ខេត្តកំពត ៖ រយៈពេល៨ថ្ងៃ ពលករខ្មែរមកពីប្រទេសថៃ តាមច្រកទ្វារព្រំដែននានា បន្ទាប់ពីរងការមាក់ងាយរបស់ប្រទេសជិតខាងនោះ បានវិលត្រឡប់ចូលស្រុកកំណើតនៅខេត្តកំពត ប្រមាណជាង ៣០០នាក់។ ប្រសិនបើពលរដ្ឋខ្មែរ…
ខេត្តកំពត ៖ រយៈពេល៨ថ្ងៃ ពលករខ្មែរមកពីប្រទេសថៃ តាមច្រកទ្វារព្រំដែននានា បន្ទាប់ពីរងការមាក់ងាយរបស់ប្រទេសជិតខាងនោះ បានវិលត្រឡប់ចូលស្រុកកំណើតនៅខេត្តកំពត ប្រមាណជាង ៣០០នាក់។ ប្រសិនបើពលរដ្ឋខ្មែរ ដែលបានត្រឡប់មកលំនៅស្ថានហើយមានបំណងរកការងារធ្វើ ដោយមិនចង់រៀនយកជំនាញផ្សេងៗ ជាជំហានដំបូង រដ្ឋបាលខេត្តកំពត មានការងារផ្តល់ជូនជាង ៧០០កន្លែង ។
លោក ហេង ណារ៉ុង អនុប្រធានមន្ទីរការងារ និងបណ្តុះបណ្តាលវិជ្ជាជីៈខេត្តកំពត បានប្រាប់ឱ្យដឹងថា ផ្អែកតាមសេចក្តីណែនាំរបស់ឯកឧត្តម ហេង សួរ ពិសេសក្រោមកិច្ចចង្អុលការពីលោក ម៉ៅ ធនិន អភិបាលខេត្តកំពត មន្ទីរការងារ និងបណ្តុះបណ្តាលវិជ្ជាជីវៈខេត្ត សហការជាមួយរដ្ឋបាលខេត្ត ដឹកនាំដោយលោក មឿង គង្គា អភិបាលរងខេត្ត ក្រុមការងារ ព្រមទាំងមន្ត្រីជំនាញពាក់ព័ន្ធ បានចុះដល់គ្រប់ច្រកទ្វារព្រំដែន ដើម្បីជួបស្វាគមន៍ សម្របសម្រួល និងទទួលពលករត្រឡប់មកពីប្រទេសថៃវិល ចូលស្រុកកំណើតវិញ ។
លោកបានបន្តថា គិតចាប់ពីថ្ងៃទី២៥ ខែមិថុនា រហូតដល់ល្ងាចថ្ងៃទី២ ខែកក្កដា ឆ្នាំ២០២៥ ពលករដែលមានស្រុកកំណើតនៅខេត្តកំពតចំនួន ៣១៩នាក់ ស្រី ១០១នាក់ បានឆ្លងផុតច្រកទ្វារនានា ចូលដល់កម្ពុជាប្រកបដោយសុវត្ថិភាព ។
លោកអនុប្រធានមន្ទីរ បានបញ្ចាក់ថា បន្ទាប់ពីទទួលបានការទំនុកបម្រុងសម្រាប់ម្ហូបអាហារ ពលករទាំងនោះ បាននិងកំពុងបន្តដំណើរទៅកាន់លំនៅស្ថានរៀងៗខ្លួនតាមរយៈក្រុមការងារ និងរថយន្តរបស់រដ្ឋបាលខេត្ត ដោយមិនតម្រូវឱ្យចំណាយថវិកាផ្ទាល់ខ្លួនឡើយ។ ពលករ ដែលបានមកដល់ស្រុកកំណើតហើយ ចង់សិក្សាជំនាញ មន្ទីរការងារ នឹងបើកវគ្គបណ្តុះបណ្តាលជូន ដើម្បីបងប្អូនមានទុកសម្រាប់ចាប់យកអាជីពណាមួយ ស្របតាមគោលនយោបាយរបស់រាជរដ្ឋាភិបាល។ ប៉ុន្តែបើពួកគាត់ចង់បានការងារធ្វើបន្ទាន់នោះ ជាជំហានដំបូង រដ្ឋបាលខេត្តកំពត តាមរយៈមន្ទីរការងារ និងបណ្តុះបណ្តាលវិជ្ជាជីវៈ មានកន្លែងចំនួន ៧២៩នាក់ លើផ្នែកផ្សេងៗ ដូចជា រោងចក្រផលិតស្បែកជើង, សេវាសណ្ឋាគារ, គ្រឹះស្ថានហិរញ្ញវត្ថុ និងធានារ៉ាប់រងជាដើម ៕
ចែករំលែកព័តមាននេះ