ទីក្រុងតូក្យូ៖ ថ្ងៃនេះ ប្រទេសជប៉ុនប្រហារជីវិតយុវជនម្នាក់ពីបទសម្លាប់មនុស្ស៩នាក់ដែលស្គាល់គ្នាតាមអនឡាញ។ បុរសឈ្មោះតាកាហ៊ីរ៉ូ ស៊ីរ៉ៃស៊ី (Takahiro Shiraishi) វ័យ៣៤ឆ្នាំត្រូវគេប្រសិទ្ធនាមថា «ទ្វីតថឺ ឃីលឡឺ…
ទីក្រុងតូក្យូ៖ ថ្ងៃនេះ ប្រទេសជប៉ុនប្រហារជីវិតយុវជនម្នាក់ពីបទសម្លាប់មនុស្ស៩នាក់ដែលស្គាល់គ្នាតាមអនឡាញ។ បុរសឈ្មោះតាកាហ៊ីរ៉ូ ស៊ីរ៉ៃស៊ី (Takahiro Shiraishi) វ័យ៣៤ឆ្នាំត្រូវគេប្រសិទ្ធនាមថា «ទ្វីតថឺ ឃីលឡឺ – Twitter Killer» ឬឃាតករតាមទ្វីតថឺ។ អាជ្ញាធរជប៉ុនប្រហារជីវិតគាត់ដោយព្យួរក។ ជនរងគ្រោះភាគច្រើនជាស្ត្រីវ័យក្មេងលើកលែងតែមួយករណីគត់ដែលជាបុរស។ គាត់យកបណ្ដាញទ្វីតថឺធ្វើជាមធ្យោបាយទំនាក់ទំនងជាមួយជនរងគ្រោះឱ្យចូលទៅក្នុងអន្ទាក់របស់គាត់។
គាត់ច្រើនឆែកមើលតាមទ្វីតថឺដើម្បីតាមដានមើលជនរងគ្រោះរូបណាដែលឧស្សាហ៍បង្ហោះសារបង្ហាញអំពីការធុញថប់នឹងជីវិតរស់នៅរបស់ខ្លួន បង្ហោះសារបែបដ្រាម៉ា (drama) លែងចង់រស់នៅលើភពផែនដីនេះតទៅទៀត។ នោះហើយជាគោលដៅដែលបុរសជប៉ុនរូបនេះចង់បាន។ នៅពេលឃើញអ្នកបង្ហោះសារបែបនេះ គាត់ប្រាប់ទៅពួកគេវិញថាគាត់អាចជួយសម្រេចបំណងរបស់ពួកគេបាន។ គាត់ប្រើភាសាបោកថា «បើថាម៉េចម៉ាណាត់ជួបគ្នា ហើយយើងស្លាប់ជាមួយគ្នាតែម្ដង»។
រដ្ឋមន្ត្រីយុត្តិធម៌ជប៉ុន លោកកេអ៊ីស៊ូកេ ស៊ុយហ្ស៊ុយគី (Keisuke Suzuki)ថ្លែងថាស៊ីរ៉ៃស៊ីប្រព្រឹត្តបទល្មើសនៅអំឡុងឆ្នាំ២០១៧មានច្រើនករណីដូចជាប្លន់យកទ្រព្យសម្បត្តិ, រំលោភសេពសន្ថវៈ, មនុស្សឃាត, កម្ទេចសាកសព (មួយករណី) និងទុកសាកសពចោល (មួយករណី)។ លោកថ្លែងថាជនរងគ្រោះ៩នាក់ត្រូវជនដៃដល់រូបនេះវាយដំច្រំធាក់ និងរឹតករហូតដល់ស្លាប់។
ជួនកាលគាត់ប្លន់ទ្រព្យសម្បត្តិជនរងគ្រោះ ជួនកាលគាត់កាត់ច្រៀកសរីរៈរាងរបស់សាកសពជនរងគ្រោះជាកង់ៗថែមទៀត ហើយលាក់បំពួននៅក្នុងកេស។ មានករណីខ្លះគាត់បោះបំណែកសាកសពចោលទៅក្នុងវាលចាក់សំរាម។ បន្ទាប់ពីពិចារណាទៅលើសំណុំរឿងនេះសាចុះសាឡើងយ៉ាងដិតដល់ លោករដ្ឋមន្ត្រីរូបនេះសម្រេចចិត្តថាត្រូវតែផ្ដន្ទាទោសប្រហារជីវិត។
ស៊ីរ៉ៃស៊ីត្រូវតុលាការផ្ដន្ទាទោសប្រហារជីវិតកាលពីឆ្នាំ២០២០ពីបទប្រព្រឹត្តអំពើមនុស្សឃាតទៅលើជនរងគ្រោះ៩នាក់ដែលមានអាយុចន្លោះពី១៥ឆ្នាំដល់២៦ឆ្នាំ។ បន្ទាប់ពីគាត់ល្បួងជនរងគ្រោះឱ្យធ្វើដំណើរទៅកាន់ផ្ទះរបស់គាត់នៅក្បែរទីក្រុងតូក្យូ និងសម្លាប់រួច គាត់រក្សាទុកសាកសពនៅក្នុងទូក្លាស្សេ។ មេធាវីថ្លែងថាកូនក្ដីរបស់ខ្លួនគួរណាស់ផ្ដន្ទាទោសត្រឹមជាប់ពន្ធនាគារគឺគ្រប់គ្រាន់ហើយ មិនចាំបាច់ដល់ថ្នាក់ប្រហារជីវិតទេព្រោះជនរងគ្រោះទាំងនោះសុទ្ធតែស្ម័គ្រចិត្តស្លាប់ដោយខ្លួនឯង។
ទោះបីខំតវ៉ាបែបនេះក្ដី ចៅក្រមម្នាក់ជំទាស់នឹងទឡ្ហីករណ៍នេះ។ គាត់ថាអំពើឧក្រិដ្ឋរបស់ស៊ីរ៉ៃស៊ីមានភាពសាហាវឃោរឃៅ និងពោរពេញដោយល្បិចកលបោកបញ្ឆោត។ គាត់បានជាន់ឈ្លីជ្រុលពេកហើយទៅលើសេចក្ដីថ្លៃថ្នូររបស់ជនរងគ្រោះ។ ចៅក្រមថ្លែងបន្តទៀតថាស៊ីរ៉ៃស៊ីឆ្លៀតឱកាសដែលជនរងគ្រោះកំពុងជួបនឹងវិបត្តិផ្លូវចិត្តងាយស្រួលអូសទាញឱ្យធ្លាក់ចូលទៅក្នុងអន្ទាក់ដ៏ខ្មៅងងឹតរបស់គាត់។
សំណុំរឿងមនុស្សឃាតដ៏ព្រឺសម្បុរនេះត្រូវបានលាតត្រដាងកាលពីរដូវស្លឹកឈើជ្រុះឆ្នាំ២០១៧នៅពេលសមត្ថកិច្ចស៊ើបអង្កេតករណីបាត់ខ្លួននារីវ័យ២៣ឆ្នាំម្នាក់។ សាក្សីនិយាយថានារីនោះបង្ហោះសារនៅលើទ្វីតថឺថាចង់សម្លាប់ខ្លួន។ បងប្រុសរបស់ស្ត្រីរូបនោះចូលប្រើគណនីទ្វីតថឺរបស់នាងដើម្បីចង់ដឹងថាតើនាងធ្លាប់ទាក់ទងជាមួយនរណាខ្លះ។ នៅទីបំផុត សមត្ថកិច្ចចុះទៅដល់ផ្ទះរបស់ជនដៃដល់តែម្ដង។ នៅពេលទៅដល់ឃើញសាកសពជនរងគ្រោះដាច់កំណិតកំណាត់ពេញផ្ទះ៕
ចែករំលែកព័តមាននេះ