រាជធានីភ្នំពេញ ៖ បុរសជាគ្រូផ្សំថ្នាំបុរាណម្នាក់មកចំណតរថយន្ត ដើម្បីរង់ចាំជិះរថយន្តឈ្នួលទៅខេត្ត ត្រូវជនសង្ស័យម្នាក់ប្រើល្បិចខ្ចីទូរស័ព្ទតេទៅប្រពន្ធ បែរជាយកទូរស័ព្ទរបស់គាត់រត់ទៅបាត់ បង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺថ្ងៃទី១១ខែកក្កដាឆ្នាំ២០២៥ នៅចំណតរថយន្តទល់មុខមន្ទីរពេទ្យលោកសង្ឃ សង្កាត់ទឹកថ្លា ខណ្ឌសែនសុខ…
រាជធានីភ្នំពេញ ៖ បុរសជាគ្រូផ្សំថ្នាំបុរាណម្នាក់មកចំណតរថយន្ត ដើម្បីរង់ចាំជិះរថយន្តឈ្នួលទៅខេត្ត ត្រូវជនសង្ស័យម្នាក់ប្រើល្បិចខ្ចីទូរស័ព្ទតេទៅប្រពន្ធ បែរជាយកទូរស័ព្ទរបស់គាត់រត់ទៅបាត់ បង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺថ្ងៃទី១១ខែកក្កដាឆ្នាំ២០២៥ នៅចំណតរថយន្តទល់មុខមន្ទីរពេទ្យលោកសង្ឃ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
តាមប្រភពពត៌មានពីលោកគ្រូផ្សំថ្នាំបុរាណបាននិយាយប្រាប់ថា នៅមុនពេលកើតហេតុ គាត់ធ្វើដំណើរតាមរថយន្តឈ្នួលមកពីក្រុងព្រះសីហនុ ក្នុងគោលបំណងទៅដើរលក់ថ្នាំនិងព្យាបាលជម្ងឺនៅខេត្តរតនគិរី បានមកឈប់នៅចំណតរថយន្តនៅមន្ទីរពេទ្យព្រះកុសមៈនៅវេលាម៉ោង១០យប់ ដើម្បីរង់ចាំនៅចំណតរថយន្តនៅគល់ស្ពានអាកាស៧មករាជិតមន្ទីរពេទ្យព្រះកុសមៈ រង់ចាំជិះរថយន្តបន្តទៀតនៅវេលាម៉ោង៦ព្រឹកដើម្បីធ្វើដំណើរទៅខេត្តរតនគីរី ។
តាមប្រភពពីលោកគ្រូផ្សំថ្នាំបុរាណបានបន្តថា ខណៈពេលគាត់កំពុងរង់ចាំរថយន្ដឈ្នួលនៅគល់ស្ពានអាកាស៧មករា ក៏ស្រាប់តែមានជនសង្ស័យម្នាក់មកខ្ចីទូរស័ព្ទគាត់ថាខលទៅប្រពន្ធ ហើយជនសង្ស័យបានយកទូរស័ព្ទដើរចេញពីកន្លែងកើតហេតុ ចំណែកគាត់ក៏បានដើរតាមពីក្រោយ ។ បន្ទាប់មកជនសង្ស័យម្នាក់ខាងលើបានបញ្ចេញកាំបិតមកគំរាមគាត់ តែគាត់សោកស្ដាយទូរស័ព្ទគាត់ផងនោះ បានដេញតាមជនសង្ស័យ រត់ចូលម្តុំតំបន់ស្មុគស្មាញ គេចខ្លួនបាត់តែម្តង ទើបគាត់មកចំណតរថយន្ដឈ្នួលវិញភ្លាមៗ ។
តាមប្រភពពីលោកគ្រូផ្សំថ្នាំបុរាណខាងលើបានបញ្ជាក់ទៀតថា នៅក្នុងខ្លួនគាត់មិនមានថវិកាជាប់ខ្លួនឡើយ មានតែបំវេចសំលៀកបំពាក់ និងមេមាន់មួយ ដែលអ្នកជម្ងឺពេលដែលគាត់ព្យាបាលជាគេឲ្យ ។
ក្រោយពេលកើតហេតុ បងប្អូនប្រជាពលរដ្ឋបានទាក់ទងទៅនគរបាលប៉ុស្តិ៍សង្កាត់ទឹកថ្លាមកនាំគាត់ទៅដាក់ពាក្យបណ្ដឹងដើម្បីអោយសមត្ថកិច្ចស្រាវជ្រាវតាមចាប់ជនសង្ស័យខាងលើមកផ្តន្ទាទោសតាមច្បាប់ ៕
ចែករំលែកព័តមាននេះ