រាជធានីភ្នំពេញ ៖ ថ្លែងពីទឹកដីខេត្តព្រះវិហារ សម្តេចតេជោ ហ៊ុន សែន ប្រធានព្រឹទ្ធសភាកម្ពុជាស្នើឯកឧត្តម កើត រិទ្ធ ឧបនាយករដ្ឋមន្ដ្រី…
រាជធានីភ្នំពេញ ៖ ថ្លែងពីទឹកដីខេត្តព្រះវិហារ សម្តេចតេជោ ហ៊ុន សែន ប្រធានព្រឹទ្ធសភាកម្ពុជាស្នើឯកឧត្តម កើត រិទ្ធ ឧបនាយករដ្ឋមន្ដ្រី រដ្ឋមន្ត្រីក្រសួងយុត្តិធម៌ ពិចារណាធ្វើវិសោធនកម្មច្បាប់ដកសញ្ជាតិខ្មែរជនទាំងឡាយណាឃុបឃិតជាមួយបរទេសបំផ្លាញខ្មែរ។
ការស្នើរបស់សម្ដេចតេជោ ប្រធានព្រឹទ្ធសភាកម្ពុជាបានកើតឡើងចំពេលក្រុមប្រឆាំងជ្រុលនិយមជាជនជាតិខ្មែរមួយក្តាប់តូចកំពុងរស់នៅបរទេសបាននិងកំពុងធ្វើការវាយប្រហារជាតិឯងក្នុងចេតនាបំបាក់ទឹកចិត្ត និងធ្វើឱ្យប៉ះពាល់ដល់កិត្តិយសជាតិ ក្នុងកាលៈទេសៈកម្ពុជាកំពុងកើតមានជម្លោះព្រំដែនជាមួយថៃ ។
ក្នុងឱកាសជួបសំណេះសំណាលជាមួយសមាជិកក្រុមប្រឹក្សាឃុំ-សង្កាត់ ស្រុក-ក្រុង ខេត្តព្រះវិហារ នៅសាលាខេត្តព្រះវិហារ នាថ្ងៃទី២៧ ខែមិថុនា ឆ្នាំ២០២៥ សម្ដេចតេជោ ហ៊ុន សែន បានឱ្យដឹងថា ទោះបីអ្នកប្រឆាំង ក៏ជាជនជាតិខ្មែរដែរ ប៉ុន្ដែបើអ្នកប្រឆាំង ហើយបែរជាឃុបឃិតជាមួយប្រទេសប្រឆាំងខ្មែរ ក្នុងកាលៈទេសៈវិវាទព្រំដែនជាមួយថៃ ដូច្នេះមាន តម្រូវការកែវិសោធនកម្មច្បាប់រដ្ឋធម្មនុញ្ញសារជាថ្មីម្ដងទៀត ។
សម្ដេចតេជោ ហ៊ុន សែន បានគូសបញ្ជាក់ថា «ខ្ញុំសូមផ្ដាំផ្ញើទៅ ឯកឧត្តម រដ្ឋមន្ដ្រីក្រសួងយុត្តិធម៌កម្ពុជា សិក្សាអំពីការធ្វើវិសោធនកម្មច្បាប់រដ្ឋធម្មនុញ្ញ ទាក់ទងនឹងការដកសញ្ជាតិពលរដ្ឋកម្ពុជាណាដែលឃុបឃិតជាមួយបរទេសបំផ្លាញខ្មែរ» ។
ជាមួយគ្នានោះដែរសម្តេចតេជោ ប្រធានព្រឹទ្ធសភាបានឱ្យដឹងថា យោងតាមរដ្ឋធម្មនុញ្ញកម្ពុជា បច្ចុប្បន្ន មិនមានចែងពីការដកសញ្ជាតិ ឬមិនអាចនិរទេសពលរដ្ឋខ្មែរខ្លួនឯងបាន ឡើយ តែបើសិនក្នុងករណី ដែលបុគ្គលនោះ បង្កការប៉ះពាល់ធ្ងន់ធ្ងរដល់សង្គមជាតិចូលដៃជាមួយបរទេស ដើម្បីបំផ្លាញកម្ពុជា តើគួរមានច្បាប់សម្រាប់ចា ត់វិធានការចំពោះបុគ្គលនោះដែរឬទេ? ៕
ចែករំលែកព័តមាននេះ