រាជធានីភ្នំពេញ ៖ បុរសម្នាក់បានបើករថយន្តស្ទូច១គ្រឿងទៅបើកលុយនៅទូនៅ ATM មួយកន្លែង ហើយពេលទៅដល់បានឈប់រថយន្តនៅមុខច្រកចូលទីតាំងឆៀករថយន្ត ក៏ត្រូវបានសន្តិសុខប្រាប់ឲ្យថយក្រោយបន្តិចវិញ ដើម្បីកុំឲ្យបាំងច្រកចេញ ចូល ។…
រាជធានីភ្នំពេញ ៖ បុរសម្នាក់បានបើករថយន្តស្ទូច១គ្រឿងទៅបើកលុយនៅទូនៅ ATM មួយកន្លែង ហើយពេលទៅដល់បានឈប់រថយន្តនៅមុខច្រកចូលទីតាំងឆៀករថយន្ត ក៏ត្រូវបានសន្តិសុខប្រាប់ឲ្យថយក្រោយបន្តិចវិញ ដើម្បីកុំឲ្យបាំងច្រកចេញ ចូល ។ ខណៈនោះគាត់ក៏បានបើករថយន្តរថយក្រោយ ស្រាប់តែជ្រុលទៅបុកបង្គោលភ្លើងដែក១ដើម បណ្ដាលឲ្យបាក់រាបដល់ដីរងការខូចខាតទាំងស្រុង ហើយបើតាមនគរបាលប្រាប់ថាបង្គោលភ្លើងនោះ១ដើមថ្លៃ៣ពាន់ដុល្លារ ។
ឧប្បត្តិហេតុនោះបានកើតឡើងកាលពីវេលាម៉ោង៩និង២៥នាទីព្រឹកថ្ងៃទី០៩ ខែកក្កដា ឆ្នាំ២០២៥ នៅត្រង់ចំណុចមុខមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) ស្ថិតនៅតាមបណ្ដោយផ្លូវជាតិេលេខ៤ ក្នុងភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមប្រជាពលរដ្ឋស្ថិតនៅជិតទីតាំងនោះបាននិយាយថា ពួកគាត់មិនបានស្គាល់អត្តសញ្ញាណបុរសខាងលើនោះទេ ហើយនៅមុនពេលកើតហេតុ បុរសរូបនោះបើកបររថយន្តស្ទូច១គ្រឿង ម៉ាកហុីយ៉ាន់ដាយពណ៍ស ពាក់ស្លាកលេខភ្នំពេញ3H-1043 ទៅឈប់នៅមុខច្រកចូលទីតាំងឆៀករថយន្ត ដើម្បីបើកលុយនៅទូATM ជិតនោះ ។ ខណៈនោះត្រូវបានសន្តិសុខយាមនៅទីតាំងឆៀកនោះប្រាប់ឲ្យថយក្រោយបន្តិច ដើម្បីទុកច្រកសម្រាប់ឲ្យរថយន្តចេញ ចូលទៅក្នុងទីតាំងឆៀករថយន្តខាងលើ ទើបបុរសនោះបើកបររថយន្តថយក្រោយ ហើយក៏បុកបង្គោលភ្លើងដែក បណ្ដាលឲ្យបាក់រាបដល់ដីតែម្ដង ។
នគរបាលបានប្រាប់ថា បង្គោលភ្លើងនោះក្នុង១ដើមថ្លៃ៣ពាន់ដុល្លារ ហើយក្រោយពេលកើតហេតុ រថយន្តនោះរួមទាំងបុរសអ្នកបើកបរ ក៏ត្រូវបាននគរបាលប៉ុស្តិ៍ចោមចៅទី៣ ឃាត់ភ្លាមៗ ។ រួចប្រគល់នគរបាលការិយាល័យចរាចរណ៍នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយ ប៉ុន្តែមិនដឹងថាតើតម្រូវឲ្យបុរសនោះចេញថ្លៃជួសជុលបង្គោលភ្លើង ឬក៏ចេញសំណងបង្គោលភ្លើងថ្មីនោះឡើយ ៕
ចែករំលែកព័តមាននេះ