាំ២០២៥ ថា សហរដ្ឋអាមេរិកនឹងយកពន្ធ ៣៥% លើការនាំចូលពីប្រទេសកាណាដានៅខែក្រោយ ហើយលោកក៏គ្រោងនឹងយកពន្ធចំនួន ១៥% ឬ ២០% លើដៃគូពាណិជ្ជកម្មភាគច្រើនផ្សេងទៀតផងដែរ។
នៅក្នុងលិខិតមួយដែលបានចេញផ្សាយលើបណ្តាញសង្គម លោក ត្រាំ បានប្រាប់នាយករដ្ឋមន្ត្រីកាណាដា លោក Mark Carney ពីអត្រាពន្ធថ្មី ដែលចូលជាធរមាននៅថ្ងៃទី១ ខែសីហា ឆ្នាំ២០២៥ ហើយអត្រានេះនឹងកើនឡើងថែមទៀត ប្រសិនបើកាណាដាចង់ដាក់ពន្ធសងសឹក។ ពន្ធថ្មី ៣៥% គឺជាការកើនឡើងពីអត្រាបច្ចុប្បន្ន ២៥% ដែលលោក ត្រាំ បានកំណត់លើប្រទេសកាណាដា។
មន្ត្រីរដ្ឋបាលម្នាក់បានបង្ហើបថា ពន្ធថ្មី ៣៥% នឹងមិនរាប់បញ្ចូលសម្រាប់ទំនិញក្រោមកិច្ចព្រមព្រៀងរវាងសហរដ្ឋអាមេរិក-ម៉ិកស៊ិក-កាណាដា (USMCA) ក៏ដូចជាពន្ធ ១០% លើថាមពល និងជី នោះទេ បើទោះបីជាលោក ត្រាំ មិនបានធ្វើការសម្រេចចិត្តចុងក្រោយលើបញ្ហាទាំងនោះយ៉ាងណាក៏ដោយ ។
លោក ត្រាំ បានលើកឡើងក្តីបារម្ភអំពីលំហូរថ្នាំញៀន Fentanyl ពីប្រទេសកាណាដា ក៏ដូចជាពន្ធគយ និងរបាំងពាណិជ្ជកម្មមិនមែនពន្ធរបស់កាណាដា ដែលបានប៉ះពាល់ដល់កសិករអាមេរិក ស្របពេលដែលឱនភាពពាណិជ្ជកម្ម គឺជាការគំរាមកំហែងដល់សេដ្ឋកិច្ច និងសន្តិសុខជាតិសហរដ្ឋអាមេរិក។ លោក ត្រាំ បានសរសេរថា «ប្រសិនបើកាណាដាធ្វើការជាមួយខ្ញុំដើម្បីបញ្ឈប់លំហូរថ្នាំញៀន Fentanyl ប្រហែលជាយើងនឹងពិចារណាកែសម្រួលអត្រាពន្ធនេះ»។
យ៉ាងណាមិញ ការិយាល័យនាយករដ្ឋមន្ត្រីកាណាដា មិនបានឆ្លើយតបភ្លាមៗ ចំពោះបញ្ហានេះឡើយ ខណៈដែលលោកនាយករដ្ឋមន្ត្រី Mark Carney បានថ្លែងកាលពីខែមុនថា លោក និងលោក ត្រាំ បានយល់ព្រមបញ្ចប់កិច្ចព្រមព្រៀងសេដ្ឋកិច្ច និងសន្តិសុខថ្មីមួយក្នុងរយៈពេល៣០ថ្ងៃ។
យោងតាមទិន្នន័យការិយាល័យជំរឿនសហរដ្ឋអាមេរិកបានបង្ហាញថា ប្រទេសកាណាដា គឺជាដៃគូពាណិជ្ជកម្មធំទី ២ របស់សហរដ្ឋអាមេរិក បន្ទាប់ពីម៉ិកស៊ិក ហើយក៏ជាអ្នកទិញធំបំផុតរបស់សហរដ្ឋអាមេរិកផងដែរ ដោយពួកគេបានទិញទំនិញពីអាមេរិកលើទឹកប្រាក់ ៣៤៩,៤ពាន់លានដុល្លារកាលពីឆ្នាំមុន ហើយបាននាំចេញទំនិញក្នុងតម្លៃ ៤១២,៧ពាន់លានដុល្លារទៅកាន់សហរដ្ឋអាមេរិក។
សូមជម្រាបថា លោក ត្រាំ បានពង្រីកសង្គ្រាមពាណិជ្ជកម្មរបស់លោកក្នុងពេលប៉ុន្មានថ្ងៃថ្មីៗនេះ ដោយកំណត់ពន្ធថ្មីលើប្រទេសមួយចំនួន រួមទាំងសម្ព័ន្ធមិត្តជប៉ុន និងកូរ៉េខាងត្បូង ជាពិសេសពន្ធ ៥០% លើទង់ដែងផងដែរ។ ក្នុងបទសម្ភាសន៍ជាមួយ NBC News ដែលបានចេញផ្សាយកាលពីថ្ងៃទី៩ ខែកក្កដា កន្លងទៅ លោក ត្រាំ បានថ្លែងថា ដៃគូពាណិជ្ជកម្មផ្សេងទៀតដែលមិនទាន់បានទទួលលិខិតពន្ធថ្មី ទំនងជាប្រឈមមុខនឹងពន្ធ ១៥% ទៅ ២០%។ លោកថា «មិនមែនគ្រប់ប្រទេសត្រូវតែទទួលបានលិខិតនោះទេ។ អ្នកដឹងរឿងនោះហើយ យើងគ្រាន់តែកំណត់ពន្ធរបស់យើងប៉ុណ្ណោះ។ យើងនឹងនិយាយថា ប្រទេសដែលនៅសល់ផ្សេងទៀត នឹងចំណាយលើពន្ធ មិនថា ២០% ឬ ១៥% នោះទេ យើងនឹងធ្វើការលើរឿងនោះឥឡូវនេះ»៕ ប្រភព ៖ Reuters
ចែករំលែកព័តមាននេះ