ទីក្រុងបាងកក៖ ព្រះមហាក្សត្រថៃទ្រង់នឹងឡាយព្រះហស្ថលេខាតែងតាំងលោកភូមិថាម វិឆាយ៉ាឆៃជានាយករដ្ឋមន្ត្រីស្ដីទីបន្ទាប់ពីតុលាការធម្មនុញ្ញសម្រេចព្យួរតំណែងលោកស្រីផែថងថានកាលពីថ្ងៃអង្គារ។ នេះបើយោងតាមចុះផ្សាយរបស់សារព័ត៌មានម៉ាឡេមែល (Malay Mail)។ បន្ទាប់ពីព្យួរតំណែងលោកស្រីផែថងថានថ្មីៗកាលពីថ្ងៃអង្គារ តំណែងនាយករដ្ឋមន្ត្រីស្ដីទីនេះត្រូវធ្លាក់ទៅលើលោកសុរិយា ជុងរូងរួងគីត ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងដឹកជញ្ជូន។
លោកអាចកាន់តំណែងនេះបានតែមួយថ្ងៃគត់។ ដោយសារតំណែងនាយករដ្ឋមន្ត្រីជាកូតារបស់គណបក្សភឿថៃ ហើយលោកស្រីផែថងថានកំពុងជាប់បណ្ដឹងនៅតុលាការ ដូច្នេះ តំណែងនេះត្រូវធ្លាក់ទៅលើលោកភូមថាម វិឆាយ៉ាឆៃដែលជាឧបនាយករដ្ឋមន្ត្រី និងជារដ្ឋមន្ត្រីមហាផ្ទៃនៅក្នុងគណៈរដ្ឋមន្ត្រីថ្មី។
នៅពេលលោកស្បថចូលកាន់តំណែងជារដ្ឋមន្ត្រីមហាផ្ទៃ លោកក៏នឹងស្បថចូលកាន់តំណែងជានាយករដ្ឋមន្ត្រីស្ដីទីផងដែរ។ លោកស្រីផែថងថានចង់ទុកផ្លូវក្រោយសម្រាប់ខ្លួនឯង។ ហេតុនេះ នៅក្នុងបញ្ជីគណៈរដ្ឋមន្ត្រីថ្មី លោកស្រីបានស្នើតំណែងរដ្ឋមន្ត្រីវប្បធម៌សម្រាប់ខ្លួនឯង។ ឧបមាថាតុលាការមិនបោះឆ្នោតព្យួរតំណែងទេ លោកស្រីកាន់ទាំង២ នាយករដ្ឋមន្ត្រីផង និងរដ្ឋមន្ត្រីវប្បធម៌ផង។ ប៉ុន្តែបើតុលាការព្យួរតំណែង លោកស្រីនៅតំណែងរដ្ឋមន្ត្រីវប្បធម៌មួយទៀតគ្រាន់នឹងកាន់។
ឥឡូវនេះបញ្ហាដ៏ធំនៅចំពោះមុខរបស់ប្រទេសថៃគឺការដោះស្រាយបញ្ហាសេដ្ឋកិច្ចដែលកំពុងធ្លាក់ចុះ និងខិតខំចរចាជាមួយអាមេរិកដើម្បីឱ្យមានកិច្ចព្រមព្រៀងពាណិជ្ជកម្មជាមួយគ្នា និងជៀសផុតពីការដំឡើងពន្ធដល់៣៦%។ លោកភូមថាមជាមនុស្សស្មោះស្ម័គ្រដែលគួរឱ្យជឿទុកចិត្តរបស់លោកស្រីផែថងថាន និងលោកថាក់ស៊ីន។ គ្រួសារត្រកូលស៊ីណាវ៉ាត់ធ្លាប់មានឈ្មោះបោះសំឡេង និងកាន់អំណាចនៅប្រទេសថៃតាំងពីឪពុកឆ្លងដល់ម្ដាយមីង និងបន្តមកដល់កូនស្រីទៀត។
គណបក្សដែលមានសម្ព័ន្ធភាពនឹងលោកថាក់ស៊ីនតែងតែមាននិន្នាការប្រឆាំងពួកយោធា, ប្រឆាំងក្រុមអភិរក្សនិយមជានិច្ចចាប់តាំងពីអំឡុងឆ្នាំ២០០០ប្លាយមក។ និន្នាការនេះមានចរិតប្រជានិយម និងមានប្រជាប្រិយភាពខ្ពស់។ ប៉ុន្តែនៅដំណាក់កាលចុងក្រោយនេះ កេរ្តិ៍ឈ្មោះរបស់ក្រុមនេះចាប់ផ្ដើមចុះខ្សោយខ្លាំង (ខូចប្រេន)។ លោកភូមថាមត្រូវគេប្រសិទ្ធនាមថា «សមមិត្តធំ» ដោយសារគាត់ធ្លាប់ចូលរួមចលនាយុវជនឆ្វេងនិយមកាលពីអំឡុងឆ្នាំ១៩៧០ប្លាយប្រឆាំងនឹងមេដឹកនាំរដ្ឋប្រហារយោធា។
ក្រោយមក ចលនាតវ៉ានេះត្រូវគេបង្ក្រាបយ៉ាងចាស់ដៃដោយអំពើហិង្សា។ លោកភូមថាមក៏រត់ចូលព្រៃដើម្បីគេចពីការបង្ក្រាប។ កាលនោះ ពួកថៃកុម្មុយនិស្ត (ថៃក្រហម) កំពុងរៀបចំកម្លាំងបះបោរប្រឆាំងនឹងពួកយោធាដែលកាន់អំណាច។ ក្រោយមកលោកសម្រេចចិត្តចូលរួមនៅក្នុងជីវភាពនយោបាយជាមួយគណបក្សរបស់លោកថាក់ស៊ីនរហូតមកដល់បច្ចុប្បន្ន៕
ចែករំលែកព័តមាននេះ