ខេត្តបាត់ដំបង ៖ ដើម្បីជួយសម្រួលដល់ការធ្វើដំណើររបស់ពលករខ្មែរ ដែលវិលត្រឡប់ពីប្រទេសថៃ ចូលមកកាន់ប្រទេសកំណើតខ្លួនវិញ នៅព្រឹកថ្ងៃទី២៧ មិថុនា នេះ រដ្ឋបាលខេត្តបាត់ដំបងបានបញ្ជូនរថយន្តជាច្រើនគ្រឿងទៅកាន់ច្រកទ្វារព្រំដែនអន្តរជាតិ«ដូង» ក្នុងស្រុកកំរៀងដើម្បីជួយដឹកពលករខ្មែរទៅកាន់ស្រុកកំណើតនៅតាមបណ្ដាខេត្តនានា…
ខេត្តបាត់ដំបង ៖ ដើម្បីជួយសម្រួលដល់ការធ្វើដំណើររបស់ពលករខ្មែរ ដែលវិលត្រឡប់ពីប្រទេសថៃ ចូលមកកាន់ប្រទេសកំណើតខ្លួនវិញ នៅព្រឹកថ្ងៃទី២៧ មិថុនា នេះ រដ្ឋបាលខេត្តបាត់ដំបងបានបញ្ជូនរថយន្តជាច្រើនគ្រឿងទៅកាន់ច្រកទ្វារព្រំដែនអន្តរជាតិ«ដូង» ក្នុងស្រុកកំរៀងដើម្បីជួយដឹកពលករខ្មែរទៅកាន់ស្រុកកំណើតនៅតាមបណ្ដាខេត្តនានា ក្នុងព្រះរាជាណាចក្រកម្ពុជា ។
រថយន្តដឹកអ្នកដំណើររបស់រដ្ឋបាលខេត្តជាច្រើនគ្រឿង បានទៅដល់មាត់ច្រកទ្វារព្រំដែនអន្តរជាតិ«ដូង»ទាំងព្រឹកព្រលឹម រង់ចាំទទួលស្វាគមន៍យ៉ាងកក់ក្ដៅដោយមន្ត្រីនានា ដែលដឹកនាំផ្ទាល់ដោយលោក សុខ លូ អភិបាលខេត្តបាត់ដំបង ។
ច្រកទ្វារតូចសម្រាប់ថ្មើជើងនៃច្រកទ្វារអន្តរជាតិ«ដូង»ភាគីថៃបានទាញទ្វារបើកនៅម៉ោង៨ព្រឹក រីឯភាគីកម្ពុជាបានបើកនៅម៉ោង៩ព្រឹក ។ ក្រុមពលករខ្មែររាប់រយនាក់ ដែលកកកុញនៅម្ខាងព្រំដែននៃទឹកដីថៃក៏បានរួសរាន់ឆ្លងចូលទឹកដីកម្ពុជាជាមួយនឹងអីវ៉ាន់យ៉ាងសំពីងសំពាយផង ស្របពេលដែលរថយន្តដឹកអ្នកដំណើររបស់រដ្ឋបាលខេត្តបញ្ឈររង់ចាំស្វាគមន៍ជាស្រេចនៅមាត់ច្រកទ្វារធំ ។
មន្ត្រីច្រកទ្វារព្រំដែនបានប្រកាសទៅកាន់ក្រុមពលករនានាដែលបានចូលមកដល់ទឹកដីកំណើតពីគោលដៅនៃការដឹកជញ្ជូនរបស់រថយន្តរដ្ឋបាលខេត្ត ។ រថយន្តរដ្ឋបាលខេត្តនឹងជួយដឹកជញ្ជូនបងប្អូនពលករខ្មែរទៅកាន់បណ្ដាខេត្តនានាដែលជាស្រុកកំណើររបស់បងប្អូនរស់នៅ ។
នេះជាការជួយសម្រួលដល់ការធ្វើដំណើររបស់បងប្អូនពលករខ្មែរដែលបានវិលត្រឡប់ពីប្រទេសថៃមកដល់ទឹកដីកម្ពុជាវិញ ចៀសវាងបងប្អូនពលករជួបការលំបាក និងត្រូវចំណាយសោហ៊ុយច្រើន ។
បើតាមសេចក្ដីរាយការណ៍ពីអាជ្ញាធរបានឲ្យដឹងថា គិតត្រឹមរយៈពេល០២ថ្ងៃចុងក្រោយ (២៥.២៦.២៥) នេះ ពលករខ្មែរដែលបានវិលត្រឡប់ពីប្រទេសថៃចូលមកដល់ទឹកដីប្រទេសកំណើតវិញ តាមបណ្ដាច្រកទ្វារព្រំដែននានា ក្នុងភូមិសាស្ត្រ ខេត្តបាត់ដំបង មានចំនួនជិត៣០០០នាក់ហើយ ។
ហើយពួកគេនឹងបន្តវិលត្រឡប់ចូលស្រុកកំណើតវិញ កាន់តែច្រើនជាបន្តបន្ទាប់ទៀតនៅថ្ងៃនេះ និងថ្ងៃបន្ទាប់ ខណៈពេលដែលរដ្ឋបាលខេត្តបញ្ជូនរថយន្តជាច្រើនគ្រឿងទៅរង់ចាំនៅមាត់ច្រកទ្វារព្រំដែន ដើម្បីរង់ចាំជួយសម្រួលដល់ការធ្វើដំណើររបស់បងប្អូនពលករទៅកាន់ស្រុកកំណើត
រៀងៗខ្លួន ៕
ចែករំលែកព័តមាននេះ