ទីក្រុងហាណូយ៖ ប្រទេសវៀតណាមកើតមានឧបទ្ទវហេតុយន្តហោះ និងយន្តហោះប៉ះគ្នា និងបង្ខំឱ្យជើងហោះហើរមួយចំនួនត្រូវលុបចោល។ យន្តហោះ២គ្រឿងរបស់ក្រុមហ៊ុនអាកាសចរណ៍វៀតណាម អ៊ែឡាញ (Vietnam Airlines) នៅសុខៗស្រាប់តែប៉ះទង្គិចគ្នានៅអាកាសយានដ្ឋានអន្តរជាតិណយបាយ (Noi…
ទីក្រុងហាណូយ៖ ប្រទេសវៀតណាមកើតមានឧបទ្ទវហេតុយន្តហោះ និងយន្តហោះប៉ះគ្នា និងបង្ខំឱ្យជើងហោះហើរមួយចំនួនត្រូវលុបចោល។ យន្តហោះ២គ្រឿងរបស់ក្រុមហ៊ុនអាកាសចរណ៍វៀតណាម អ៊ែឡាញ (Vietnam Airlines) នៅសុខៗស្រាប់តែប៉ះទង្គិចគ្នានៅអាកាសយានដ្ឋានអន្តរជាតិណយបាយ (Noi Bai) ធ្វើឱ្យយន្តហោះទាំង២ត្រូវអាក់ខានដំណើរ។
អ្នកដំណើរដែលអង្គុយនៅក្នុងនោះរាប់រយនាក់ត្រូវតែបង្ខំចិត្តចាកចេញពីយន្តហោះដើម្បីឡើងជិះយន្តហោះផ្សេង។ សាក្សីនិយាយថានៅម៉ោង២:២៣រសៀលថ្ងៃនេះ យន្តហោះបូអ៊ីងខ្នាតធំឌ្រីមឡាញណឺ (Dreamliner) ជើងហោះហើរ VN-A863 ត្រូវរថយន្តសណ្ដោងចូលផ្លូវហោះហើរដើម្បីចាកចេញដំណើរឆ្ពោះទៅទីក្រុងហូជីមិញ។ រំពេចនោះស្រាប់តែយន្តហោះនេះប៉ះនឹងកន្ទុយរបស់យន្តហោះមួយគ្រឿងទៀតម៉ាកអ៊ែបឺសអេ៣២១ (Airbus A321) ដែលមានជើងហោះហើរ VN-A338។
នៅពេលកើតហេតុ យន្តហោះអ៊ែបឺសចតនៅស្ងៀម។ ប៉ុន្តែយន្តហោះនេះក៏ត្រៀមអូសចូលទៅក្នុងផ្លូវហោះហើរដើម្បីឆ្ពោះទីក្រុងឌៀនបៀនហ្វ៊ូផងដែរ។ នៅពេលនោះ អាកាសធាតុល្អណាស់ មេឃបើកថ្ងៃល្អ គ្មានពពកបាំងបិទទេ។ ឥឡូវនេះ អាជ្ញាធរអាកាសចរណ៍ស៊ីវិលកំពុងសហការជាមួយស្ថាប័នពាក់ព័ន្ធដើម្បីស៊ើបអង្កេតមូលហេតុដែលនាំឱ្យកើតមានរឿងនេះ។
គេរកឃើញស្នាមពៀចនៅចុងស្លាបយន្តហោះប៊ូអ៊ីង និងស្នាមដាច់រលាត់នៅកន្ទុយយន្តហោះអ៊ែបឺស។ បំណែកយន្តហោះនៅរាយប៉ាយលើដី។ ក្រោយហេតុការណ៍នេះ យន្តហោះទាំង២គ្រឿងត្រូវផ្អឹបទុកមួយកន្លែងមិនអនុញ្ញាតឱ្យហោះហើរទេ ដើម្បីត្រួតពិនិត្យលក្ខណៈបច្ចេកទេស។ សំណាងល្អ គ្មាននរណាម្នាក់រងរបួសដោយសារហេតុការណ៍នេះទេ។ យន្តហោះបូអ៊ីងមានអ្នកដំណើរ២៥៩នាក់ ចំណែកយន្តហោះអ៊ែបឺសមានអ្នកដំណើរ១២៧នាក់។ ក្រុមហ៊ុនបានរៀបចំសម្រួលឱ្យពួកគេឡើងជិះយន្តហោះផ្សេងវិញ៕
ចែករំលែកព័តមាននេះ