បុរសម្នាក់ផឹកស្រវឹង បើករថយន្តបង្កគ្រោះថ្នាក់ទាំងព្រឹកហើយមិនទទួលខុសត្រូវទៀត
រាជធានីភ្នំពេញ ៖ បុរសម្នាក់បានផឹកស្រវឹង ជោកជាំទាំងព្រឹក រួចបានបើកបររថយន្តម៉ាក Toyota Prius ១គ្រឿង ជ្រុលទៅបុកពីក្រោយរថយន្តម៉ាក Lexus…
រាជធានីភ្នំពេញ ៖ បុរសម្នាក់បានផឹកស្រវឹង ជោកជាំទាំងព្រឹក រួចបានបើកបររថយន្តម៉ាក Toyota Prius ១គ្រឿង ជ្រុលទៅបុកពីក្រោយរថយន្តម៉ាក Lexus LX-470 ១គ្រឿងទៀត ដែលកំពុងបើកបរស្របគ្នា បណ្ដាលឲ្យរងការខូចខាត។ ភ្លាមៗនោះ ម្ចាស់រថយន្ត Lexus LX-470 បានទារសំណង៧០ដុល្លារ តែបុរសនោះអត់សង ក្រោយមកចុះត្រឹម៥០ដុល្លារ ហើយបុរសនោះមានលុយក្នុងកាបូបរាប់ម៉ឺនរៀល ក៏នៅតែមិនព្រមសងទៀត។ មិនតែប៉ុណ្ណោះព្រោះតែស្រវឹងធ្លាក់ភ្នែកចរចាគ្នាបណ្ដើរដេកលក់ក្នុងរថយន្តបណ្ដើរ ពិបាកនិយាយគ្នាខ្លាំងណាស់ ធ្វើឲ្យសមត្ថកិច្ច និងភាគីម្ចាស់រថយន្ត Lexus LX-470 តឹងទ្រូងស្ទើរធ្លាយ ។ ទីបំផុត នគរបាលក៏បានស្ទូចលើកទាំងរថយន្ត និងបុរសស្រវឹងរូបនេះ ខណៈកំពុងដេកលក់ក្នុងរថយន្តនោះ នាំយកទៅកាន់អធិការដ្ឋានខណ្ឌពោធិ៍សែនជ័យតែម្ដង ។
ឧប្បត្តិហេតុនោះបានកើតឡើងកាលពីវេលាម៉ោង៧និង៣០នាទីព្រឹកថ្ងៃទី២៣ ខែមិថុនា ឆ្នាំ២០២៥ នៅលើផ្លូវជាតិលេខ៤ ត្រង់ចំណុចមុខផ្សារជម្ពូវ័ន ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បុរសស្រវឹងស្រាទាំងព្រឹកនោះ មិនត្រូវបានស្គាល់អត្តសញ្ញាណនោះទេ បើកបររថយន្ត ១គ្រឿងម៉ាកToyota Prius ពណ៍សពាក់ស្លាកលេខភ្នំពេញ 2BS-9653 ។ រថយន្តនេះខូចខាតចំហៀងខាងស្ដាំ ចំណែកភាគីម្ខាងទៀតក៏មិនត្រូវបានស្គាល់អត្តសញ្ញាណដែរ បើកបររថយន្តម៉ាក Lexus LX-470 ខូចខាតកាងក្រោយខាងឆ្វេង ។
អ្នកឃើញហេតុការណ៍នោះបាននិយាយថា នៅមុនពេលកើតហេតុ រថយន្តម៉ាក Lexus LX-470 ពណ៍ស ពាក់ស្លាកលេខភ្នំពេញ 2AY-9879 បើកបរតាមផ្លូវជាតិលេខ៤ ក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុ ស្រាប់តែបុរសដែលស្រវឹងស្រានោះ បើកបររថយន្តម៉ាក Toyota Prius ក្នុងទិសដៅស្របគ្នា ទៅដល់បុកពីក្រោយទាំងកំរោល បណ្ដាលឲ្យរងការខូចខាតតែម្ដង។ ខណៈនោះ សំណាងខ្លាំងណាស់ បើកុំតែបុករថយន្តឡិចស៊ីសនេះទេ នោះ រថយន្តព្រូសនេះ ប្រាកដជាបុកសិស្សសាលាជម្ពូវ័ន ៥ទៅ៦នាក់ ដែលកំពុងដើរឆ្លងផ្លូវ ជាក់ជាមិនខានឡើយ ។
ប្រភពដដែល បានប្រាប់ឲ្យដឹងបន្តទៀតថា ខណៈនោះបុរសស្រវឹងខាងលើ មិនបានទទួលខុសត្រូវ លើហេតុការណ៍ដែលខ្លួនបង្កឡើងនោះទេ ក៏បានបើករថយន្តក្រោយបុកម៉ូតូ ១គ្រឿងទៀត រួចទើបបើកទៅមុខគេចខ្លួន ។ ពេលនោះ ម្ចាស់រថយន្ត Lexus LX-470 ក៏បានបើកដេញតាម រហូតដល់ផ្លូវវ៉េងស្រង ស្ថិតនៅក្នុងភូមិជ្រៃកោង សង្កាត់ចោមចៅទី២ ខណ្ឌពោធុ៍សែនជ័យ ទើបឃាត់បាន។ បន្ទាប់មក នគរបាលចរាចរណ៍ខណ្ឌពោធិ៍សែនជ័យ ក៏បានចុះទៅអន្តរាគមន៍ រួចឲ្យភាគីទាំង២ សម្របសម្រួលគ្នា ដើម្បីបញ្ចប់រឿង ។
ប្រភពខាងលើ បានប្រាប់ឲ្យដឹងបន្ថែមទៀតថា ភ្លាមៗនោះ ភាគីម្ចាស់រថយន្តម្ចាស់រថយន្ត Lexus LX-470 បានទារថ្លៃជួសជុលរថយន្ត ចំនួន៧០ដុល្លារ ប៉ុន្តែបុរសស្រវឹងស្រានោះ មិនព្រមសង ហើយក៏បានចរចាគ្នាបន្ត ។ ប៉ុន្តែចរចាបណ្ដើរបុរសនោះដេកលក់ក្នុងរថយន្តបណ្ដើរ ព្រោះតែស្រវឹងខ្លាំងពេក ហើយបើនគរបាល ចង់និយាយជាមួយទៅដាស់បុរសនោះមកនិយាយ លុះនិយាយរួច ដេកបន្តទៀត ។
ប្រភពមួយនោះ បានប្រាប់ទៀតថា ក្រោយមកម្ចាស់រថយន្ត Lexus LX-470 បានចុះត្រឹម ៥០ដុល្លារប៉ុណ្ណោះ ហើយនគរបាល ក៏បានដាស់បុរសនោះ ដើម្បីនិយាយគ្នា និងសួរថា តើ៥០ដុល្លារព្រមសងគេដែរទេ ? ប៉ុន្តែបុរសនោះ នៅតែមិនព្រមសងដដែល បើទោះបីជាគាត់មានលុយរាប់សិបម៉ឺនរៀល នៅក្នងកាបូបក៏ដោយ ក៏មិនសងដែរ រួចដេកទៅវិញទៀត ធ្វើព្រងើយ។ បន្ទាប់មកទៀត ដោយសារតែបុរសនោះ គិតតែពីដេកលក់ក្នុងរថយន្ត ពិបាកនិយាយគ្នាខ្លាំងពេក ទើបនគរបាលសម្រចនាំយករថយន្តទាំង២គ្រឿង ទៅរក្សាទុកនៅអធិការដ្ឋានខណ្ឌពោធិ៍សែនជ័យ ដើម្បីដោះស្រាយនៅពេលក្រោយ ហើយនគរបាលបានស្ទូចរថយន្តព្រូសខាងលើ ទាំងដែលអ្នកបើកបរស្រវឹងរូបនោះ កំពុងដេកលក់នៅក្នុងរថយន្តនោះតែម្ដង។ លុះពេលទៅដល់អធិការដ្ឋានខណ្ឌពោធិ៍សែនជ័យ មានក្រុមគ្រួខាងបុរសស្រវឹងស្រានោះ ទៅសម្របសម្រួលជាមួយ ម្ចាស់រថយន្តឡិចស៊ីស និងព្រមព្រៀងគ្នាបញ្ចប់រឿង ៥០ដុល្លារ រួចក្រុមគ្រួសារបានធានាយកបុរសនោះត្រលប់ទៅផ្ទះវិញ ៕
ចែករំលែកព័តមាននេះ