ទីក្រុងបាងកក៖ ថ្មីៗនេះ សមត្ថកិច្ចថៃឆ្មក់ចូលទីតាំងឆបោកអនឡាញមួយកន្លែងនៅខេត្តឆៀងម៉ៃ និងចាប់បានជនជាតិបរទេស១៧នាក់។ ពួកគេជាមុខសញ្ញាឆបោកដែលបានជំរិតទារប្រាក់ពីជនជាតិចិនមួយសែននាក់បានប្រាក់លើសពី១៤លានដុល្លារ។ នគរបាលថៃបានឆ្មក់ចូលផ្ទះវីឡាសង់នៅលើដីឡូតិ៍មួយកន្លែងនៃស្រុកហាងដុង (Hang Dong) ខេត្តឆៀងម៉ៃ។
ទីនេះជាទីបញ្ជាការធំសម្រាប់បើកប្រតិបត្តិការឆបោក។ ជនជាតិថៃស៊ីឈ្នួលឈរឈ្មោះឱ្យក្រុមម៉ាស់ផ្ចាចិនទិញផ្ទះវីឡានេះដើម្បីធ្វើសកម្មភាពឆបោក។ នេះបើយោងតាមលោកគ្រីតថាផន យីសាខន (Krittapon Yisakorn) ជាស្នងការនគរបាលខេត្តឆៀងម៉ៃ។ លោកបានដឹកនាំកម្លាំងពីច្រើនអង្គភាពមានតាំងពីក្រុមប្រឆាំងបទល្មើសបច្ចេកវិទ្យា, ផ្នែកវិភាគព័ត៌មានសម្ងាត់ និងផ្នែកដទៃទៀត។
នៅពេលសមត្ថកិច្ចចុះទៅដល់ឃើញទូរស័ព្ទចល័ត២៦គ្រឿងដែលត្រូវរឹបអូសធ្វើជាវត្ថុតាង។ នៅក្នុងចំណោមជនជាតិបរទេសដែលឃាត់ខ្លួននោះមានជនជាតិចិន១៥នាក់ និងមីយ៉ាន់ម៉ា២នាក់។ លទ្ធផលស៊ើបអង្កេតបឋមបង្ហាញថាជនជាតិចិនជាងមួយសែននាក់ក្លាយជាជនរងគ្រោះរបស់ក្រុមឆបោកនេះ និងខាតបង់ប្រាក់អស់ជាងមួយរយលានយ័ន្ត ឬស្មើនឹង១៤លានដុល្លារអាមេរិក។
ជនជាតិចិនឆបោកទាំងនោះចូលប្រទេសថៃដោយជ្រកក្រោមផ្លាកជាអ្នកទេសចរ និងនិស្សិត។ ជនជាតិមីយ៉ាន់ម៉ាទាំង២នាក់នោះចូលដីថៃដោយគ្មានឯកសារបញ្ជាក់ទេ។ ឥឡូវនេះ សមត្ថកិច្ចថៃចោទប្រកាន់អ្នកទាំង១៧ពីបទសមគំនិតនៅក្នុងអំពើឆបោក និងចូលរួមនៅក្នុងក្រុមឧក្រិដ្ឋ។ ការស៊ើបអង្កេត និងឈានទៅបំបែកសំណុំរឿងឆបោកនៅផ្ទះវីឡានេះកើតឡើងបន្ទាប់ពីមានករណីក្រុមឆបោកជួលជនជាតិថៃដើម្បីឈរឈ្មោះទិញផ្ទះវីឡា ផ្ទះដីឡូតិ៍ ទិញរហូតដល់សណ្ឋាគារព្រោះពួកគេមានលុយកខ្វក់ច្រើន និងទិញខុនដូនៅប្រទេសថៃភាគខាងជើង។ ឥឡូវនេះពួកគេសម្រុកទិញខ្លាំងណាស់។
បន្ទាប់ពីទិញបានហើយ ពួកគេរៀបចំបណ្ដាញឆបោកតាមអនឡាញ និងប្រើវិធីបោកបញ្ឆោតជនជាតិចិនរស់នៅបរទេសឱ្យចូលស៊ងរបស់ពួកគេដោយបបួលលេងល្បែងអនឡាញ ឬទស្សនាការលេងល្បែងនៅកាស៊ីណូផ្សាយបន្តផ្ទាល់។ ឥឡូវនេះ ប្រទេសថៃក្លាយជាមជ្ឈមមណ្ឌលឆបោកដ៏ធំតាមបណ្ដាញសង្គម និងតាមប្រព័ន្ធទំនាក់ទំនងដទៃទៀត។ សមត្ថកិច្ចថៃកំពុងសហការជាមួយស្ថានកុងស៊ុលចិនដើម្បីស្រាវជ្រាវព័ត៌មានបន្ថែមទៀត។ នៅឆៀងម៉ៃដដែលនេះ សមត្ថកិច្ចធ្លាប់បង្ក្រាបកាលពីប៉ុន្មានខែមុន។ កាលនោះ សមត្ថកិច្ចចាប់ខ្លួនក្រុមឆបោកបានមួយចំនួនដែលជាក្រុមជនជាតិចិនបោកជនជាតិថៃ៕
ចែករំលែកព័តមាននេះ