ទីក្រុងវ៉ាស៊ីនតោន៖ លោកត្រាំប្រកាសថាអ៊ីស្រាអែលឯកភាពទទួលយកបទឈប់បាញ់រយៈពេល៦០ថ្ងៃនៅតំបន់ហ្កាហ្សា។ លោកក៏ឆ្លៀតក្រើនរំលឹកទៅក្រុមហាម៉ាស់គួរទទួលយកបទឈប់បាញ់ដើម្បីកុំឱ្យសភាពការណ៍កាន់តែធ្ងន់ធ្ងរជាងនេះ។ សេចក្ដីប្រកាសនេះធ្វើឡើងតែប៉ុន្មានថ្ងៃប៉ុណ្ណោះមុនពេលលោកណឺតាន់យ៉ាហ៊ូទៅសេតវិមាននៅថ្ងៃចន្ទសប្ដាហ៍ក្រោយ។
លោកត្រាំថ្លែងថាក្រុមអ្នកតំណាងរបស់លោកទើបតែជួបគ្នាជាមួយមន្ត្រីអ៊ីស្រាអែលដើម្បីជជែកគ្នាអំពីបញ្ហាហ្កាហ្សា។ អ៊ីស្រាអែលយល់ព្រមទទួលយកបទឈប់បាញ់រយៈពេល៦០ថ្ងៃ។ នៅអំឡុងពេល៦០ថ្ងៃនោះ យើងនឹងធ្វើការងារជាមួយភាគីពាក់ព័ន្ធទាំងអស់ដើម្បីបិទបញ្ចប់សង្គ្រាម។ លោកថាប្រទេសកាតា និងអេហ្ស៊ីបនឹងយកសំណើនៃបទឈប់បាញ់ទៅឱ្យក្រុមហាម៉ាស់ពិនិត្យមើល។
ទន្ទឹមនឹងការអំពាវនាវឱ្យហាម៉ាស់ទទួលយកបទឈប់បាញ់ លោកត្រាំក៏ឆ្លៀតព្រមានផងដែរថាបើសិនពួកគេមិនទទួលយកទេនឹងមានផលវិបាកធ្ងន់ធ្ងរ។ លោកបង្ហោះសារនៅលើបណ្ដាញសង្គមដោយសេចក្ដីសង្ឃឹមថាហាម៉ាសនឹងទទួលយកបទឈប់បាញ់ដើម្បីជាប្រយោជន៍នៃតំបន់មជ្ឈិមបូព៌ាទាំងមូល។ បើមិនដូច្នេះទេ សភាពការណ៍នឹងចុះដុនដាបកាន់តែខ្លាំង។
ប៉ុន្មានអាទិត្យចុងក្រោយនេះ អាមេរិកបានធ្វើនយោបាយការទូតយ៉ាងខ្លាំងក្លាដោយដាក់សម្ពាធអ៊ីស្រាអែល និងហាម៉ាស់ដើម្បីឱ្យមានកិច្ចព្រមព្រៀង។ លក្ខខណ្ឌនៃការដោះលែងចំណាប់ខ្មាំងត្រូវតែដាក់បញ្ចូលទៅក្នុងសំណើនៃបទឈប់បាញ់។ រដ្ឋមន្ត្រីអ៊ីស្រាអែលទទួលបន្ទុកខាងកិច្ចការយុទ្ធសាស្ត្របានធ្វើដំណើរទៅដល់ទីក្រុងវ៉ាស៊ីនតោនកាលពីយប់មិញដើម្បីជួបមន្ត្រីជាន់ខ្ពស់អាមេរិកដែលរួមមានអនុប្រធានាធិបតីអាមេរិក, រដ្ឋមន្ត្រីការបរទេស និងបេសកជនពិសេសរបស់អាមេរិក លោកស្ទីវវីតខូស។ គោលបំណងធំគឺដើម្បីពិភាក្សាអំពីបទឈប់បាញ់, ការគំរាមកំហែងនៅក្នុងតំបន់ និងបញ្ហាអ៊ីរ៉ង់៕
ចែករំលែកព័តមាននេះ