ទីក្រុងម៉ូស្គូ៖ រុស្ស៊ីថ្លែងថាខ្លួនយកចិត្តទុកដាក់ចំពោះពាក្យសម្ដីរបស់លោកត្រាំដែលថាគាត់ខកចិត្តណាស់និយាយជាមួយលោកពូទីនកាលពីយប់មិញជិតមួយម៉ោងគ្មានបានសាច់ការអ្វីសោះ។ កាលពីសប្ដាហ៍មុន, លោកត្រាំថ្លែងដោយទំនុកចិត្តថាលោកពូទីនកំពុងតែចង់បញ្ចប់សង្គ្រាមអ៊ុយក្រែន។
ប៉ុន្តែបន្ទាប់ពីនិយាយទូរស័ព្ទជាមួយគ្នាជិតមួយម៉ោងយប់មិញ ត្រាំក្រឡាស់សម្ដីភ្លាម។ គាត់ថាតាមមើលទៅ លោកពូទីនប្រហែលជាគ្មានចិត្តចង់បញ្ចប់សង្គ្រាមទេ។ នៅពេលអ្នកសារព័ត៌មានសាកសួរអំពីបញ្ហានេះ អ្នកនាំពាក្យវិមានក្រឹមឡាំង លោកប៉េស្កូស ថ្លែងថាជាការពិត យើងកំពុងតាមដានដោយយកចិត្តទុកដាក់បំផុតចំពោះរាល់ពាក្យសម្ដីរបស់លោកត្រាំ។
កាលពីពេលឃោសនាបោះឆ្នោត លោកត្រាំហ៊ានធានាអះអាងថាប្រើពេលតែ២៤ម៉ោងត្រូវតែបញ្ចប់សង្គ្រាមឱ្យបានព្រោះគាត់មានទំនុកចិត្តថាទំនាក់ទំនងល្អរវាងគាត់ និងលោកពូទីនអាចជួយពន្លឿនការចរចា។ ប៉ុន្តែរហូតមកដល់ពេលនេះធ្មេចបើកៗរយៈពេល៥ខែកន្លះទៅហើយគ្មានឃើញចរចាបានជាលទ្ធផលអ្វីសោះក្រៅពីការដូរឈ្លើយសឹកគ្នាម្ដងៗ១ពាន់នាក់។
អ្នកនាំពាក្យវិមានក្រឹមឡាំងថ្លែងថានៅក្នុងការសន្ទនាគ្នានោះ លោកពូទីនបានជម្រាបជូនលោកត្រាំថារុស្ស៊ីពិតជាប្រាថ្នាចង់បានណាស់ការដោះស្រាយបញ្ហាដោយសន្តិវិធីតាមរយៈដំណោះស្រាយនយោបាយ និងការចរចាគ្នាតាមមធ្យោបាយការទូត។ ប៉ុន្តែទន្ទឹមនឹងនោះ រុស្ស៊ីត្រូវតែបន្តធ្វើនូវអ្វីដែលលោកពូទីនហោះថា «ប្រតិបត្តិការសឹកពិសេស»។ មានន័យថារុស្ស៊ីនឹងបន្តយុទ្ធនាការយោធាដូចភ្លៀងរលឹមរហូតដល់សម្រេចតាមគោលដៅរបស់ខ្លួន។ នោះគឺអ្វីដែលជាឫសគល់នៃសង្គ្រាម។
លោកពូទីនប្រាប់លោកត្រាំថារុស្ស៊ីចង់កំណត់ពេលវេលាសមស្របណាមួយដើម្បីរៀបចំកិច្ចជំនួបដោយផ្ទាល់ជាមួយអ៊ុយក្រែនជាលើកទីបី។ ដូច្នេះនិយាយចុះនិយាយឡើងទៅ សង្គ្រាមអ៊ុយក្រែនប្រហែលជាគ្មានថ្ងៃបញ្ចប់ទេ។ ទណ្ឌកម្មសេដ្ឋកិច្ចក៏ធ្វើអ្វីប្រទេសរុស្ស៊ីមិនកើត ផ្លូវយោធាក៏មិនឈ្នះរុស្ស៊ី។ អ្នកដែលវេទនាគឺយុទ្ធជននៅសមរភូមិមុខដែលពលីជីវិតរាល់ថ្ងៃ, ប្រជាជនដែលរងគ្រាប់មីស៊ីល និងដ្រូនរបស់រុស្ស៊ី និងមនុស្ស១ពិភពលោកដែលរងផលប៉ះពាល់សេដ្ឋកិច្ចដោយសារសង្គ្រាម៕
ចែករំលែកព័តមាននេះ