នៅពេលនេះ អង្គភាពប្រឆាំងអំពើពុករលួយដែលគេនិយមហៅកាត់ថា ACU បានកំពុងតែដំណើរការស៊ើបអង្កេតលើមន្ត្រីជាន់ខ្ពស់ពីររូប ដែលពាក់ព័ន្ធនឹងសំណុំរឿងដ៏ចម្រូងចម្រាស់ដែលមានបណ្តឹងរាប់ពាន់នាក់ពាក់ព័ន្ធនឹងរឿងបោកប្រាស់ ដែលមានតម្លៃរាប់សិបលានដុល្លារនៅក្នុងខេត្តសៀមរាប ។ មន្ត្រីថ្នាក់ទាំងពីររូបបានត្រូវគេដឹងថា បានពាក់ព័ន្ធនឹងសំណុំរឿងនេះ ចាប់តាំងពីអតីតឧកញ៉ា…
នៅពេលនេះ អង្គភាពប្រឆាំងអំពើពុករលួយដែលគេនិយមហៅកាត់ថា ACU បានកំពុងតែដំណើរការស៊ើបអង្កេតលើមន្ត្រីជាន់ខ្ពស់ពីររូប ដែលពាក់ព័ន្ធនឹងសំណុំរឿងដ៏ចម្រូងចម្រាស់ដែលមានបណ្តឹងរាប់ពាន់នាក់ពាក់ព័ន្ធនឹងរឿងបោកប្រាស់ ដែលមានតម្លៃរាប់សិបលានដុល្លារនៅក្នុងខេត្តសៀមរាប ។
មន្ត្រីថ្នាក់ទាំងពីររូបបានត្រូវគេដឹងថា បានពាក់ព័ន្ធនឹងសំណុំរឿងនេះ ចាប់តាំងពីអតីតឧកញ៉ា ឡេង ចាន់ណា ដែលជាអគ្គនាយិកាក្រុមហ៊ុន ប្រ៊ីលានស៊ីធី និង បក្ខពួកចំនួន២នាក់ទៀតត្រូវបានតុលាការសាលាដំបូងខេត្តសៀមរាប ចោទប្រកាន់ចំនួន ៣បទល្មើសធំ គឺពីបទឆបោកមានស្ថានទម្ងន់ទោស, មិនបំពេញកាតព្វកិច្ចឧបករណ៍ដែលអាចជួញដូរបាន និងសម្អាតប្រាក់ ហើយត្រូវបានសមត្ថកិច្ចខេត្តសៀមរាប ឃាត់ខ្លួននៅថ្ងៃទី១២ ខែមីនា ឆ្នាំ២០២៤ មកម្ល៉េះ។
ចាប់តាំងពីមានរឿងអាស្រូវនេះកើតឡើងមក មន្ត្រីថ្នាក់នយោបាយទាំងពីររូបហាក់បានបាត់ខ្លួនពីកម្មវិធីសាធារណៈនានា ក្រោយពេលដែលប្រជាពលរដ្ឋនៅតែបន្តទាមទារចំណាត់ការផ្លូវច្បាប់ និងទាមទារស្វែងរកប្រាក់កាសដែលពួកគេបានបាត់បង់ក្រោយពេលដែលពួកគេរងគ្រោះនឹងការឆបោកឱ្យដាក់ប្រាក់វិនិយោគក្រោមរូបភាពទទួលបានការប្រាក់ប្រចាំខែ ក្នុងអត្រាខ្ពស់ និងបទល្មើសឆបោករំលោ.ភលើទំនុកចិត្ត ព្រមទាំងចេញមូលប្បទានបត្រ គ្មានសាច់ប្រាក់ ។
ចំណាត់ការផ្លូវច្បាប់ លើមន្ត្រីជាន់ខ្ពស់ទាំងពីររូបទំនងជាអាចចំណាយពេលវេលាស្រាវជ្រាវបន្តិចពីព្រោះនេះ គឺជាសំណុំរឿងមួយដែលអាចចាត់ទុកថា ធំ ហើយចាប់តាំងពីជនសង្ស័យដែលពាក់ព័ន្ធនឹងករណីនេះជិត២ឆ្នាំមកហើយតុលាការហាក់មិនទាន់ចេញចំណាត់ការនៅឡើយ ។
អាជ្ញាធរ អាចនឹងប្រើប្រាស់ពេលវេលាបន្ថែមទៀតក្រោយពេលដែល ACU កាលពីថ្ងៃទី៣ ខែកក្កដា ឆ្នាំ២០២៥ បានប្រកាសបើកការស៊ើបអង្កេតទៅលើលោក ស៊ាន បូរ៉ាត និងលោកឧត្តមសេនីយ៍ឯក ស ថាវី អនុរដ្ឋលេខាធិការក្រសួងការពារជាតិស្របពេលដែលតុលាការខេត្តសៀមរាបបានបញ្ជូនសំណុំរឿងករណីអតីតឧកញ៉ា គឺអ្នកស្រី ឡេង ចាន់ណា និងបក្ខពួក ចំនួន៣២ សំណុំរឿងមកអង្គភាពប្រឆាំងអំពើពុករលួយផងដែរ ។
នៅក្នុងសំណុំរឿងនេះ តុលាការខេត្តសៀមរាប បានចំណាយពេលវេលាប្រមាណជាជិតពីរឆ្នាំ គឺបានកសាងសំណុំរឿងទាំង៣២នេះមានទាំងអស់២៤.៨៥២ទំព័រ ហើយតាមការការបញ្ជាក់របស់ ACU គឺបានចាត់តាំងមន្ត្រីដល់ទៅ១០រូប អានឯកសារទាំងនេះមួយខែ ។
ពិនិត្យតាមខ្លឹមសារ និងបែបបទការងារដែល ACU បានប្រកាសនៅក្នុងករណីដែលខ្លួនរកឃើញទោសកំហុសនោះ មន្ត្រីនយោបាយទាំងពីរពិបាកនឹងរួចខ្លួនណាស់ពីព្រោះ ACU បានបញ្ជាក់ច្បាស់ៗថា មន្ត្រីទាំងពីរមិនមែនជាអ្នកសាក្សីទៀតនោះទេ គឺជាជនសង្ស័យនៃសំណុំរឿងនេះតែម្តង ។
សំណុំរឿងនេះមិនតូចតាចឡើយ ដូច្នេះហើយបានជាស្ថាប័នពាក់ព័ន្ធដែលមាន អាជ្ញាធរតុលាការ និងACU បានធ្វើជាបន្តបន្ទាប់តាមជំហានៗតាំងពីការចាប់ខ្លួនអ្នកសង្ស័យបំផុតអ្នកពាក់ព័ន្ធហើយស៊ើបអង្កេតពីព្រោះសំណុំរឿងនេះវាមានទឹកប្រាក់រហូតដល់៣០០លានដុល្លារ ។ ទឹកប្រាក់ទាំងនេះត្រូវបានសារព័ត៌មានមួយចំនួនធ្វើសេចក្តីរាយការណ៍ថា ត្រូវបានពលរដ្ឋប្រមាណជា៥ពាន់គ្រួសារចោទប្រកាន់អតីតឧកញ៉ា ឡេង ចាន់ណា ថាបានធ្វើសកម្មភាពឆបោ.កប្រាស់ពួកគេ ។
ក្រោយពេលដែលរឿងនេះ ត្រូវបានទម្លាយ លោក ស៊ាន បូរ៉ាត និងលោក ស ថាវី ក៏ត្រូវបានសាលាដំបូងខេត្តសៀមរាបកោះហៅទៅបំភ្លឺក្នុងនាមជាសាក្សីកាលពីចុងឆ្នាំ២០២៤ ។ នេះ គឺជាដំណើរការផ្លូវច្បាប់ជំហានដំបូងដោយពេលនោះជាការកោះហៅ ដើម្បីស្តាប់ដំណើរសាច់រឿងឆបោក ដែលអតីតឧកញ៉ា ឡេង ចាន់ណា ប្រព្រឹត្តនៅអំឡុងឆ្នាំ២០១៨ ក្នុងភូមិតាវៀនសង្កាត់សាលាកំរើក ក្រុងសៀមរាប ខេត្តសៀមរាប ។
សរុបមកវិញនេះ គឺជាសំណុំរឿងបោកប្រាស់ដ៏ធំបំផុតមួយនៅកម្ពុជា ហើយក៏ជាមេរៀនមួយសម្រាប់ប្រាប់មន្ត្រីសាធារណៈនានាកុំអោយពាក់ព័ន្ធនឹងរឿងអំពើពុករលួយបែបនេះ ។ បើមិនដូច្នេះទេ នឹងមានរឿងរសេមរសាមដល់ខ្លួន ។ មន្ត្រីសាធារណៈ គឺគួរតែជាមន្ត្រីបម្រើរាស្ត្រមានតួនាទីភារកិច្ចផ្តល់សេវាកម្មដល់ពលរដ្ឋតាមតួនាទី និងភារកិច្ចមិនមែនយកតួនាទី និងភារកិច្ច ដើម្បីលាភសក្ការៈនោះទេ ។
រឿងនេះ អាចជាករណីអំពើពុករលួយលើកទី១ ដែលសមត្ថកិច្ចបានបំបែកពាក់ព័ន្ធនឹងរឿងវិនិយោគបោកប្រាស់ ខណៈដែលសំណុំរឿងពុករលួយ និងសូកប៉ាន់រត់ការឡើងបុណ្យសក្តិត្រូវបានសមត្ថកិច្ចបង់បានមួយសំណាញ់ធំ ដោយបោសសម្អាតមន្ត្រីថ្នាក់រដ្ឋលេខាធិការ និងមន្ត្រីថ្នាក់មូលដ្ឋានក៏ដូចជាអ្នកដែលពាក់ព័ន្ធជាច្រើនរូបរួចមក ៕
ចែករំលែកព័តមាននេះ