ទីក្រុងបាងកក៖ ជនជាតិចិនដែលបានបាត់ខ្លួនបន្ទាប់ពីគាត់ចាញ់បោកគេថាធ្វើជាតារាម៉ូដែលនៅប្រទេសថៃនោះឥឡូវនេះគាត់ត្រូវគេជួយសង្គ្រោះបានមកវិញហើយ។ នេះបើយោងតាមការបញ្ជាក់ពីស្ថានទូតចិនប្រចាំទីក្រុងបាងកក ប្រទេសថៃ។ ស្ថានទូតក៏សូមក្រើនរំលឹកទៅពលរដ្ឋចិនដទៃទៀតសូមមេត្តាប្រុងប្រយ័ត្នខ្ពស់ កុំចេះតែទទួលយកការងារអ្វីមួយឆាប់រហ័សពេក។
ស្ថានទូតចិនចេញសេចក្ដីបំភ្លឺថាការជួយសង្គ្រោះជនជាតិចិនឈ្មោះសុង (Zhong) ធ្វើឡើងក្រោមកិច្ចសហការរួមគ្នាពីច្រើនស្ថាប័ន។ ស្ថានទូតបញ្ជាក់តែត្រឹមនេះ និងមិននិយាយលម្អិតពេកទេ។ សូម្បីតែឈ្មោះពេញ ឬភេទរបស់ជនរងគ្រោះក៏ស្ថានទូតមិនបង្ហាញដែរ។ ប៉ុន្តែគេអាចដឹងតម្រុយបន្ថែមទៀតពីសារព័ត៌មានចិនដែលផ្សាយថាជនរងគ្រោះជាបុរសវ័យ២៣ឆ្នាំ។
គាត់ត្រូវបានគេប្រើល្បិចអូសទាញឱ្យធ្វើដំណើរទៅប្រទេសថៃ និងបង្ហួសដំណើរទៅមីយ៉ាន់ម៉ា។ គេប្រាប់គាត់ថាថតរូបដាក់ក្របទស្សនាវដ្ដី។ ដំណើររឿងនេះកើតឡើងតាំងពីដើមខែមិថុនាមកម៉្លេះ។ ប្អូនស្រីរបស់គាត់បានទទួលការហៅទូរស័ព្ទពីគាត់កាលពីប៉ុន្មានសប្ដាហ៍មុន។ ប៉ុន្តែសំឡេងរបស់គាត់ហាក់ដូចជាគួរឱ្យសង្ស័យថាគាត់កំពុងផុងខ្លួនចូលទៅក្នុងអន្ទាក់របស់គេ។
កាលនោះ គាត់ស្ថិតនៅក្នុងទីតាំងអាថ៌កំបាំងមួយនៅមីយ៉ាន់ម៉ា។ ដោយសារមើលសភាពការណ៍ហាក់ដូចជាមិនស្រួល ប្អូនស្រីគាត់ក៏ទាក់ទងទៅសមត្ថកិច្ចនៅទីក្រុងក្វាងចូវ និងបាងកក ហើយបានឈានទៅដល់ការបំបែកសំណុំរឿងនេះ។ នេះបើយោងតាមការផ្សាយរបស់ទូរទស្សន៍រដ្ឋចិន ស៊ីស៊ីធីវី (CCTV)។ ស្ថានទូតចិននៅបាងកកបានក្រើនរំលឹកពលរដ្ឋខ្លួនថាសូមបង្កើនការប្រុងប្រយ័ត្នខ្ពស់។ នៅពេលឃើញគេប្រកាសជ្រើសរើសបុគ្គលិកធ្វើការនៅក្រៅប្រទេសឱ្យប្រាក់ខែខ្ពស់កុំចេះតែប្រថុយឱ្យសោះ។
ការព្រមានរបស់ស្ថានទូតចិនធ្វើឡើងស្របពេលដែលមានការព្រួយបារម្ភកាន់តែខ្លាំងឡើងៗថាជនជាតិចិនកំបុងក្លាយជាផ្ទាំងស៊ីប និងគោលដៅរបស់ក្រុមឆបោក និងក្រុមជួញដូរមនុស្ស។ ថ្ងៃនេះ ស្ថានទូតចិនប្រចាំប្រទេសមីយ៉ាន់ម៉ាបានផ្សព្វផ្សាយសេចក្ដីជូនដំណឹងដ៏វែងអន្លាយមួយនៅលើបណ្ដាញវីឆេត (WeChat) ដើម្បីក្រើនរំលឹកអំពីវិធីឆបោកថ្មីតាមបណ្ដាញទូរគមនាគមន៍៕
ចែករំលែកព័តមាននេះ