ខេត្តបាត់ដំបង៖ ប្រភពព័ត៏មានពីតំបន់ព្រំដែនខ្មែរ ថៃ បានឲ្យដឹងថា ទាហានព្រំដែនថៃ បានចាប់ខ្លួនពលរដ្ឋខ្មែរចំនួន០២នាក់ ពេលកំពុងព្យាយាមលីសែង«បារី»ជាច្រើនការ៉ុង ឆ្លងដែនចេញពីដីកម្ពុជា ចូលទៅទឹកដីថៃ ដោយខុសច្បាប់…
ខេត្តបាត់ដំបង៖ ប្រភពព័ត៏មានពីតំបន់ព្រំដែនខ្មែរ ថៃ បានឲ្យដឹងថា ទាហានព្រំដែនថៃ បានចាប់ខ្លួនពលរដ្ឋខ្មែរចំនួន០២នាក់ ពេលកំពុងព្យាយាមលីសែង«បារី»ជាច្រើនការ៉ុង ឆ្លងដែនចេញពីដីកម្ពុជា ចូលទៅទឹកដីថៃ ដោយខុសច្បាប់ កាលពីរសៀលថ្ងៃទី ០៥ កក្កដា ត្រង់ចំណុចច្រករបៀង «ប៉ុស្ដ៏គីឡូ៩» ស្ថិតក្នុងទឹកដី ស្រុកសំពៅលូន។
បើយោងតាមប្រព័ន្ធផ្សព្វផ្សាយរបស់ថៃ បានផ្សាយថា ពលរដ្ឋកម្ពុជា ទាំង០២នាក់ដែលត្រូវទាហានថៃចាប់ខ្លួននោះ ម្នាក់ឈ្មោះ កៀត កាយ ប្រុសអាយុ៣១ឆ្នាំ និង ម្នាក់ទៀតឈ្មោះ ខាយ សៀន ប្រុសអាយុ២២ឆ្នាំ។ ជនជាតិខ្មែរទាំង០២នាក់ ត្រូវកម្លាំងទាហានព្រំដែនថៃ ចាប់ខ្លួន ពេលកំពុងឈររ៉េរាក្បែរមាត់អូរព្រំដែន ខាងទឹកដីថៃ ជាមួយនឹងការ៉ុងច្រកបារី ដែលនាំចេញពីទឹកដីខ្មែរ ត្រង់ច្រករបៀង«គីឡូ៩» ក្នុងភូមិសាស្ត្រ ស្រុកសំពៅលូន ខេត្តបាត់ដំបង ឈមនឹងស្រុកខ្លងហាត ខេត្តស្រះកែវ ប្រទេសថៃ។ នៅចំណុចច្រករបៀង«ប៉ុស្ដ៏គីឡូ៩» ក្នុងទឹកដីស្រុកសំពៅលូន ជាប់ព្រំដែន កម្ពុជា ថៃ ជាភូមិសាស្ត្រ ដែលស្ថិតក្រោមការគ្រប់គ្រងរបស់ «វរៈសេនាតូចនគរបាលការពារព្រំដែនគោកលេខ៨១៧» ដឹកនាំដោយលោកវរសេនីយ៏ឯក ម៉ង់ ស៊ី ជាមេបញ្ជាការ។
កោះសន្តិភាព បានព្យាយាមទំនាក់ទំនងតាមទូរស័ព្ធ សុំការបំភ្លឺពីលោក ម៉ង់ ស៊ី មេបញ្ជាការវរសេនាតូចនគរបាលការពារព្រំដែនគោកលេខ៨១៧ ដែលគ្រប់គ្រងច្រករបៀង គីឡូ៩ តែទូរស័ព្ទរបស់លោកមនអាចទំនាក់ទំនងបានឡើយ គិតត្រិមម៉ោង១០ព្រឹកថ្ងៃទី ០៦ កក្កដា។ បើតាមប្រភពព័ត៏មាន ច្រករបៀងមួយនេះ កន្លងមកគេសង្កេតឃើញ ជាច្រកដ៏មមាញឹកបំផុតសម្រាប់ជនទុច្ចរិតនាំទំនិញឆ្លងដែនខុសច្បាប់ រាប់ទាំងការលួចនាំពលករខ្មែរឆ្លងដែនខុសច្បាប់ផង។ ជុំវិញការចាប់ខ្លួនពលរដ្ឋខ្មែរ០២នាក់ ជាមួយនឹងបារីជាច្រើនការ៉ុង ប្រព័ន្ធផ្សព្វផ្សាយថៃ បាននិយាយថា ជនជាតិខ្មែរទាំង០២នាក់នោះ បានជញ្ជូនការ៉ុងច្រកបារី ដល់ម្ខាងអូរព្រដែន ខាងដីថៃ ចំពេលក្រុមទាហានដើរល្បាតក៏ប្រទហឃើញមុខសញ្ញានេះ។
ដោយមានការសង្ស័យ ក្រុមទាហានថៃ ក៏ឃាត់សួរនាំ និង ឆេកឆេរការ៉ុង ក៏ឃើញសុទ្ធតែបារីខុសច្បាប់ ទើបត្រូវចាប់ខ្លួនតែម្ដង។ គេមិនបានប្រាប់ពីប្រភេទបារីទេ តែបានច្រកជាច្រើនការ៉ុង មានចំនួនជាង១៥,០០០កញ្ចប់។
ពាក់ព័ន្ធនឹងឈ្មួញជូញដូរបារីដោយខុសច្បាប់ឆ្លងដែនចេញទៅប្រទេសថៃនេះ បើតាមប្រភពព័ត៏មាន ដែលបានដឹងខ្លះៗ បានបង្ហើបឲ្យដឹងថា មេឈ្មួញរត់ពន្ធបារីនេះ គឺជាអ្នករស់នៅក្នុង ស្រុកសំពៅលូន តែម្ដង។
ប្រភពដដែលៗបានបង្ហើបទៀតថា អ្នកស្រុកសំពៅលូន ភាគច្រើន បានស្គាល់ទាំងមុខ ស្គាល់ទាំងសមាសភាពមេខ្លោងរត់ពន្ធបារី។ ហើយជនជាតិខ្មែរទាំង០២នាក់ ដែលត្រូវទាហានថៃចាប់ខ្លួន ជាមួយនឹងបារីជាង១៥,០០០កញ្ចប់នោះ គឺ ជាកូនចៅរបស់មេឈ្មួញនៅស្រុកសំពៅលូន នេះតែម្ដង។
នេះមិនមែនជាលើកដំបូងទេ ដែលពួកឈ្មួញទុច្ចរិតលួចនាំបារីឆ្លងដែនខុសច្បាប់ចេញទៅប្រទេសថៃ។ ថ្នាក់លើគូរតែធ្វើការស្រាវជ្រាវលើករណីនេះ ដើម្បីវែកមុខមេឈ្មួញទុច្ចរិតរត់ពន្ធបារីឆ្លងដែនខុសច្បាប់ ខណៈដែលព្រំដែនកម្ពុជា ថៃ ត្រូវបានភាគីទាំងពីរបិទខ្ទប់ទាំងស្រុងទៅហើយ បែរជាពួកឈ្មួញទុច្ចរិត នៅតែអាចឃុមឃិតគ្នា លួចរត់ពន្ធទំនិញឆ្លងដែនបានទៀត៕
ចែករំលែកព័តមាននេះ